प्रकाश 15 - घले नयाँ करारस्वर्गदूतयू ङ्यी मेस्ये सोरो फत्या सकस्यू ङ्यी 1 ङैदे स्वर्गने सोरो हार्मन्देब सूजो च्यूनू त्या तङ्दे: स्वर्गदूतयू ङ्यीदे पात्ता ङ्येजे सोरो फत्या सकस्यू ङ्यी टेल ख्य, चेनेयलो हम्ब सकस्यूने परमेश्वरजे छी पूरा क्यूक्क्य ख्यङ्। 2 प्ल्याङब मीप्रे च्यूम्येब सीसजे समुद्रप्र ङैदे तङ्दे। होयाने रोला, मेस्ये हम्बजे मूर्ति फ्याने, मेस्ये हम्ब रोलाजे मीन्जे नम्बर् फ्याने ट्याबयूदे रङ्से लाने परमेश्वरदे पीनब वीणा टेल्देबे हम्ब सीसजे समुद्र नने मेर्न ख्य। 3 थमयूदे परमेश्वरजे त्वो मोशाजे मेस्ये थुमाजे प्रू येरे यदेबे पून्न ख्य, “पात्ता केन् शक्ति ख्यब परमप्रभु परमेश्वर, नैजे काम सोरो केन् मेस्ये हार्मन्देत्या ख्यङ्। न जात जातजे पात्ता केन् मूरूम्, नैजे योजनायू ठीक मेस्ये तम्दम् ख्यङ्। 4 ओ परमप्रभु नैप्रे मी-क्वाने फ ख्यङ्। होर्दे नैजे मीन्ने मी-क्वादेने महिमा चे ख्यङ्। चेनेयलो नत्यामे पवित्र ख्यङ्। जात-जातजे मीयू क्वाने रदेबे नने पूस्तीय, चेनेयलो नैजे ज्य न्याय चेब काम टक्कदेने तङ ख्यङ्।” 5 अम्ब प्रू प्वेजन्क ङ्येदे ङैदे लेत्दे, मेस्ये स्वर्गने ख्यब गवाहीजे पल कीम् होङ् क्यूरेब तङ्दे। 6 होर्दे सफा मेस्ये चकिलो कोला ह्वोदेब मेस्ये गूने मर्जे फीत्ता ख्यायेब स्वर्गदूतयू ङ्यीदे सोरो फत्या सकस्यू ङ्यी टेल्देबे हम्ब मन्दिर नङ्दे फीने योङ्रदे। 7 हम्ब सोम्बो प्राणीयू स्यी नङ्जे त्यादे कलङ्नेयली सोम्बो क्यून्नब परमेश्वरजे छीदे फ्यायेब मर्जे पीलयू ङ्यी हम्ब स्वर्गदूतयू ङ्यीने पीन्दे। 8 होर्दे परमेश्वरजे महिमा मेस्ये ङूजे शक्तिदे योङ्रब म्यूयूङ्दे हम्ब मन्दिर फ्याकदे। हम्ब स्वर्गदूतयू ङ्यीदे टेल्लेब सोरो फत्या सकस्यू ङ्यी अन्जन्दासेमे सूत्याये हम्ब मन्दिर नङ्ने क्य्व अन्खू। |
Ghale New Testament © Nepal Bible Society, 2011.
Nepal Bible Society