रोमी 10 - घले नयाँ करार1 अत-अची च्योन्यू, ङैजे मीयूदेये उद्धार प्रेस्स्य यदेबे ङ मन्न ख्यङ्। होरेक्यूत्देबे ङैदे थमयूजे लागि प्रार्थना चीन्न ख्यङ्। 2 ङ अम्ब गवाही पीन्क्य, थमयूने परमेश्वरजे सेवा चेब सोरो जङ्गर् ख्यङ्, तर केर्बे सेवा चे पर्दे, थमयूने चेलाबे ज्ञान त्वो। 3 होरेक्यूप्प परमेश्वरदे थमयूने केर्बे धार्मिकताजे मी ठर्दीमीदे हम्ब पो अन्क्वो, थमयू रङ्सेदेने धार्मिकता ठर्देब लम् मल्दे, होर्दे थमयू धर्मी ठर्देने परमेश्वरजे खूम्दे रङ्सेने अन्सूम्दी। 4 चेनेयलो विश्वास चेब मीयू धर्मी ठर्दीस्य यदेबे ख्रीष्टदे मोशाजे नियम जेम्पीदे। 5 मोशादे धर्मशास्त्रने लिख्दीये ख्यङ्, “नियमने ख्यब आज्ञायू मन्दे मी हम्ब आज्ञादेने जीया चैय।” 6 तर विश्वास चीत्देबे धार्मिकता ख्यबदे येरे य ख्यङ्, “नदे सेम् नङने येरे अन्-यलाची, ‘स्वर्गने सू टेब खूइय?’ (या ख्रीष्टने मो रेने), 7 या रङ्से सेम्ने येरेये अन्-यलाची, पातालने सू तेल्ब?” (या सीयेबयूदे ख्रीष्टने तो रेने)। 8 तर अम्बदे च यीय? “परमेश्वरजे वचन नमयू ट्याने ख्यङ्, अम्ब नमयूजे ङूर्नेने मेस्ये सेम्ने ख्यङ्”, या विश्वासजे वचन, हम्ब ङीनदे प्रचार चीक्क्य। 9 चेनेयलो कादेये नमयू रङ्सेजे ङूर्दे येशूने प्रभू ख्यङ् यदेबे स्वीकार चीत्दे यलो, होर्दे परमेश्वरदे ङूने सीयेबयू नङदे सोम्बो चीम्मीदे यब रङ्से सेम्ने विश्वास चीक्क्य यलो, नमयूजे उद्धार क्यूक्क्य। 10 चेनेयलो मीदे रङ्से सेम्ने विश्वास चीत्देबे परमेश्वरजे खूम्ने धर्मी ठर्दीय, होरदे प्रभू मन्दीय यदेबे ङूजे ङूरदे स्वीकार चीत्दे यलो ङूदे उद्धार प्रेक्क्य। 11 चेनेयलो धर्मशास्त्रदे यीय, “ङूने विश्वास चेब मीयू कलङ्बेये त्वा अम्पर्दी।” 12 चेनेयलो यहूदी मेस्ये यहूदी तेब मीने चेत्याये फरक त्वो। क्वाजेने परमेश्वर तीत्यात्या ख्यङ्, मेस्ये ङूने गोमब क्वाने ङूदे बेस्से असी पीन्क्य। 13 धर्मशास्त्रदे यीय, “प्रभूजे मीन् गोमब मीयू क्वादेने उद्धार प्रेक्क्य।” 14 तर प्रभूने विश्वास अन्चील्लाबे केर्बे ङूने मीयूदे गोम? ङूजे बारेने तने अन्त, केर्बे ङूने विश्वास चे? मेस्ये सूदेये अन्स्योम्मीलो थमयूदे केर्बे त स्व? 15 मेस्ये सूदेये अन्कूल्बीलाबे मीयूदे केर्बे सूजोने स्य्वे? धर्मशास्त्रदे यीय, “सूगब खबर स्य्वेब मीयूजे तोप् सोरो ज्य ख्यङ्!” 16 तर थमयू क्वादेने सूगब खबरने अम्मन्दे ख्यङ्। चेनेयलो अगमवक्ता यशैयादे यीय, “प्रभू, ङीदे स्य्वेब पोने सूदे विश्वास चेख्यङ्?” 17 येर्बे, सूगब खबर ङ्यीन्देबे विश्वास रीय, होरदे हम्ब तब पो ख्रीष्टजे प्रचारदे रीय। 18 तर ङ लोक्क्य, “च थमयूदे सूगब खबर अन्त?” थमयूदे सूगब खबर तम्दम्ने त ख्यङ्, चेनेयले “थमयूजे के पृथ्वी भरी, मेस्ये थमयूजे सूगब खबर संसारजे कून-कूनसेमे फ्योये ख्यङ्।” 19 ङ फेरि लोक्क्य, “च इस्राएलजे मीयूदे अम्ब पो अङ्क्वया? मोशाजे बीलने परमेश्वरदे य ख्यङ्, “ङैदे ङैजे मीयूने ठेनब चेने यहूदी देब मीयूने असी पीन्क्य, सूजो मूर्ख जातजे मीयूने मुक्ति पीन्देबे नमयूने छी लङ्ला चीक्क्य।” 20 अगमवक्ता यशैयादे आँट चीत्देबे यीय, ङैने मेलने-अम्मलब मीयूदे ङैने तूदे, मेस्ये सूदे ङैने अम्मल् थमयूजे अन्द्रने ङैदे रङ्सेने तम्मे ख्यङ्।” 21 तर इस्राएलजे बारेने ङूदे यीय, “ङैजे पो अन्ङ्यीनब मेस्ये ङैजे विरोधने लङब मीयू क्वाजे लागि ङैजे ला नोस्सेने लङ्न ख्यङ्।” |
Ghale New Testament © Nepal Bible Society, 2011.
Nepal Bible Society