लूका 13 - घले नयाँ करारपश्चाताप या नाश 1 हन्छ्वाबने हैयाने ख्यब मीयूदे गालीलीयूजे बारेने येशूने यदे, “बलि चेर्देब बीलने पिलातसदे गालीलीयूने सेत्दे मेस्ये थमयूजे का हम्ब बलि चेर्देब रोलाजे काप्रे च्यूम्पीदे। 2 होर्दे येशूदे थमयूने जवाफ पीन्दे, “चेनेयलो थमयूदे येर्बे सकस् भोक्तीदे यबने, नमयूदे च मन्न, अम्ब गालीलीयू सूजो कूम गालीलीयू यली थेप् पापी ख्य औ? 3 ङ नमयूने यीय, होरे दी, तर नमयूदे पश्चाताप अन्चीत्देयलो नमयू क्वाने होरप्रने नाश क्यूक्क्य। 4 या नमयू च मैन्न, सिलोआमजे धरहरा हूलीदेबे हम्ब अठार जना सेक्क ख्य, यी थमयू क्वाने यरूशलेमने टूङब मीयू नङ्ने थेप् पापी ख्य औ? 5 होरे दी, तर ङ नमयूने यीय, “नमयूदे पश्चात्ताप अन्चीत्दे यलो, नमयू क्वाने होरप्रने नाश क्यूक्क्य।” 6 होर्देङ्येदे येशूदे अम्ब उखान यदे: “मी त्यादे रङ्से अङ्गुरजे रङ्ने अञ्जीरजे पोङ् त्या सूक्ये ख्य। हम्ब पोङ्ने सी लोदीइच यदेबे ङू रदे, तर त्याये अम्प्रे, 7 होर्दे ङूदे हम्ब रङ्ने काम चेब मीने यदे, ‘वर्ष सोम् क्यूत्दे, ङ अम्ब अङ्गुरजे पोङ्ने सी लोदेयीच यदेबे लेन्नूदे, तर सी अन्लो। होरेक्यूत्देबे सीत्तीने चेने ने उप्से पीन्न? अम्ब तूप्देबे छाबी। 8 “तर हम्ब काम चेब मीदे यदे, ‘अ, अम्ब पोङ्ने अझ वर्ष ताला टूङ्से पीन च, ङ अम्बजे ती-छो खोदेबे मल पूक्क्य, 9 होर्देङ्येदे सी लोलो ज्यने क्यूक्क्य, अन्लोदे यलो नदे हम्बने चैपी’।” आराम-टूङब दिनने तम् चेब काम 10 त्याफे आराम टूङब दिनने सभा-कीम् त्याने येशूदे शिक्षा पीन्न ख्य। 11 अठार वर्षमेस्ये ङ्व नसे पीनब दुष्ट आत्मा लादीकब मदी त्या हैयाने ख्य। ङूजे चीसार गूरे ख्य, मेस्ये ङू चेलाबे रङ्सेदेने चीसार सोझो चे अन्ख्व ख्य। 12 येशूदे ङूने तङ्दे, मेस्ये कोदेबे यदे, “ओ मो, नैजे बीददे न तम् क्यूरे ख्यङ्।” 13 होर्दे येशूदे ङूफ्याने रङ्सेजे ला येत्दे, मेस्ये ङू खात्याने ठडो मेर्दे मेस्ये परमेश्वरजे सार्या चेमेदे। 14 सभा-कीम्जे हुकुम चील्लेब मी छी लङ्दे, चेनेयलो येशूदे ङूने आराम टूङब दिनने तम् चीम्मे ख्य, मेस्ये हम्ब हुकुम चील्लेबदे मीयूने यदे, “काम चेब र्वाया ख्यङ् होरेक्यूत्देबे अम्ब र्वाया दिन नङ्ने रदेबे तम् क्यूर्, आराम टूङब दिनने दी।” 15 तर प्रभुदे ङूने जवाफ पीन्दे, “ओ कप्टीयू! आराम टूङब दिनने नमयू क्वादेने प्रङ् मेस्ये माङ्गादे रङ्से लप् या गधा फादेबे क्यू तूपने अन्कूपया? 16 अब्राहामजे अम्ब चीमी अठार वर्षसेमे शैतानजे बन्धन्ने ख्य, च आराम टूङब दिनने ङू हम्ब बन्धन्दे छुटकारा क्यूर अम्पर्दे या?” 