प्रकाश 9 - घले नयाँ करारशक्तिशाली रीक्यू 1 होर्दे पाँचौ स्वर्गदूतदे रङ्सेप्रे ख्यब धूङ्कूर् तप्दे, मेस्ये स्वर्गदे कर्चेन् त्या मो पृथ्वीने तल्रब ङैदे तङ्दे। हम्ब कर्चेन्ने अतल कुण्डजे चापी पीन्दे। 2 हम्बदे अतल कुण्ड पूक्दे, मेस्ये मी प्ल्याङ्नब भोप्प्रो केन्दे म्वीयूङ् योङ्रप्र हम्ब नेदे म्वीयूङ् योङ्रदे, मेस्ये अतल कुण्डजे म्वीयूङ्दे मीया मेस्ये मू मून्तूङ् चीप्पीदे। 3 हम्ब म्वीयूङ् नङ्दे पृथ्वीने रीक्यू योङ्रदे। मेस्ये पृथ्वीने ख्यब बिच्छीयूजेप्र शक्ति थमयूने पीन्दे। 4 हम्बयूने आज्ञा पीन्दे, पृथ्वीने ख्यब रेम्यू या तङ्बोयू मेस्ये चीद पोयू कम्बनेये हानी अन्चील्लाची, तर पैने परमेश्वरजे छाप त्वब मीयूनेत्यामे हानी ची। 5 थमयूने च्योक् अन्सेल्लाची, तर ल ङ सेमे सकस् ची यदेबे हक पीन ख्य, मेस्ये बिच्छीदे मीने च्याब नप्रने हम्बयूदे पीनब सकस्देये होरप्रने सोरो न ख्य। 6 हन्छ्वाब मीयूदे मृत्यू मल्क्य, तर प्रेस्स्ये त्वो। थमयूदे सीबब सेम् चीक्क्य, तर मृत्यू थमयू ट्यादे छ्योङ्बीय। 7 हम्ब रीक्यू येरे लेप्प, लडाइँने जीङ्बजे लागि तयार चीतेब मी टब तयूप्र तङ ख्य। थमयूजे टने मर्जे मुकुटप्र ख्य, मेस्ये थमयूजे त्वाब मीजे त्वाप्रने तङ ख्य। 8 थमयूजे टफू मदीयूजे टफूप्र ख्य, मेस्ये डेन्याजे सप्र थमयूजे स ख्य। 9 होर्दे थमयूजे गूने ह्वेब लेप्प्र्या जङ्जेप्र ख्य, मेस्ये थमयूजे येन् चील्लीब लडाइँ चेने ग्यब कूम तयू मेस्ये रथयूजे आवाजप्र योङ्र ख्य। 10 थमयूजे म्ही मेस्ये खील् बिच्छीजे प्र ख्य। थमयूजे म्हीने ल ङ सेमे मीने सकस् चेब शक्ति ख्य। 11 अतल कुण्ड दूत थमयूजे मूरुम् ख्य। हिब्रू केने ङूजे मीन् एबाड्डोन मेस्ये ग्रीक केने हम्बजे मीन् अपोल्लियोन य ख्यङ्। 12 पहिलोजे फत्या सकस् जेङ्कदे। होर्देङ्येदे फेरि सूजो फत्या सकस् ङ्ही रने बाँकी ख्यङ्। 13 होर्दे छैटौँ स्वर्गदूतदे रङ्सेप्रे ख्यब धूङ्कूर् तप्दे, मेस्ये परमेश्वरजे खूम्ने मर्जे चाक्क्य ख्य, हम्ब चाक्क्यजे रूक् स्यीयूदे योङ्रब के त्या ङैदे तदे। 14 धूङ्कूर् टेलब छैटौँ स्वर्गदूतने येरे यब ङैदे तदे, “यूफ्रेटीस यब गीन्दी केन्ने ख्यायेब हम्ब स्वर्गदूत स्यीने क्यापी।” 15 होर्दे हम्ब दूतयू स्यीने क्यापीदे, पृथ्वीने ख्यब भा सोम्जे भा त्या मीयू सेने हम्ब दूतयू हम्ब बील, हम्ब दिन, हम्ब ल मेस्ये हम्ब बर्षजे लागि तयार चीदे ख्य। 16 हम्ब तने टब सिपाईयूजे संख्या नूस्स्यू करोड यब ङैदे तदे। 17 ङैजे दर्शनने तयू मेस्ये त फ्याने टब मीयू येर तङ ख्य: थमयूजे गू जूक्तेने ह्वेब लेप्प्र्या प्ल्याङ्नब मीप्र मल्लम्, नीलमणिप्र ङ्येछ्याङ्, मेस्ये गन्धकप्र पीसरङ् ख्य। हम्ब तयूजे टब डेन्यायूजे टप्र ख्य। थमयूजे ङूर् नङ्दे प्ल्याङ्नब मी, म्वीयूङ् मेस्ये गन्धक योङ्र ख्य। 18 थमयूजे ङूर् नङ्दे योङ्रब मी, म्वीयूङ् मेस्ये गन्धकजे अम्ब फत्या सोम् सकस्यू क्यूत्देबे पृथ्वीने ख्यब भा सोम्जे भा त्या मीयू सेक्क ख्य। 19 चेनेयलो हम्ब तयूजे बोङ् थमयूजे ङूर् मेस्ये म्हीने ख्य, चेनेयलो थमयूजे म्हीयू बीस ख्यब र्वेजे टप्र ख्य, हम्बदे मीने सकस् पीन ख्य। 20 अम्ब फत्या सकस्दे अन्सेक्क लम ख्यब मीयूजे रङ्से लादे चेब कामयूजे लागि थमयूदे अझ पश्चाताप अन्ची। थमयूदे छेत्यूने, म्यादे तङ अङ्ख्वब, चैये त-अङ्ख्वब मेस्ये प्र अन्ख्वब, मर्, चाँदी, चीरी, लूङ् मेस्ये स्यङ्जे मूर्तियूने पूजा चेने अन्क्यापी। 21 थमयू रङ्सेदे चीन्नब मी-से काम, जादूयू, वेश्य काम मेस्ये ख्वब काम क्याने पश्चाताप अन्ची। |
Ghale New Testament © Nepal Bible Society, 2011.
Nepal Bible Society