हिब्रू 8 - घले नयाँ करारसर् करारजे पात्ता केन् पूस्र्या 1 जेम्से ङीदे यमेब पो अम्बने ख्यङ्: ङीनजे येर पात्ता केन् पूस्र्या ख्यङ्, ङूब स्वर्गने टूङब पात्ता केन् परमेश्वजे सिंहासनजे स्येत्देयोर्ने देन् छ्यान ख्यङ्। 2 मीदे चीदेब नेने दी, तर परमप्रभूदे चीदेब पवित्र नेने, परमप्रभु टूङब तम्दम्जे पाल-कीम्ने पात्ता केन् पूस्र्या क्यूत्देबे काम फर्क्य। 3 चेनेयलो भेटी मेस्ये बलि चेर्तेजे लागि पात्ता केन् पूस्र्यायूने सेलब क्यूक्क्य। येरेक्यूत्देबे अम्ब पात्ता केन् पूस्र्याप्रेये बलि चेर्तेजे लागि चत्यासे क्यूर पर्तीय। 4 कादेये ङू अम्ब पृथ्वीवीने टूनूदेयलो ङू पूस्र्या अन्क्यूर ख्यङ्दे, चेनेयलो मोशाजे नियम अनुसार भेटी चेर्देब पूस्र्यायू ब ख्यने ख्यङ्। 5 थमयूदे स्वर्गने ख्यब पवित्र नेजे के-थादेबे होने चेप्र सेवा अनेये चीक्क्य, चेनेयलो मोशादे पवित्र पाल-कीम् बन्दे-मेल्नूब परमेश्वरदे येर आज्ञा मोशाने पीन्दे, “नने ङैदे गङ्ने तम्मेब नमूना अनुसार नदे साप्ताने बन्दी।” 6 तर येशूने पीनेब पूस्र्याजे काम थमयूदे चेब यली सोरो थेप् केन् ख्यङ्, होरप्रने परमेश्वरप्रे मीयूजे अन्द्रने येशूदे चजो-पजो चेब सर् करार मालाङ्जे ङीङ् करार यली सोरो थेप् केन् ख्यङ्, चेनेयलो अम्ब करारने थेप् ज्य पोयू चीम्मीय यब कबुल चीदेख्यङ्। 7 चेनेयलो खूम्जे करार खोट् त्वब ख्य यलो ङ्हीफे करारजे हर्जो अन्क्यूर ख्यङ्दे। 8 चेनेयलो परमेश्वरदे हम्ब मीयूजे दोष तन्देबे य ख्यङ्, “परमप्रभूदे हम्ब दिन रीय य ख्यङ्, हन्छ्वाब इस्राएलजे मीयूप्रे मेस्ये यहूदाजे मीयूप्रे ङ सर् करार त्या चीक्क्य। 9 हम्ब करार ङैदे थमयूजे मेमेयूप्रे चेब करारप्र क्यूस्स्ये त्वो, कन्छ्वाब ङैदे थमयूजे लाने चूङ्देबे मीश्रदेशदे योन्डे ख्य, तर थमयू ङैदे चेब करारने भर् पर्ते ख्वब क्यूत्देबे अन्टूनू, होरेक्यूत्देबे ङैदे थमयूजे इच्छा अनुसार क्यापीदे, परमप्रभू य ख्यङ्। 10 हम्ब दिनङ्येदे ङ इस्राएलजे मीयूप्रे अम्ब करार चीक्क्य यदेब परमप्रभू य ख्यङ्, ङैजे नियम थमयूजे सेम्ने येम्मीय, मेस्ये हम्ब नियम थमयूजे सेम्नेये लिख्दीमीय। ङ थमयूजे परमेश्वर क्यूक्क्य, होर्दे थमयू ङैजे मीयू क्यूक्क्य। 11 ‘परमप्रभूने स्ये खूस्य’ यदेबे जेम्सेमेस्ये सूमीदेये रङ्से खीम्चेने या रङ्से अत अची च्योन्यूने लोम्मीस्ये त्वो। चेनेयलो चीददेमेस्ये केन्सेमे क्वादेने ङैने स्येय। 12 थमयूदे चीक्कब दुष्ट कामयू क्वाने ङैदे क्षमा पीन्क्य, मेस्ये थमयूजे पापयू ङ फेरि कलङ्बेये ह्वे अन्ची।” 13 अम्ब करारने ङूदे ‘‘सर्’’ यदे, होरेक्यूत्देबे खूम्जे करार ङीङ् क्यूत्दे। हम्बब ङीङ् क्यूत्देबे थङ्न क्यूप्पीय मेस्ये मल्बीय। |
Ghale New Testament © Nepal Bible Society, 2011.
Nepal Bible Society