लूका 10 - घले नयाँ करारसोम्लङ्दे च्यू स्यूस्स्यायू कूल्बेब 1 होर्देङ्येदे प्रभुदे सूजो सोम्लङ्दे च्यू जनाने सेल्दे, मेस्ये ङू प्रमल्नब सहर प्रे तने ङू यली खूम् थमयूने ङ्ही-ङ्ही चीत्देबे कूल्बीदे। 2 येशूदे थमयूने यदे, “रङ्ने सेयू कोलाने यली लोन ख्यङ्, तर रङ्ने काम फरबयू छीत्यात्या ख्यङ्। होरेक्यूत्देबे सेजे प्रभुने प्रार्थना ची, मेस्ये ङूदे रङ्सेजे रङ्ने सै तोलने काम फरबयू कूल्बीस्य। 3 प्र, लेप्प, ङ नमयूने च्यूङ्कूयूजे अन्द्रगूङ्ने ल्वाजे पीच प्र कूल्बीय। 4 नोर्जे थैली अन्टेल्लाची, झ्योल अम्प्लेल्लाची, पङ्गी अन्होल्लाची, लम्ने सूनेये नमस्कार अन्चील्लाची। 5 “कम्ब कीम्ने क्योबीय खूम्ने य ‘अम्ब कीम्ने शान्ति क्यूस्स्य!’ 6 हम्ब कीम्ने शान्ति छेब मी ख्यङ्लो नमयूजे शन्ति ङूप्रे क्यूक्क्य, तर अन्छेब मी ख्यङ्लो हम्ब शन्ति नमयू ट्यानेने ल्वारीय। 7 कम्ब कीम्ने टूङ्क्य हम्ब कीम्जे मीयूदे पीनब सेयू च थूङ चीत्देबे हम्ब कीम्ने टूङ्। चेनेयलो मेला कीनब मीदे ङूजे मेला प्रे पर्देब क्यूक्क्य। कीम्-कीम्ने अङ्क्योबलाबे प्र। 8 “कन्छ्वाब नमयू सहरने क्योबीय, मेस्ये थमयूदे नमयूने स्वागत चीक्क्य, हन्छ्वाब नमयूजे खूम्दे हीम्मेब चसे च, 9 हैयाने ख्यब नवयूने तम् चीम्मी, मेस्ये थमयूने य, परमेश्वरजे राज्य नमयूजे ट्याने फ्योर ख्यङ्।’ 10 तर कन्छ्वाब नमयू कम्ब सहरने क्योबीय, मेस्ये थमयूदे नमयूने स्वागत अन्ची, हन्छ्वाब योङ्देब हम्ब सहरजे लम्यूने प्र, मेस्ये य, 11 ‘ङीजे तोप्ने फ्यङ्नब नमयूजे सहरजे धूलोये ङी नमयूजे विरुद्धने फ्रूप्पीय। होरेक्यूल्लीने अम्ब स्येल्नू, परमेश्वरजे राज्य ट्याने फ्योर ख्यङ्।’ 12 ङ नमयूने यीय, न्यायजे दिनने हम्ब सहरजे मीयूजे हालात यली पापदे फ्यायेब सदोम सहरजे मीयूजे हालात ते-सैदे ख्वब क्यूक्क्य। 13 “धिक्कार नने, खोराजीन! धिक्कार नने, बेथसेदा! चेनेयलो नमयूजे अन्द्रगूङ्ने चेब शक्तिशाली कामयू टुरोसप्रे सिदोनने चेप्र यलो हैयाजे मीयूदे खूम्ने पश्चात्तापजे कोला होत्देबे मील छेल्देबे पश्चात्ताप चे ख्यङ्दे। 14 तर न्यायजे दिनने नमयूजे यली टुरोसप्रे सीदोन सहरजे हालात ते सैदेख्वब क्यूक्क्य। 15 ओ कफर्नहुम, नमयू स्वर्गने फ्योबीय मन औ? नमयू ब पातालने फ्योबीय। 16 “नमयूजे पो ङ्यीनबदे ङैजे पो ङ्यीन्क्य। नमयूजे पो अम्मन्देबदे ङैनेये अम्मन्दी, होर्दे ङैने अम्मन्देबदे ङैने कूल्बेब परमेश्वरनेये अम्मन्दी।” 17 हम्ब सोम्लङ्दे च्यू मीयू तङ्देबे तङे-तङे ल्वारदेबे येरे यदे, “प्रभुज्यू, नैजे मीन्ने छेत्यूये ङीदे यब पो ङ्यीन्देबे गीली।” 18 ङूदे थमयूने यदे, “ङैदे शैतानने स्वर्गदे बिजूलीप्र तल्लीनब तङ्दे। 19 ङैदे थमयूने र्वेप्रे बिच्छीयू तोप्दे छ्यब मेस्ये शत्रुजे पूरा शक्ति फ्याने हक पीन ख्यङ्, मेस्ये चैपोदेये नमयूने हानी चीस्येत्वो। 20 होरेक्यूल्ली, अन्ज्य आत्मायू नमयूजे लाने ख्यङ् यदेबे सूग दी, तर नमयूजे मीन् स्वर्गने लिख्दीये ख्यङ् यदेबेत्या सूग्।” 21 हन्छ्वाबने पवित्र आत्माने येशू सूग्देबे यदे, “ओ पाइ, स्वर्ग प्रे पृथ्वीजे परमप्रभु, ङ नने धन्यवाद पीन्क्य, चेनेयलो नदे अम्ब पो बुद्धिमान मेस्ये टाठो-बाठोयूप्रे फूदेबे येत्दे मेस्ये नदे चैत्याये अन्स्येब पीचयूने स्येलाबे चीम्मीदे। चेनेयलो, पाइ नदे अम्बने ज्य थेदे। 