कलस्सी 1 - घले नयाँ करार1 परमेश्वरजे इच्छादे ख्रीष्ट येशूजे मूल स्यूस्स्या ङ पावलदे मेस्ये ङीनजे च्योन् तिमोथीदे, 2 कलस्सेने ख्यब परमेश्वरजे पवित्र मीयू मेस्ये ख्रीष्टने विश्वास चेब अत-अची च्योन्यूने लिख्दीन ख्यङ्: ङीनजे प परमेश्वरदे नमयूने अनुग्रह मेस्ये शान्ति पीन्स्य। धन्यवाद पीनब प्रार्थना 3 ङी नमयूजे लागि प्रार्थना चीप्प ङीनजे प्रभु येशू ख्रीष्टजे प परमेश्वरने येतार्ने धन्यवाद पीन्क्य, 4 चेनेयलो ख्रीष्ट येशूने नमयूदे चेब विश्वास मेस्ये परमेश्वरजे पवित्र मीयू क्वाप्रेने नमयूदे चेब प्रेमजे पोयू ङीदे त ख्यङ्, 5 अम्ब विश्वास मेस्ये प्रेम नमयूजे लागि स्वर्गने जूक्तीदेबे हीतेब आशाजे कारणदे क्यूर ख्यङ्। हम्ब पोयू नमयूदे मालाङ्ने तम्दम्जे वचनने, या सूगब खबरने तैक ख्यङ्। 6 अम्ब सूगब खबर नमयूट्याने फ्योर ख्यङ्, मेस्ये तम्दम्ने अम्बदे संसारजे का-मुलुकने असी पीन्देबे थेप् क्यूप्पीन ख्यङ्। परमेश्वरदे चेब अनुग्रहजे तम्दम् पो तदेबे क्वब दिनदेछोमेस्ये नमयूजे अन्द्रनेये सूगब खबरदे होरप्रने काम चीन्न ख्यङ्। 7 ङीप्रे-प्रे काम फरब त्वो इपाफ्रासदे अम्ब पो नमयूने लोम्मीदे। ङू ख्रीष्टजे सेवा चेने भर्पर्ते ख्वब ङीजे पक्षजे मी ख्यङ्। 8 पवित्र आत्मादे नमयूने पीनब प्रेमजे पोयू ङूदे ङीने स्य्वे ख्यङ्। 9 होरेक्यूत्देबे अम्ब पो तब दीन्दे छोमेस्ये प्रभुजे इच्छा नमयू फ्याने च ख्य हम्बने पवित्र आत्मादे पीनब पूरा बुद्धि मेस्ये क्व ख्वब ज्ञान नमयूने फ्यानीस्य यदेबे नमयूजे लागि ङी येतार्ने प्रार्थना चीन्न ख्यङ्, 10 येरे ङूने बेस्से सूग्ला चेने नमयूदे प्रभुने सेम् पर्देब जीया चदेबे सोरो ज्य कामयूने फलीफप् क्यूत्देबे परमेश्वरजे ज्ञानने नमयू बोल्यो क्यूक्के खूस्स्य। 11 नमयू आनन्द क्यूत्देबे कूम सैदीन ख्वब मेस्ये रेन्न ख्वब क्यूरने परमेश्वरदे पीनब महिमाजे शक्ति अनुसार बोल्यो क्यूर यबने ङीजे प्रार्थना ख्यङ्। 12 ओथ्याङ्जे राज्यने परमेश्वरजे पवित्र मीयूदे प्रेब हक ङीनयूनेये प्रे ख्व चीम्मेब पने सूग्देबे धन्यवाद पीने। 13 ङूदे ङीनने मून्दूङ्जे राज्यदे अलाक् चीत्देबे ङूजे छेब चजे राज्यने चेलाबे सेबे ख्यङ्। 14 ङूजे चदेने ङीनजे उद्धार चीम्मे ख्यङ्, मेस्ये ङीनजे पाप क्षमा चीम्मे ख्यङ्। ख्रीष्ट पात्ता केन् ख्यङ् 15 अन्तङब परमेश्वरजे तङब रूप् येशू ख्रीष्ट ख्यङ्। परमेश्वरदे सृष्टि चेब साप्ता थोक फ्याने येशू ख्रीष्ट पात्ता केन् ख्यङ्। 