17 येशूदे अम्ब पो क्यमङ्येदे ङूजे विरुद्ध चेब मीयू क्वाने त्वागदे, तर ङूदे चेब महिमा क्यूरब कामयूने मीयू सूग्देबे आनन्द क्यूत्दे। रोयोजे लू मेस्ये खमीरजे उखान 18 होर्दे येशूदे यदे, “परमेश्वरजे राज्य करप्र ख्यङ्? ङ हम्बने चेप्रे तुलना चे स्व? 19 अम्ब रोयो लूजे लत्याप्र ख्यङ्, हम्ब मीत्यादे टेल्कीदेबे रङ्सेजे रङ्ने सूग्दे, मेस्ये हम्ब ठोङ्देबे तङ्बो त्या क्यूत्दे मेस्ये मूजे ययूदे हम्बजे हाँगायूने चङ् बन्तीदे।” 20 फेरि येशूदे यदे, “परमेश्वरजे राज्यने ङ चेप्रे दाँज्दे स्व? 21 हम्ब क्यङ् पूलाबे चेब खमिरप्र ख्यङ्, हम्ब मदी त्यादे नूस्स्यूदे किलो ङ ताने च्यूम्दे, मेस्ये टक्कने खमिरप्र क्यूरी। साँघुरो ख्यो 22 होर्दे येशू सहर-सहर मेस्ये त-तने प्रेये-प्रेये मीयूने शिक्षा पीने पीने यरूशलेम तेले गीलीदे। 23 मीत्यादे येशूने लोत्दे, “प्रभु, उद्धार प्रेयू छीत्या ख्य औ?” तर ङूदे थमयूने यदे, 24 “साँघुरो ख्योदे क्योबने बोङ् ची, चेनेयलो, ङ नमयूने यीय, कूम मी क्योब मैय, तर क्योब खूस्ये त्वो। 25 कीम्नोबो लङ्देबे ख्यो बन्द चीक्क ङ्येदे, नमयू फीने मेर्देबे येरे यदेबे ख्यो ढ्याक्-ढ्याक् चीक्क्य, प्रभु, ङीजे लागिये ख्यो पूक्मी’, तर ङूदे जवाफ पीन्देबे यीय, ‘नमयू केर्दे र ङैदे अन्स्ये।’ 26 “होर्दे नमयू यमेय, ‘ङीदे नैजे खूम्देने च थूङ चीत्दे, होर्दे ङीजे लम्यूने नदे शिक्षा पीनदे।’ 27 “ङूदे यीय, ‘ङ नमयूने यीय, नमयू केर्दे रदे ङ अन्स्ये। दुष्ट काम चेबयू, ङै ट्याने अन्रलाची ती चीन्तङ् प्र।’ 28 होर्दे नमयूदे अब्राहाम, इसहाक, याकूब मेस्ये अगमवक्तायू क्वाने परमेश्वरजे राज्य नङ्ने तङ्क्य, होर्दे नमयू रङ्सेब फीने छायेब क्यूक्क्य, हन्छ्वाब नमयू बेस्से ङूदेबे स गीटीटी चीक्क्य। 29 मीयू पूर्ब मेस्ये पश्चिम, उत्तर मेस्ये दक्षिणदे रदेबे पेरमेश्वरजे राज्यजे भात्यार् चने टूङ्क्य। 30 ले, कोइ ङ्येजे मीयू खूम्दे क्यूप्पीय, मेस्ये खूम्जे मीयूब ङ्येदे क्यूप्पीय।” 31 हम्ब बीलने कोइ-कोइ फरिसीयू रदेबे येशूने यदे, “अन्-यादे योङ्देबे प्र, चेनेयलो हेरोददे नने से मे ख्यङ्।” 32 येशूदे थमयूने यदे, “प्रदेबे हम्ब ओवने य, ले, दीनी मेस्ये नैदे ङ छेत्यू ताल्पीय मेस्ये तम् चेब काम चीक्क्य, होर्दे सोम्म्या दिननेब ङैजे काम पूरा क्यूक्क्य। 33 होरेक्यूल्लीने दीनी-नेदे मेस्ये नङ्नीये ङ प्रेनने पर्दे ख्यङ्, चेनेयलो यरूशलेमजे फीने अगमवक्तायू सूये सीबने अन्खू। यरूशलेमजे लागि येशू अन्सूग्देबे बीगन फाब मत्ती २३:३७-३९ 34 “यरूशलेम, ओ यरूशलेम, नदे अगमवक्तायूने सेक्क्य, मेस्ये ने-ट्याने कूल्बेबयू फ्याने लूङ्दे खान्दीदे! केर्बे कमदे रङ्से काच्यूयूने येन् नङ्ने रूप् पूक्क्य, होरप्रेने कोलाफे ङैदे नैजे पीचयूने येनब इच्छा चीत्दे तर न अन्ङ्यीन्। 35 ले, नैजे कीम् खङ्कर् क्यूरे ख्यङ्। ङ नने यीय, कन्छ्वासेमे नदे ‘परमप्रभुजे मीन्ने रबयूने असी प्रेब ख्यङ् अन्-य,’ होन्छ्वासेमे ङैने तङ्स्ये त्वो।” |
Ghale New Testament © Nepal Bible Society, 2011.
Nepal Bible Society