मत्ती 27 - घले नयाँ करारयहूदा इस्करियोत सीयेब लूका २३:१-५ , १३-२५ ; यूहन्ना १८:२८-३८ 1 नप्मून्देने, केन् पूस्र्यायू क्वाने मेस्ये मीयूजे धर्म-गुरुयूदे येशूने सेजे लागि मोतो चीत्दे। 2 होर्दे थमयूदे येशूने ख्यादेबे कूदीदे, मेस्ये हाकिम पिलातस ट्याने सूम्दीपीदे। 3 कन्छ्वाब येशूने चूङ्स्ये पीनब यहूदादे येशूफ्याने दण्डजे आज्ञा पीनब तङ्देबे पश्चात्ताप चीत्दे, मेस्ये केन् पूस्र्यायू मेस्ये धर्म-गुरुयूने चाँदीजे मन्द्रामूली सूम्च्यू ल्वाने रेत्दे, 4 होर्दे यदे, “ङैदे दोष त्वब मीने चूङ्से पीन्देबे पाप चीक्क ख्यङ्।” तर थमयूदे यदे, “अम्बजे ङीने चे मतलब? न रङ्सेदेने स्ये।” 5 होरदे यहूदादे हम्ब चाँदीजे नोर्यू मन्दिरने छाबीदेबे ङू गीलीदे, मेस्ये ङू गीलीदेबे पील्दे मेस्ये रङ्सेने सेत्दे। 6 तर केन् पूस्र्यायूदे हम्ब चाँदीजे मन्द्रमूली थादेबे यदे, “अम्ब मन्द्रमूली ढूकूटीने येब ज्य अन्क्यूर् चेनेयलो अम्ब काजे लू ख्यङ्।” 7 थमयूदे मोतो चीत्देबे हम्ब मन्द्रमूलीदे फीदेशजे मीयूने पोपजे लागि कुमालेजे स कीन्दे। 8 येरेक्यूत्देबे दीनीसेमेने हम्ब सने काजे स यदेबे येन ख्यङ्। 9 हन्छ्वा बीलने यर्मिया अगमवक्तादे येयेब पो पूरा क्यूत्दे, “इस्राएलजे मीयूदे ङूजे लू यदेबे तोक्दीयेब चाँदीजे मन्द्रामूली सूम्च्यू थमयूदे तादे, 10 मेस्ये परमप्रभुदे ङैने आज्ञा पीन अनुसार हम्ब मन्द्रमूली थमयूदे कुमालेजे सजे लागि पीन्दे।” 11 येशू हाकिमजे खूम्दे मेर्दे, मेस्ये ङूदे येशूने लोत्दे, “न यहूदीयूजे मूरुम् औ?” येशूदे जवाफ पीन्दे, “अ, नदेने होरे येन ख्यङ्।” 12 होर्दे केन् पूस्र्यायूप्रे धर्म-गुरुयूदे येशूने दोष चीत्दे, तर येशूदे चैत्याये जवाफ अम्पीन्। 13 होर्दे पिलातसदे येशूने लोत्दे, “थमयूदे नैजे विरुद्धने कूम पोयूजे गवाही पीन ख्यङ्, च नदे अन्त?” 14 तर येशूदे ङूने चैपोजेये जवाफ अम्पीनब तङ्देबे हाकिम सोरो हार्मन्दीकदे। 15 निस्तारजे दीन्बरने मीहुलजे इच्छा अनुसार हाकिमदे झ्यालखानने ख्यब मीत्याने क्याबेब छ्यप् ख्य। 16 हम्ब बीलने थमयूप्रे अन्ज्य कामने मीन् चील्लेब बारब्बा यब कैदी त्या ख्य। 17 कन्छ्वाब मीहुल फूङ् क्यूत्दे, पिलातसदे थमयूने लोत्दे, “नमयू च चैते? ङैदे नमयूजे लागि सू क्याबे? बारब्बा यी ख्रीष्ट यब येशूने?” 18 चेनेयलो थमयूदे येशूने म्यातब चीत्देबे सूम्देबेने रे ख्यङ् यब ङूने था ख्य। 