हिब्रू 13 - घले नयाँ करारआखिरीजे अर्ती 1 नमयू अत-अची च्योन्यूप्र क्यूत्देबे त्यादे त्याप्रे प्रेम चीन्नू। 2 फीदेशजे मीयू ङ्योव क्यूत्देबे रब गेसेन् चीत्देबे येने अन्-येल्गलाची, चेनेयलो येर्बेने कोइ कोइदे थाने अम्प्रेल्लाबे स्वर्गदूतयूजे सेवा चीक्क ख्यङ्। 3 रङ्सेये कैदने पर्तीकप्र मन्देबे हम्ब कैदने पर्दीकबयूजे ख्याल् ची, मेस्ये रङ्सेदेये दु:ख प्रेन्न ख्यङ् मन्देबे हम्ब सतनम् प्रेन्नबयूनेये ह्वे ची। 4 मी क्वादेने ङ्येन्जे पोने गेसेन् चेब क्यूर् पर्दीय, प्लङ्-मजदे त्याने त्यादे विश्वास चेख्वब क्यूस्स्य, चेनेयलो छाडा क्यूत्देबे प्रब मेस्ये वेश्य काम चेयूजे न्याय परमेश्वरदे चीक्क्य। 5 नमयूजे जीयाने धन-सम्पत्तिजे लोभ अन्चील्लाची। नमयूप्रे ख्यब सेयूने सून्ताकी क्यूर्, चेनेयलो ङूदे य ख्यङ्, “ङ नमयूने कलङ्बेये अम्पोङ्गी, ङ नमयूने पोङ्गीस्ये त्वो।” 6 येरेक्यूत्देबे ढूक्क क्यूत्देबे ङी यीय, “ङैने तोङ्मेब प्रभु ख्यङ्, मेस्ये ङ अम्फ। मीदे ङैने च-चे खूइय?” 7 नमयूदे रङ्से अगुवायूने ह्वे ची। थमयूदे केरे जीया चदे मेस्ये केरे सीइदे हम्ब ह्वे ची, होर्दे थमयूदे चेप्र विश्वास नमयूदेये ची। 8 येशू ख्रीष्ट मूरू, दीनी मेस्ये कलङ्नेयली त्याप्रने क्यून्नीय। 9 थर्-थर्जे मेस्ये नोङ्ल्या पोयू लोम्मीदेबे नमयू होम्कीने। चेनेयलो च-थूङब पोजे छ्यप्दे दी, तर परमेश्वरजे अनुग्रहदे सेम् बोल्यो क्यूरब सोरो ज्य ख्यङ्, होर छ्याप्यूदे हम्ब मन्देबयूने चैये फाइदा अन्ची। 10 बलि पीनब ङीनजे चाक्यात्या ख्यङ्, परमेश्वरने पूस्तेब पवित्र पाल-कीम्ने काम फरयूदे होयाने चेर्तेब सेयू चब हक त्वो। 11 पात्ता केन् पूस्र्यादे पापजे लागि बलि पीनब रोलाजे का चेर्तेने पात्ता केन् पवित्र नेने रेक्क्य, तर हम्ब रोलाजे ङ्वब फीने कूबदेबे प्ल्याङ्नब मीने फूम्बीय। 12 येरेक्यूत्देबे येशूदेये रङ्सेजे कादे मीयूने पवित्र चेने सहरजे ख्यो फीने सकस् भोक्तीदे। 13 येर्बे जेम्से ङीनये सहरजे फीने येशू ख्यब नेने प्रे, मेस्ये ङूदे सैदेब बदनाम ङीनदेये सैदीदे। 14 चेनेयलो ङीन येतार्ने टूनप्रेब सहर अयाने त्वो, तर ङ्येदे रब सहरजे लम् लेन्न ख्यङ्। 15 येरेक्यूत्देबे ङीन येतार्ने येशूजे मीन् गोम्देबे परमेश्वरने सार्याजे बलि पीने। अम्बब ङूजे मीन् कीनब मीयूजे ङूर्दे पीनब भेटी ख्यङ्। 16 भलो काम फरने, मेस्ये रङ्सेप्रे ख्यब सेयू सूजोयूप्रे क्वेने येल अन्क्यूर्, चेनेयलो परमेश्वरने सेम् पर्तेब बलि अम्बने ख्यङ्। 17 नमयूजे अगुवायूजे आज्ञा मन्दी मेस्ये थमयूजे हक नङ्ने टूङ्। चेनेयलो थमयूदे चेब कामजे हिसाब परमेश्वरने पीन पर्तीय यब पो स्येदेबे थमयूदे नमयूजे प्राणजे ख्याल चीक्क्य। अम्ब काम थमयूदे सेम् सूग्देबे चीस्स्य। छरङ् थेदेबे दी, नत्रलो हम्ब कामदे नमयूने चैये फाइदाये क्यूस्स्ये त्वो। 18 ङीजे लागि प्रार्थना चीन्नू। ङीने विश्वास ख्यङ्, ङीजे विवेक सफा ख्यङ्, मेस्ये येतार्ने ज्य काम चीन्नस्ये यब ङी सेम् चीक्क्य। 19 ङ नमयूने बेस्से बिन्ती चीक्क्य, चेनेयलो नमयू ट्याने ङ छ्योटो ल्वार खूस्य यदेबे ङैजे लागि प्रार्थना चीम्मी। 20 जेम्से कलङ्नेयली क्यून्नब करारजे कादे स्वान्यूजे पात्ता नङ्ने केन् सोम्प्रङ्ब ङीनजे प्रभु येशूने सीइली फेरि सोम्बो चीम्मेब शान्तिजे परमेश्वरदे, 21 नमयूजे सेम्ने सोरो ज्य गुणयू येम्मीस्य, मेस्ये नमयूदे ङूजे इच्छा पूरा चे खूस्स्य। परमेश्वरने च सेम् पर्ते ख्यङ्, येशू ख्रीष्टजे मीन्ने परमेश्वरदे नमयूने हम्ब चीम्मीस्य। जूग् जूग् सेमेने येशूजे महिमा क्यून्नूस्य। आमेन। 22 अत-अची च्योन्यू, ङैजे अर्तीजे पोयू चेलाबे ङ्यीन् यदेबे ङ नमयूने यीय, चेनेयलो ङैदे नमयूने अम्ब चिट्ठी ठून्यात्या लिख्दीये ख्यङ्। 23 ङीनजे च्योन् तिमोथि कैददे छूर्तीकब पो नमयूदे था प्रेस्स्य यदेबे ङ मन्न ख्यङ्। कादेये ङू छ्योटोने फ्यारदे यलो नमयू त्वने ङ ङूप्रे रीय। 24 नमयूजे अगुवायू मेस्ये परमेश्वरजे पवित्र मीयू क्वानेने नमस्कार ख्यङ् य। इटालियादे रबयूदे नमयूने नमस्कार येबे ख्यङ्। 25 परमेश्वरजे अनुग्रह नमयू क्वाप्रेने क्यून्नूस्य। आमेन। |
Ghale New Testament © Nepal Bible Society, 2011.
Nepal Bible Society