मर्कूस 4 - घले नयाँ करारलू थरब उखान मत्ती १३:१-२३ ; लूका ८:४-१५ 1 ङ्येदे फेरि समुद्रजे नने ङूदे मीयूने शिक्षा पीनने सुरु चीत्दे। ङूजे ती-छो का-मुलुकने बेस्से कूम मीयू क्यूत्दे। मेस्ये ङू समुद्रने ख्यब डुङ्गा त्याने टदेबे टूङ्दे। मीयू समुद्र नजे पखने टून ख्य। 2 होर्दे ङूदे थमयूने उखानयू पूत्देबे कूम पोयू लोम्मीदे। ङूदे थमयूने येरे यदेबे लोम्मीदे: 3 “पो ङ्यीन्! मीत्या लू थरने रङ्ने योङ्गीदे। 4 होर्दे लू थर्ब कोइ लम्तेले थरी, मेस्ये हम्ब लू ययू रदेबे चेकदे। 5 कोइ लू लूङ्सने थरी, हैयाने स मोक्तो त्वोदेबे लू छ्योटोने फीट्टदे। 6 मीया कूम चोर्को रब हम्ब लू आबायू मीयादे ठोकदे, छ मामो नङ्सेमे अन्च्वबदे लू आबायू खरी। 7 कोइ लूब चोपोङ्यू नङ्ने थरी, चो पोङ्यू ठोङ्रदे मेस्ये आबा लूयू उप्कीदे, होर्दे हम्ब आबा लूयूने चैसेये अन्लो। 8 तर कोइ लू स ज्यने थरी, मेस्ये फीत्दे ठोङ्रदेबे सूम्च्यू, सोम्लङ्, मेस्ये सै-गुणा से लोदे।” 9 होर्दे येशूदे यदे, “पो ङ्यीनब मीदे चेलाबे ङ्यीन्स्य।” उखानजे अर्थ 10 कन्छ्वाब येशू तीत्यात्या क्यूत्दे, हन्छ्वाब बाह्र जना स्यूस्स्यायू मेस्ये ङूजे ती-छो ख्यब मीयूदे ङूने हम्ब उखानजे अर्थ लोत्दे। 11 येशूदे थमयूने यदे, “परमेश्वरजे राज्यजे नङ्सू पो नमयूने स्योदे ख्यङ्, मेस्ये फीजे मीयूने उखान पूत्देत्या यीय, 12 येर्बे, “थमयूदे ले ब लेक्क्य, तर तङ्स्ये त्वो, ङीन्क्य, तर चैये अङ्को, नत्र थमयूदे पश्चात्ताप चे ख्यङ्दे, मेस्ये थमयूजे पाप क्षमा क्यूर ख्यङ्दे।” 13 येशूदे थमयूने यदे, “नमयूदे अम्ब उखानजे अर्थ अङ्क्व? होरेयलो सूजो उखानजे अर्थयू केर्बे कोय? 14 लू थर यब परमेश्वरजे वचन स्य्वेब ख्यङ्। 15 कोइ मीयू लम्ने थरेब लू प्र ख्यङ्। थमयूदे परमेश्वरजे वचन ङ्यीन्क्य, होर्दे खात्याने शैतान रीय, मेस्ये थमयूदे ङ्यीनब वचन थमयूजे सेम्ने यीस्से अम्पीन्लाबे क्योङ् यल्गस्ये पीन्क्य। 16 होरप्रने लूङ्सने थरेब लूयूदे येर मीयूने तन्क्य, सूदे परमेश्वरजे वचन ङ्यीन्क्य ङ्यीन ङ्येदे खात्याने सूग्देबे सेम्ने येक्क्य। 17 तर थमयूजे छ बोल्यो अन्च्वबदे तेदिनत्या टूङ्क्य। परमेश्वरजे वचन मन्देब यदेबे सतनम् या सकस् रब बीलने थमयूदे छ्योटोने विश्वास चेब क्यापीय। 18 चो पोङ्जे अन्द्रने थरेब लू अम्ब ख्यङ्, मीयूदे परमेश्वरजे वचन ङ्यीन्क्य, 19 तर अम्ब संसारजे सूर्त, नोर्जे लोभ मेस्ये सूजो सेयू प्रेब लोभ, येरप्र पोयू सेम्ने रदेबे परमेश्वरजे वचनने येल्गसे पीन्क्य, मेस्ये थमयूदे चैत्याये चे अङ्खू। 20 मेस्ये स ज्यने थरेब लूदे येर मीयूने तन्क्य, अम्बदे परमेश्वरजे वचन ङ्यीन्देबे सेम्ने चेलाबे हीन्देबे सूम्च्यू, सोम्लङ् मेस्ये सैत्या सेमे से पीन्क्य।” सामदान फ्याने बत्ती 21 येशूदे थमयूने यदे, “बत्ती नेन्देबे टोलोदे उप्देबे या खर् नङ्ने येस्ये यदेबे कीम् नङ्ने रेक्क्या स्व? क्वादेने चेलाबे तङ्स्य यदेबे बत्ती सामदान फ्याने येनजे लागि ते स्व? 22 येर्बेने नङ्सूने हीदेब साप्ता पोयू ख्यङ्, हम्ब क्वाने फीने तन्क्य, मेस्ये कम्ब पो क्व अन्ख्व ख्य हम्ब पोयू क्वाने क्व खूइय। 