19 होर्दे न्याय चेने टूङब बीलने ङूजे मजदे येरे यदेबे खबर चङ्पीदे, “हम्ब दोष त्वब मीने चैत्याये अन्चील्लाची, चेनेयलो दीनी ङैदे मोङ्ने ङूदे कूम सकस् भोक्तीनब तङ्देबे ङ सोरो अन्सूग्।” 20 तर केन् पूस्र्यायू मेस्ये धर्म गुरुयूदेब येशूने से, बारब्बानेब क्यापी यदेबे मीजे हुलने तोप्लेत्देबे यस्ये पीन्दे। 21 हाकिमदे फेरि थमयूने लोत्दे, “तम्दम्ने य अम्ब ङ्हीनङ्ने कम्बने क्याबे?” थमयूदे “बारब्बाने क्यापी” यदेबे पारा पूत्दे। 22 होर्दे पिलातसदे थमयूने फेरि लोत्दे, “होरेयलो ख्रीष्ट यब येशूने केर्चे?” “ङूने क्रूसने पील्बी!” यदेबे थमयू क्वादेने पारा पूत्दे। 23 ङूदे लोत्दे, “चैने? ङूदे च अपराध चीक्क ख्यङ्?” तर थमयूदे के केन् योन्देबे यदे, “येशू क्रूसने खील् ठोक्दीदेबे पील्बी!” 24 येरेक्यूत्देबे पिलातसदे रङ्सेजे चैसीप्ये अन्लादे तङ्देबे, बरू झन् थेप् खैलाबैला मच्दीबीइच यदेबे ङूदे क्यू टेल्देबे मी हुलजे खूम्ने रङ्से ला ठूदेबे यदे, “अम्ब मीने सेब दोष ङैने दी, तर नमयूने लादीस्य।” 25 थमयूदे क्यूक्क्य यदेबे पारा पूत्देबे, “ङूने सेबजे दोष ङी मेस्ये ङीजे च-चीमीफ्याने पर्दीस्य।” 26 होर्दे पिलातसदे थमयूजे लागि बारब्बाने क्यापीदे, तर येशूने कोर्रा लैदीदेबे क्रूसने खील् ठोक्दीदेबे पीलने सूम्दीपीदे। येशूने ह्यल चेब मर्कूस १५:१६-२० ; यूहन्ना १९:२-३ 27 होर्दे पिलातसजे सिपाईयूदे येशूने हाकिमजे दरबारने कूदीदे, मेस्ये टक्क पल्टन्ने ङूजे खूम्ने रूप् पूत्दे। 28 थमयूदे येशूजे कोला प्यङ्देबे ङूने मूरुम्जे प्र मल्लम रङ्जे कोला होम्मीदे। 29 थमयूदे च्वोजे मुकुट तादेबे येशूजे टने कूमीदे। येशूजे स्येत् लाने म्याजे पीर्ग टेल्स्ये पीन्दे, मेस्ये येशूजे खूम्दे पूजी चोदेबे ङूने येरे न पूत्देबे यदे, “यहूदीयूजे मूरुम्ने नमस्कार” 30 होर्दे थमयूदे येशूने छ्योम थर्दे, मेस्ये हम्ब म्याजे पीर्ग लेन्देबे येशूजे टने ठरीदे। 31 येशूजे न प्वे चेनमेस्ये मल्लम् कोला प्यङ्बीदेबे ङूजे रङ्से कोला होम्मीदे। होर्देङ्येदे थमयूदे येशूने क्रूसने खील् ठोक्दीदे पीलने स्योल्गीदे। येशू क्रूसने मर्कूस १५:२१-३२ ; लूका २३:२६-४३ ; यूहन्ना १९:१७-२७ 32 लम्ने प्रेनूब सिमोन यब कुरेनीजे मीत्या तूदे, मेस्ये थमयूदे ङूने येशूजे क्रूस प्ल्ये यदेबे कर् चङ्दे। 