प्रकाश 10 - घले नयाँ करारस्वर्गदूत मेस्ये खूस्यजे चीद मूठ 1 मूक्पदे तोलेब सूजो बोल्यो स्वर्गदूत स्वर्गदे तल्रब ङैदे तङ्दे। ङूजे ट-फ्याने कूयूङ्-क्यू ख्य, मेस्ये ङूजे त्वा मीयाप्र मेस्ये तोप्यू प्ल्याङ्नब मीजे थम्प्र ख्य। 2 खूस्यजे मूठ चीद त्या ङूजे लाने ख्य, हम्ब मूठ फाग ख्य। ङूदे रङ्सेजे स्येत् तोप् समुद्रने मेस्ये योन् तोप् सने छ्यदे। 3 होर्दे डेन्या गर्जेदेप्र के केन् योन्देबे ङू पारा पूत्दे, मेस्ये ङू पारा प्वे ङ्येदे मू ङ्यीफे गर्जेदेब आवाज योङ्रदे। 4 कन्छ्वाब हम्ब मू ङ्यीफे गर्जेदेब आवाजदे रङ्से-रङ्से आवाज योन्दे, ङ लिख्दे मल्न ख्य, हन्छ्वाब स्वर्गदे येरे यब आवाज ङैदे तदे, “हम्ब मू ङ्यीफे गर्जेदेब आवाजदे यब पोने नङ्सू हीन्, मेस्ये हम्ब अन्लीख्दीलाची।” 5 होर्दे कम्ब स्वर्गदूतने ङैदे समुद्र मेस्ये सने छ्यदेबे मेर्नब तङ ख्य, हम्ब स्वर्गदूतदे रङ्से ला तो स्वर्गतेले लङ्दे। 6 होर्दे येतार्ने सोम्बो क्यून्नब, स्वर्ग मेस्ये होने ख्यब सेयू, पृथ्वी मेस्ये होने ख्यब सेयू, समुद्र मेस्ये होने ख्यब सेयूने सृष्टि चेबजे मीन्ने ङूदे कसम चदेबे जेम्से गस्ये त्वो यदे। 7 तर कन्छ्वाब हम्ब दिनयूने ङ्यीफे पोलोजे स्वर्गदूतदे रङ्सेप्रे ख्यब धूङ्कूर् तब मैय, हन्छ्वाब रङ्से त्वो अगमवक्तायूने ङूदे बोङ्बे यप्र परमेश्वरजे नङ्सू पो पूरा क्यूक्क्य। 8 होर्दे स्वर्गदे योङ्रब आवाजदे ङैने फेरि येरे यब ङैदे तदे, “समुद्र मेस्ये सने मेर्नब दूतजे लाने फागब खूस्यजे मूठ ख्यङ्, हम्ब कीम्ब।” 9 होर्दे ङ स्वर्गदूत ख्यनेने गीलीदे मेस्ये हम्ब चीद खूस्यजे चिट्ठी मूठ स्यदे। होर्दे ङूदे ङैने यदे, “ना, कीन्, मेस्ये चेपी। नैजे लोने अम्ब क्यूङ् क्यूक्क्य, तर नैजे ङूर्नेब अम्ब खूदूप्र ङर क्यूक्क्य।” 10 हम्ब स्वर्गदूतजे लाने ख्यब हम्ब चीद खूस्यजे मूठ ङैदे कीन्दे मेस्ये चेपीदे। हम्ब मूठ ङैजे ङूर्ने खूदूप्रने ङर क्यूत्दे। तर हम्ब मो-योप्पे ङ्येदे ङैजे लो क्यूङ्कीदे। 11 होर्दे, “नदे कूम मीयू, जात-जातयू, केयू मेस्ये मूरूम्यूजे बारेने फेरि अगमवाणी क्यम पर्तीय” यदेबे ङैने यदे। |
Ghale New Testament © Nepal Bible Society, 2011.
Nepal Bible Society