23 पो ङ्यीनब मीदे चेलाबे ङ्यीन्स्य।” 24 ङूदे थमयूने यदे, “नमयूदे च त ख्यङ्, हम्ब पोने चेलाबे ङ्यीन्। चेनेयलो नदे कम्ब टोलोदे तप्दे पीन्क्य होरप्रने तप्देबे नने हम्ब यली बेस्से थेप् पीन्क्य। 25 चेनेयलो सूप्रे कूम ख्यङ् हम्बने पीन्क्य, मेस्ये सूप्रे छीत्या ख्यङ् हम्बप्रे तेते ख्यबये लेन्कीय।” ठोङब लूजे उखान 26 येशूदे यदे, “परमेश्वरजे राज्य येर ख्यङ्, मी त्यादे रङ्ने लू थर्क्य, 27 मेस्ये हम्ब मी ङ्यूम्लीने, अन्-ङयूम्लीने नोमून् हम्ब फेब लू आबा ठोङ्रीय, मेस्ये हम्ब पोङ् केरे ठोङ्रीय, ङूदे था अम्प्रे। 28 स रङ्सेदेने लू फीस्स्ये पीन्क्य, खूम् आबा क्यूट्टीय, होर्देङ्येदे ठोङ्देबे से ट योङ्रीय, होर्दे हम्ब टने से ल चङ्रीय। 29 तर कन्छ्वाब से ताय, हन्छ्वाबने ङूदे ताब से थ्व मेय, चेनेयलो बली तोल बील क्यूट्ट ख्यङ्।” रोयो लूजे उखान मत्ती १३:३१-३२ ; लूका १३:१८-१९ 30 येशूदे फेरि यदे, “परमेश्वरजे राज्य चेप्रे कर स्व? या कम्ब उखान पूत्देबे कोलाबे चीम्मे? 31 अम्ब लू रोयोजे लप्र ख्यङ्, अम्ब लू सने थर्क्य। पृथ्वीने ख्यब लूयूनङ्ने अम्बजे लू पात्ता चीद ख्यङ्। 32 तेदिन ङ्येदे हम्ब लू फीत्दे ठोङ्रीय, मेस्ये सूजो सूगब लूजे पोङ्यूयली हम्ब केन् क्यूत्देबे फेर क्यूक्क्य, होर्दे हाँगायू केन् केन् योङ्रीय, मेस्ये मूने स्यूनब ययूदे हम्बजे हाँगायूने चङ् बन्दीय।” 33 थमयूदे क्व खूदासेमे येशूदे होरप्रने कूम उखानयू पूत्देबे थमयूने परमेश्वरजे वचन स्योत्दे। 34 उखान अम्पूल्लाबे ङूदे थमयूप्रे अन्क्यम्, तर रङ्सेजे स्यूस्स्यायूने ङूदे नङ्सूने उखानयूजे अर्थ क्वाने येमीदे। येशूदे हून्ड थम्दीबीदे मत्ती ८:१८ , २३-२७ ; लूका ८:२२-२५ 35 हम्ब दिनने नूस्यूङ्लाबे येशूदे स्यूस्स्यायूने यदे, “ख, ङीन तीप्ल्या प्रे।” 36 मी हुल पोङ्गीदेबे स्यूस्स्यायू येशू टूनब डुङ्गाने टदे होर्दे येशूने टेल्देबे तीप्ल्या प्रमेदे। सूजो डुङ्गायूये येशू ट्याने ख्य। 37 होर्दे हैयाने सोरो केन् उन्दू रदे, मेस्ये क्यूजे छल्दे डुङ्गाने ठरीरदे, अन्छ्वासेमे ठरीदे यी डुङ्गा क्यूदे फ्याब मल्गीदे। 38 हम्ब बीलने येशू डुङ्गाजे ङ्यलम्देयोर् टूपूङ्त्या पूत्देबे ङ्यूम्न ख्य। थमयूदे येरे यदेबे ङूने लङ्दे, “गुरुज्यू, ङीन क्यूनङ्ने नूम्ब मल्गीदी नने चेये सूर्त त्वा?” 39 येशू ङ्यूम्यादे थेल्रदे, मेस्ये उन्दूने फ्राचीदे, मेस्ये समुद्रजे छालयूने यदे, “अन्चील्लीलाची! थम्दीब!” होर्दे उन्दू थम्दीयी, मेस्ये हैयाने सोरो याङ्यूङ् क्यूत्दे। 40 येशूदे थमयूने यदे, “नमयूने विश्वास त्वा?” 41 थमयू बेस्से फैगदे मेस्ये त्यादे त्याने यमेदे, “ङू सू टोङ्? उन्दू मेस्ये समुद्रदेये ङूजे हुकुम मन्दे।” |
Ghale New Testament © Nepal Bible Society, 2011.
Nepal Bible Society