33 कन्छ्वाब थमयू गलगथा यब नेने फ्योरदे, अम्ब नेजे अर्थ ‘ट खोकाजे’ ने यख्य। 34 होर्दे थमयूदे येशूने टे च्यूम्येब अङ्गुरजे ची थूङ्स्ये पीन्दे, तर येशूदे म्यङ्देबे हम्ब अन्थूङ्। 35 थमयूदे येशू क्रूसने खील् ठोक्दीदे पील्बेमेस्ये, ङूजे कोलायू चीट्ठ थादेबे थमयूदे कोत्दे। 36 होर्दे थमयू होने टूङ्देबे येशूजे सीन्त्री टूङ्दे। 37 थमयूदे येशूजे टजे तोलाने, “अम्ब येशू यहूदीयूजे मरूम् ख्यङ्”, यदेबे लिख्दीयेब दोष पत्र खेबीदे। 38 येशूप्रेने डाँकू ङ्ही क्रूसने खील् ठोक्दीदेबे पीले ख्य, त्या येशूजे स्येत्तेयोर् मेस्ये सूजोब योन्देयोर्। 39 हम्ब लम् क्यूत्देबे प्रब मीयूदे रङ्सेजे ट लीङ्देबे येशूजे न पूत्देबे खिसी चीत्दे, 40 मेस्ये यदे, “ओ मन्दिर हूल्देबे सोम्म्याने थ्याब, कादेये न परमेश्वरजे च यलो, रङ्सेने बच्दी, मेस्ये क्रूसदे मो तल्ख।” 41 येर्बेने पूस्र्या केन्यूदेये पन्डेयू मेस्ये धर्म-गुरुयू प्रे-प्रेने ङूजे न पूत्देबे यदे, 42 “अम्बदे सूजो मीनेब बच्दीमीदे, रङ्सेनेब बच्दे अन्खू। अम्ब इस्राएलजे मूरूम् ख्यङ्। चूजो क्रूसदे मो तल्खस्य, मेस्ये ङीनदे ङूने विश्वास चेस्ये। 43 येशूदे परमेश्वरने भर् येख्य। परमेश्वर ङूप्रे सूग ख्यङ्देयलो चूजोने छूर्तीमीस्य, चेनेयलो ङूदे ‘रङ्सेने परमेश्वरजे च’, यदेबे य ख्य।” 44 होर्दे येशूप्रे क्रूसने खील् ठोक्दीदे पीलेब हम्ब डाँकूयूदेये होरप्रने येशूजे न पूत्दे। येशू सीयेब मर्कूस १५:३३-४१ ; लूका २३:४४-४९ ; यूहन्ना १९:२८-३० 45 नोगूङ्मेस्ये नूस्यूङ्ला सोम् तप्रब का-मुलुकने मून्दूङ् क्यूत्दे। 46 घडीने सोम् तप्रब येशू येरे यदेबे के केन् योन्देबे पारा पूत्दे, “इलोई, इलोई, लामा सबखथनी?” अम्बजे अर्थ, ओ ङैजे परमेश्वर, ओ ङैजे परमेश्वर, नदे ङैने चेने पोङ्ये?” 47 येशू येर्बे पारा प्वेब तदेबे हैयाने मेर्नब मीयू नङ्ने कोइ मीयूदे यदे, “अम्ब मीदे एलियाने कोन ख्यङ्!” 48 थमयू नङ्ने मी त्या छ्योङ्गीदेबे कोला त्याने अङ्गुरजे क्यूङ् ची य्वादेबे रेत्दे मेस्ये हम्ब कोला म्याजे टने तोल्देबे येशूने थूङ्स्ये पीन्दे। 49 तर सूजोयूदे यदे, “लेदे, कादेये एलिया ङूने बच्दीमेने रीयी।” 50 होर्दे येशू फेरि के केन् योन्देबे पारा पूत्दे मेस्ये ङूदे दीयो पूत्दे। 51 हन्छ्वाब मन्दिर नङ्ने पूतेब पर्दा टदे मो ट्वासेमे फाच्य ङ्ही क्यूत्देबे प्र्याङ्गी, मेस्ये पृथ्वी लीङ्दे, लूङ् पोलोम्यू फाच्या परी। 