22 “ङैजे पदे साप्ताकूरूने ङैने सूम्दीये ख्यङ्। च सू यदेबे पदेत्या स्ये ख्यङ्, सूजो सूदेये अन्स्ये। होरप्रने प सू यदेबे चदे त्या स्ये ख्यङ् सूजो सूदेये अन्स्ये, मेस्ये चदे सूने तनब सेम् चीक्क्य, ङूदेत्यामे सूजो सूदेये अन्स्ये।” 23 स्यूस्स्यायूतेले ल्वादेबे ङूदे थमयूने नङ्सू यदे, “नमयूदे तङब अम्ब पोयू सूदे तङ्क्य, हम्ब म्यादे असी प्रेक्क्य। 24 चेनेयलो ङ नमयूने यीय, कूम अगमवक्तायू मेस्ये मूरुम्यूदे नमयूदे च तङ्दे, हम्ब तङब सेम् चे ख्यङ्, तर अन्तङ्, मेस्ये च नमयूदे त ख्य, हम्ब तब सेम् चे ख्य, तर त अम्प्रे।” ज्य सामरीजे उखान 25 मोशाजे नियमजे पन्डे त्यादे येशूने जाँच चेने मेर्दे, मेस्ये अम्ब पो लोत्दे, “गुरुज्यू, कलङ्बेये अन्सीबब जीया-प्रेजे लागि ङैदे च चे पर्दे?” 26 ङूदे ङूने यदे, “मोशाजे नियमने लिख्दीयेब नदे छ्योत्दा?” 27 ङूदे यदे, “नदे परमप्रभु रङ्सेजे परमेश्वरने रङ्सेजे पूरा सेम्दे, पूरा प्राणदे, पूरा बुद्धिदे मेस्ये पूरा सेम्दे प्रेम ची, मेस्ये रङ्सेजे खीम्चेने न रङ्सेनेप्रने प्रेम ची।” 28 ङूदे ङूने यदे, “नदे ठीक जवाफ पीन्दे। हेरने ची, मेस्ये न बच्दीय।” 29 तर ङूदे रङ्से धर्मी मी यदेबे तनब सेम् चीत्देबे येशूने यदे, “ङैजे खीम्चे ब सू ख्यङ् स्व?” 30 येशूदे जवाफ पीन्दे, “मीत्या यरूशलेमदे यरीहोतेले प्रेन ख्य। ङूने डाँकूयूदे तूगदे। थमयूदे ङूने च्यङ्ली चीत्देबे ठरीदेबे आत्या-काल्च्या चीदेबे पोङ्यीदे। 31 जोमीसोदे पूस्र्या त्या हम्ब लम्दे प्रेन ख्य, मेस्ये हम्ब आत्या-काल्च्या चीतेब मी तङ्देबे ङू पारत्या लम्दे गीली। 32 होरप्रने लेवीत्याये हम्ब नेने फ्योरब हम्ब आत्या-काल्च्या चीतेब मी तङ्देबे पार्त्या लम्दे गीली। 33 तर सामरी त्या लम्ने प्रेनूब हम्ब मी ख्यब नेने फ्योरदे, मेस्ये ङूने तङ्देबे ङूजे सेम् सोरो ठोदे। 34 मेस्ये ङू ट्याने गीलीदेबे मूर्कू मेस्ये अङ्गुरजे ची छेल्देबे ङूजे मयूने पट्टी ख्यामीदे, मेस्ये रङ्सेजे गधा फ्याने प्लेत्देबे ठाँटी त्याने रेत्देबे ङूजे सूसार चीत्दे। 35 नैदेरेदे ङूदे चाँदीजे मान्द्रामूली ङ्ही हम्ब ठाँटीजे मालिकने पीन्देबे यदे, ‘ङूजे सूसार ची, मेस्ये सूजो थेप् खर्च लादीलो ङ ल्वारब नने फाय’।” 36 येशूदे लोत्दे, “नैजे विचारने अम्ब थर सोम्जे मीयू नङ्ने, डाँकूयूजे लाने परदेब मीजे खीम्चे कम्ब ठर्दीय?” 37 ङूदे यदे, “हम्ब मी फ्याने दया चेब मी।” होर्दे येशूदे ङूने यदे, “प्र, नदेये होरप्रने ची।” मार्था मेस्ये मरियमजे कीम्ने 38 थमयू प्रेनूब ङू तत्याने क्योइदे, मेस्ये मार्था मीन् चेब मदीत्यादे ङूने रङ्से कीम्ने स्वागत चीत्दे। 39 मरियम मीन् चेब ङूजे च्योन् त्या ख्य। ङू येशूजे तोप् ट्याने टूङ्देबे ङूजे वचन ङ्यीन्न ख्य। 40 तर मार्था सेवा चेब कामयू कूम ङूदेत्या चे पर्दीदेबे येशू ट्याने रदेबे यदे, “प्रभुज्यू, ङैजे च्योन्दे सेवा चेब कामने ङैने त्या चीस्स्ये पीन् ख्यङ्, नदे ख्याल अन्चे? ङूने येमी मेस्ये ङूदे ङैने साक्तीमीस्य।” 41 तर येशूदे जवाफ पीन्देबे ङूने यदे, “मार्था, मार्था, न कूम पोजे बारेने सूर्त चीत्देबे सेम् मङ्न ख्यङ्। 42 तर चैतेब पो तीत्यात्या ख्यङ्, हम्ब ज्य पो मरियमदे सेल ख्यङ्, हम्ब ङूट्यादे लेन्कीस्ये त्वो।” |
Ghale New Testament © Nepal Bible Society, 2011.
Nepal Bible Society