प्रकाश 8 - घले नयाँ करारङ्यीफेजे छाप मेस्ये मर्जे धूप्प्रो 1 कन्छ्वाब थुमादे ङ्यीफेजे छाप ल्वादे, हन्छ्वाब स्वर्गने आधा घण्टालाप्र याङ्यूङ् क्यूत्दे। 2 ङैदे परमेश्वरजे खूम्ने मेरब स्वर्गदूतयू ङ्यीने तङ्दे। थमयूने धूङ्कूर् ङ्यी पीन ख्य। 3 मेस्ये सूजो स्वर्गदूत त्या रदे, मेस्ये मर्जे धूप्प्रो टेल्देबे चाक्क्या ट्याने मेर्दे। सिंहासनजे खूम्ने ख्यब मर्जे चाक्क्या फ्याने परमेश्वरजे पवित्र मीयू क्वाजे प्रार्थनाप्रे-प्रे चेर्देजे लागि ङूने कूम स्यूक्प पीन्दे। 4 स्वर्गदूतजे लाने टेल्नब धूप्प्रोदे रब स्यूक्पजे म्वीयूङ् परमेश्वरजे पवित्र मीयूदे चेब प्रार्थनाप्रे-प्रे तो परमेश्वरजे खूम्ने फ्योयी। 5 होर्दे स्वर्गदूतदे धूप्प्रो टेल्देबे टेने ख्यब मी भोप्प्रो हम्ब धूप्प्रोने पूत्दे, मेस्ये पृथ्वीने छाबीदे। होर्दे मू-गर्जेदेब आवाजयू, आवाजयू, क्यूलीङ्यू, मेस्ये सूङ्गू गीली। धूङ्कूर्यू 6 हम्ब धूङ्कूर् ङ्यी ख्यब स्वर्गदूतयू ङ्यीदेने धूङ्कूर् तपने तयार क्यूत्दे। 7 पहिलोजे स्वर्गदूतदे रङ्सेप्रे ख्यब धूङ्कूर् तप्दे। सोर्ब मेस्ये प्ल्याङ्नब मी काप्रे च्यूम्देबे रदे, मेस्ये पृथ्वीने हम्ब तल्रदे। होर्दे हम्ब पृथ्वीजे भा सोम्ने भा त्या, तङ्बोयूजे भा सोम्ने भा त्या मेस्ये ङ्येछ्याङ् क्यून्नब रेम्यू क्वाने ल्यागदे। 8 दोस्रो स्वर्गदूतदे रङ्सेप्रे ख्यब धूङ्कूर् तप्दे, मेस्ये मी प्ल्याङ्नब केन् गङ्प्र तङब त्या समुद्रने छापीदे होर्दे समुद्रजे भा सोम्ने भा त्या का क्यूरी, 9 मेस्ये समुद्रने ख्यब सोम्बो प्राणीयूजे भा सोम्ने भा त्या सीइ, मेस्ये क्यू जहाजयूजे भा सोम्ने भा त्या नाश क्यूरी। 10 तेस्रो स्वर्गदूतदे रङ्सेप्रे ख्यब धूङ्कूर् तप्दे, मेस्ये मूदे प्ल्याङ्नब मीदङ् बोन्प्र कर्चेन् केन् त्या तल्रदे हम्बब ह्वोङ्यूजे भा सोम्जे भात्याने मेस्ये क्यू मूरुम्यूने तल्रदे। 11 हम्ब कर्चेन्जे मीन् “ऐरेलू” ख्यङ्, मेस्ये हम्बदे चीत्देबे क्यूजे भा सोम्ने भा त्या ख क्यूरी, मेस्ये क्यू ख क्यूत्देबे कूम मीयू सीइ। 12 चौथो स्वर्गदूतदे रङ्सेप्रे ख्यब धूङ्कूर् तप्दे, मेस्ये मीयाजे भा सोम्ने भा त्या, लीनीजे भा सोम्ने भा त्या, कर्चेन्यूजे भा सोम्ने भा त्या फ्याने ठरीदे, मेस्ये थमयूजे ओथ्याङ् पीनब भा सोम्ने भा त्या मून्दूङ् क्यूरी। होर्दे नोजे भा सोम्ने भा त्या मून्दूङ् क्यूरेप्रने मून्जेये भा सोम्ने भा त्या थेप् मून्दूङ् क्यूरी। 13 ङैदे लेत्दे, मेस्ये मूजे अन्द्रने के केन् योन्देबे जूल्ली त्या येरे तेर्नब तदे, “स्वर्गदूत सोम्दे तपने लम ख्यब धूङ्कूर्जे आवाजदे चीत्देबे पृथ्वीने बास टूङबयूने धिक्कार! धिक्कार! धिक्कार! |
Ghale New Testament © Nepal Bible Society, 2011.
Nepal Bible Society