52 तूर्सयू स्याइ, मेस्ये कूम सीयेब परमेश्वरजे पवित्र मीयूजे ङ्वयू सोम्बो क्यूत्देबे लङ्दे। 53 होरदे येशू सीइदेबे लङ्रमेस्ये, थमयू तूर्सयूदे योङ्रदेबे पवित्र सहरने गीलीदे मेस्ये कूम मीयू ट्याने रब तङ्दे। 54 कन्छ्वाब कप्तान मेस्ये ङूप्रे येशूने रेत्देबे टूनब मीयूदे सूङ्गू गीलेब मेस्ये होने क्यून्नब घटनायू तङ्दे, हन्छ्वाब सोरो फदेबे थमयूदे यदे, “तम्दम्ने, ङू परमेश्वरजे चने टूङ्।” 55 हैयाने गालीलदे रब मदीयूये कूम ख्य, थमयूदे चीन्तङ्दे अम्ब क्वाने लेन्न ख्य। थमयूदे येशूजे सेवा चीत्देबे गालीलदेमेस्येने ङूजे ङ्ये-ङ्ये रेन ख्य। 56 थमयू नङ्ने मरियम मग्दलिनी, याकूब मेस्ये योसेफजे म मरियम, मेस्ये जब्दियाजे चयूजे म ख्य। येशू खङ्सने पोप्दे मर्कूस १५:४२-४७ ; लूका २३:५०-५६ ; यूहन्ना १९:३८-४२ 57 नूस्यूङ्लाबे योसेफ यब अरिमाथिया सहरजे फ्योबो मीत्या रदे। ङूये येशूजे स्यूस्स्या क्यूर ख्य। 58 ङूदे पिलातस ट्याने गीलीदेबे येशूजे सीयेब ङ्व स्यदे, मेस्ये पिलातसदे हम्ब ङूने पीन् यदेबे हुकुम पीन्दे। 59 योसेफदे सीयेब ङ्व टेल्देबे सफा मल्मल् कोलादे तिल्दे, 60 मेस्ये योसेफदे रङ्सेजे लागि लूङ् पोलोम्ने खोप्तीदेबे बन्दीयेब सर् खङ्सने हम्ब हीत्दे, मेस्ये खङ्सजे लने लूङ् केन् त्या फोल्पीदे, मेस्ये ङू गीलीदे। 61 खङ्सजे खूम्ने मरियम मग्दलिनी मेस्ये सूजोब मरियमये टून ख्य। तूर्सने सीन्त्री टूनब 62 तयारी क्यूरब दिनजे नैदेरेदे पूस्र्या केन्यू होर्दे फरिसीयू पिलातस ट्याने रूप् क्यूत्दे, 63 मेस्ये थमयूदे यदे, ‘‘गुरु, हम्ब ठग्देबदे सोम्बो ख्यङ्ब ‘ङ सोम्म्या ङ्येदे फेरि सोम्बो क्यूत्देबे लङ्रीय’ यदेबे यब पो ङीने याद ख्यङ्। 64 येरेक्यूत्देबे सोम्म्यासेमे हम्ब तूर्स चेलाबे सीन्त्री टूङ यदेबे हुकुम चीम्मी, नत्र ङूजे स्यूस्स्यायू रदेबे हम्ब ङ्व खूदेबे कूबने, मेस्ये ‘हम्ब सीयेब सोम्बो क्यूत्देबे लङ्रो’ यदेबे मीयूने यीय, मेस्ये हम्ब ङ्येदे पीनब धोका खूम्जेयली झन् थेप् अन्ज्य क्यूक्क्य।” 65 पिलातसदे थमयूने यदे, “नमयूप्रे रेनब सीन्त्रीयू ख्यङ्। प्र, नमयूदे खूदासेमे चेलाबे रेन्।” 66 होर्दे थमयू गीलीदेबे खङ्सने उप्येब लूङ् केन्ने लाहजे छाप पूत्दे। मेस्ये सीन्त्रीयू खेर्दीदेबे तूर्सने सूरक्षा हीत्दे। |
Ghale New Testament © Nepal Bible Society, 2011.
Nepal Bible Society