प्रकाश 11 - घले नयाँ करारसाक्षीयू ङ्ही 1 होर्दे ङ्येदे नाप्देब डोरप्र म्याजे पीर्कत्या ङैने पीन्दे, मेस्ये येरे यदे, “लङ्, परमेश्वरजे मन्दिर मेस्ये टेजे नाप कीन्, होर्दे पूजा चेब मीयू कोला टोङ् चील्। 2 तर मन्दिरजे फीने ख्यब य्वेजे नाप अन्कीन्लाची, चेनेयलो हम्ब जात-जातजे मीयूने पीने ख्यङ्, मेस्ये थमयूजे तोप्दे ङ्यील्लङ्दे ल-ङ्हीसेमे पवित्र सहरने च्योप्क्य। 3 ङैदे ङैजे साक्षी पीनबयू ङ्हीने हजार त्या सै-ङ्ही सोम्लङ् दिनसेमे भाङ्ग्राजे कोला होत्देबे अगमवाणी क्यम ख्वब शक्ति पीन्क्य।” 4 पृथ्वीजे न्याय चेब प्रभुजे खूम्ने मेर्नब जैतूनजे तङ्बोयू ङ्ही मेस्ये सामदानयू ङ्ही अम्बयूने ख्यङ्। 5 कादेये कोइ मीदे थमयूने हानी चेब सेम् चीत्दे यलो थमयूजे ङूर्दे योङ्रब मी-उम्ददे थमयूजे शत्रुयूने नाश चीक्क्य। कोइ मीदे थमयूने हानी चेब सेम् चीत्दे यलो येरप्रने सेक्कीय। 6 थमयूदे अगमवाणी क्यमब दिनयूने जो अन्डस्य यदेबे मूदे च्वो अन्डला चीप्पे ख्वब शक्ति प्रेख्यङ्, होर्दे क्यूयूने का चीप्पे ख्वब मेस्ये पृथ्वीने थमयूदे च-चीत्तीङ्रीको हम्ब अनुसार साप्ता थर्जे सोरो फत्या सकस्यू रे ख्वब शक्ति प्रेख्यङ्। 7 थमयूदे रङ्से गवाहीजे काम पीन जेङ्कमेस्ये अतल कुण्डदे योङ्रब हम्ब रोलादे थमयूप्रे जीङ्देबे ट्याय मेस्ये थमयूने सेक्कीय। 8 कम्ब सहरने थमयूजे प्रभु क्रूसने खील् ठोक्दीदेबे पील्क ख्य, हम्ब सहर केन्जे लम् ङने थमयूजे लासयू फोल्नीय, नमूनाजे रूप्ने हम्ब सहरजे मीन् सदोम मेस्ये मिश्री यीय। 9 सोम्म्या क्यूत्देबे नैदेजे नोगूङ् सेमे थमयूजे लासयूने मीयू, खलकयू, केयू मेस्ये जात-जातजे मीयूदे लेक्क्य मेस्ये हम्ब लासयू पोप्से अम्पीन्। 10 थमयू सेक्कब पृथ्वीने ख्यब मीयू सूग्क्य, आनन्द चीक्क्य मेस्ये त्यादे त्याने कूसीली तीपीन-छोपीन चीक्क्य। चेनेयलो हम्ब अगमवक्तायू ङ्हीदे पृथ्वीने ख्यब मीयूने सकस् पीन ख्य। 11 सोम्म्या क्यूत्देबे नेदेजे नो गूङ् ङ्येदे परमेश्वरजे जीया पीनब स थमयू नङ्ने क्योयी, मेस्ये थमयू रङ्सेजे तोप्ने मेर्दे, होर्दे थमयूने तङब मीयूब सोरो फैगदे। 12 होर्दे स्वर्गदे येरे यब के केन् त्या थमयूदे तदे, “अन्तो ख।” मेस्ये थमयूजे शत्रुयूदे लेन्नूब मूक्पने थमयू स्वर्गतेले गीली। 13 हन्छ्वाब सूङ्गू केन् गीली, मेस्ये सहरजे भा च्यूने भात्या हूली, मेस्ये सूङ्गू रदेबे हजार ङ्यी मी सेक्कदे। सूजो सोम्बो ख्यबयू फदे मेस्ये स्वर्गजे परमेश्वरने महिमा पीन्दे। 14 दोस्रो फत्या सकस्जे बील जेङ्कदे, “ले तेस्रो फत्या सकस्जे बील छ्योट्टोने रीय।” पोलो ङ्यीजे धूङ्कूर् 15 होर्देङ्येदे ङ्यीफे पलोजे स्वर्गदूतदे रङ्से धूङ्कूर् तप ङ्येदे येरे यब केन्-केन् के स्वर्गने तदे, “अम्ब संसार क्वाने ङीनजे प्रभुजे मेस्ये ङूजे ख्रीष्टजे राज्य क्यूर ख्यङ्, मेस्ये प्रभुदे येतार्ने राज्य चीक्क्य।” 16 होर्दे परमेश्वरजे खूम्ने रङ्से रङ्सेजे सिंहसानने टूङब हम्ब नूस्स्यूदे स्यी धर्म-गुरुयूदे पून्छ्यल् क्यूत्देबे परमेश्वरने स्यूव पीन्दे, 17 मेस्ये यमेदे, “पात्ता केन् शक्ति ख्यब परमप्रभु परमेश्वर, ङी नने धन्यवाद पीन्क्य, ङू चूजोये ख्यङ्, खूम्ये ख्य, चेनेयलो नदे रङ्सेजे केन् शक्ति लाने कीन्देबे राज्य चेने सुरु चीत्दे। 18 जात जातजे मीयू सोरो छी-लङ्दे, तर नैजे छी थमयू फ्याने तन्दे। सीयेब मीयूजे न्याय चेब बील रदे, नैजे त्वो अगमवक्तायू, परमेश्वरजे पवित्र मीयू मेस्ये परमेश्वरने गेसेन् चेब केन्-चीद मीयूने इनाम पीनब बील, मेस्ये पृथ्वी नोङबयूने नाश चेब बील रदे।” 19 परमेश्वरजे स्वर्गने ख्यब मन्दिरजे ख्यो पूक्पीदे, मेस्ये मन्दिर नङ्ने ख्यब ङूजे करारजे बेङे तङ्दे। क्यूलीङ् क्याब तङ्दे। फत्या के मेस्ये मू तेरब केयू तदे। सूङ्गू गीली मेस्ये सोर्ब केन् केन् रदे। |
Ghale New Testament © Nepal Bible Society, 2011.
Nepal Bible Society