हिब्रू 6 - घले नयाँ करार1 येरेक्यूत्देबे ख्रीष्टजे बारेने खूम्ने ते-ते लोम्कब शिक्षायूने पोङ्ङ्यीदेबे तम्दम् पो मेस्ये लूच्च पोयू छूर्दे ख्वब पाको मीप्र क्यूरे। कालजे ङूरने सब ब कामयू अम्फर्लाबे पश्चात्ताप चेब मेस्ये परमेश्वरने विश्वास चेब खूम्जे पोयूनेत्यामे फेरि लादीन दी। 2 थर्-थर् बप्तिस्माजे बारेने लोम्मेब पोयू, मी फ्याने ला येब कामयू, सीयेबयू सोम्बो क्यूत्देबे लङ्क्य यब मेस्ये कलङ्बेये अन्जेनब दण्ड प्रेब पोयूने त्यामे फेरि लादीन दी। 3 कादेये परमेश्वरदे चीस्स्ये पीन्देयलो ङीनदे अम्ब पोयू चेस्ये। 4 चेनेयलो थमयू, सू-सूदे त्याफे परमेश्वरजे ओथ्याङ् प्रेत्देबे स्वर्गजे बर कर क्यूर ख्य यदेबे था प्रेत्दे, मेस्ये पवित्र आत्माजे भा प्रेक्क ख्यङ्, 5 मेस्ये परमेश्वरजे वचन सोरो थेप् ज्य ख्यङ् यदेबे था प्रेख्यङ्, होरदे रब जूक्ने परमेश्वरजे शक्ति कर क्यूक्क्य यदेबेये था प्रेख्यङ्, 6 होर्दे ङ्येदेये विश्वास अन्चे क्यूत्देबे परमेश्वर ट्यादे चीन्तङ् क्यूप्पदेयलो थमयूने पश्चात्ताप चीस्स्ये पीन्देबे फेरि ल्वारेने अङ्खू। चेनेयलो थमयूदे रङ्सेजे लागि परमेश्वरजे चने फेरि खील् ठोक्दीदे क्रूसने पील्क्य, मेस्ये क्वाजे खूम्ने ङूजे न-पूक्क्य। 7 कम्ब रङ्दे रङ्से फ्याने येतार्ने रब झीरी-क्यू ङप्क्य, मेस्ये होने खेती चेब मीयूजे लागि हर्जो क्यून्नब से-लोसे पीन्क्य, हम्ब रङ्दे परमेश्वरजे असी प्रेक्क्य। 8 तर हम्ब रङ्दे चोयू मेस्ये सिऊँडीयू फीट्टस्ये पीन्देयलो हम्ब रङ् चैकम्ते क्यूक्क्य, मेस्ये परमेश्वरदे पीनब श्राप हम्ब रङ्ने पर्ते खूइय। आखिरीने हम्बने मी-नैन्देबे नाश चीक्क्य। 9 छेब ख्योन्यू, ङीदे येर क्यम्लीने नमयूजे बारेनेब ज्य पो चे ख्यङ्। मुक्ति प्रेत्देबे नमयूदे सोरो थेप् ज्य असीजे पोयू प्रेक्क्य यब पो ङीने पक्क ख्यङ्, 10 परमेश्वरदे अन्न्याय अन्ची, मेस्ये ङूजे लागि नमयूदे चेब काम मेस्ये ङूजे मीयूने माया चेब पो परमेश्वरदे कलङ्बेये अन्-येल्। येरप्र काम नमयूदे दीनीये चीन्न ख्यङ्। 11 नमयू क्वादेने चीन्नब आशा क्वाने अम्प्रेत्दा होरप्रने कामयू जीया ख्यङ्दासेमे चीन्नू यदेबे ङी इच्छा चीक्क्य। 12 नमयू सोरो म्यास्सी क्यून्नब ङीने सेम् अम्पर्ती, तर सूदे विश्वास चीत्दे मेस्ये धेरेन् क्यूत्देबे कबुल चीतेब सेयू प्रेत्दे, हम्ब मीयूदे चेप्रने नमयूदेये चीदो। परमेश्वरदे चेब पक्क कबुल 13 परमेश्वरदे अब्राहामप्रे कबुल चीप्प कसम चजे लागि रङ्सेयली थेप् केन् सूजो सूत्याये त्वोदेबे परमेश्वरदे रङ्सेजे मीन्ने येरे यदेबे कसम चदे, 14 “तम्दम्ने, ङ नने असी पीन्क्य मेस्ये नैजे छगूम्-पूर्गूम् कूम चीम्मीय।” 15 येरे धेरेन् क्यूत्देबे अब्राहामदे रेन्दे मेस्ये परमेश्वरदे चेब कबुल अनुसार ङूदे प्रेत्दे। 16 मीयूदे रङ्सेयली केन् मीजे मीन्ने कसम चीय, मेस्ये थमयूजे स्वाल्-जवाफजे पोयू कसम चदेबेने पक्क चीक्क्य। 17 परमेश्वरदे पीनब कबुल प्रेबमीयूने ङू रङ्सेदे चेब कबुल अनुसारने पक्क पीन्क्य यब पो तनब सेम् चीत्दे, ङूदे हम्ब पोने कसम चदेबेने पक्क चीत्दे। 18 परमेश्वरदे चेब कबुल मेस्ये ङूदे कसम चदेबे यब पो पक्क क्यूक्क्य, परमेश्वरदे अम्ब पो ङ्हीने लूच्च अन्क्यम्। होरेक्यूत्देबे परमेश्वर ट्याने सुरक्षा प्रेने प्रब ङीनयूदे, ङीन्जे खूम्ने हीतेब आशा प्रेने सोरो कूम आँट प्रेख्यङ्। 19 ङीन्जे आत्माजे लागि अम्ब सोरो बोल्यो मेस्ये जूक्तीमेब लङ्गरजे रूप्ने आशा ङीनप्रे ख्यङ्। अम्बदे पर्दा नङ्ने ख्यब परमेश्वरजे पवित्र नेसेमे सबीय। 20 होयाने ङीनयली खूम्ने गीलेब येशू ङीनजे तर्फदे मल्कीसेदेकजे गज्ज्य अनुसार येशू पात्ता केन् पूस्र्या क्यूत्देबे क्योइक ख्यङ्। |
Ghale New Testament © Nepal Bible Society, 2011.
Nepal Bible Society