16 चेनेयलो ख्रीष्टप्रे क्यूत्देबे परमेश्वरदे स्वर्ग मेस्ये पृथ्वीने ख्यब साप्ता थोकयू, म्यादे तङ ख्वब मेस्ये तङ अङ्ख्वब थोकयू, या आत्माजे शक्तियू, मालिकयू, हुकुमयू मेस्ये हकयू सृष्टि चीत्दे। अम्ब टक्कने परमेश्वरदे ख्रीष्टप्रे क्यूत्देबे ख्रीष्टजे लागिने सृष्टि चीम्मीदे। 17 साप्ता थोक सृष्टि क्यूरयली खूम्मेस्येने ङू ख्य, होर्दे साप्ता थोकयू ङूप्रे क्यूत्देबे रङ्से रङ्से नेने मील्लीदेबे छ्यान ख्यङ्। 18 ङू मण्डलीजे ट ख्यङ् होर्दे ङूजे ङ्वब मण्डली ख्यङ्, साप्ता थोकजे सुरु ङू ख्यङ्, साप्ता थोकयू नङ्ने ङू पात्ता केन् क्यूस्स्य यदेबे सीयेबयू नङ्ने पात्ता खूम सोम्बो क्यूरब ङूने ख्यङ्। 19 चेनेयलो परमेश्वरजे साप्ता स्वभावयू ख्रीष्टने क्यून्नब तङ्देबे परमेश्वर सोरो सूग्दे, 20 मेस्ये परमेश्वरदे क्रूसने बलि क्यूरब ख्रीष्टजे कादे शान्ति पीन्देबे पृथ्वीने ख्यब या स्वर्गने ख्यब साप्ता थोकयू रङ्सेप्रे मिलापने रेत्दे। 21 त्याफे नमयूजे सेम्ने अन्ज्य पोयू मन ख्य मेस्ये अन्ज्य कामयू चीक्क ख्य होरेक्यूत्देबे नमयू परमेश्वरप्रे चीन्तङ् क्यूत्दे मेस्ये परमेश्वरजे शत्रु क्यूक्क ख्य। 22 तर परमेश्वरजे खूम्ने नमयू पवित्र, खोट् त्वब मेस्ये दोष त्वब चेने ख्रीष्टजे स्यजे ङ्व बलि क्यूत्देबे परमेश्वरदे नमयूने जेम्से मिलापने रेक्क ख्यङ्- 23 तम्दम्ने नमयू रङ्से विश्वासने अन्क्यापीलाबे बोल्यो क्यून्नू, मेस्ये नमयूदे सूगब खबर ङ्यीन्देबे प्रेब आशा अन्क्यापीलाची। अम्ब सूगब खबर का-मुलुक संसारजे मीयूने स्योक्क ख्यङ्। ङ, पावल अम्ब सूगब खबर स्य्वेब त्वो क्यूर ख्यङ्। मण्डलीजे लागि पावलदे छेम्प्रे चेब 24 जेम्से नमयूजे लागि ङैदे छरङ् प्रेल्लीने ङ सूग्क्य, मेस्ये ख्रीष्टदे भोक्ते पर्तेब खास्या ख्यब सकस्यू ङूजे ङ्व या मण्डलीजे लागि ङ ङैजे ङ्वने भोक्तीदे पूरा चीक्क्य। 25 नमयूने भलो चेने परमेश्वरदे ङैने पीनब काम अनुसार, परमेश्वरजे वचन त्याये अम्पोङ्लाबे स्य्वेने ङ मण्डलीजे त्वो क्यूत्दे 26 जूग्-जूग् या पुस्ता पुस्तामेस्येने सूदेये स्ये अङ्ख्वब नङ्सू पो परमेश्वरदे रङ्सेजे पवित्र मीयूने अर्थ कोलाबे चीम्मे ख्यङ्। 27 अम्ब सूदेये स्ये अङ्ख्वब महिमाजे सम्पत्ति यहूदी तेब मीयूजे लागि सोरो केन् ख्यङ् यब पो क्व ख्व चीम्मेने परमेश्वरदे रङ्सेजे पवित्र मीयूने सेल्दे। अम्ब स्ये अङ्ख्वब पोजे अर्थब ख्रीष्ट नमयूप्रे क्यूरब पो ख्यङ्, हम्ब परमेश्वरजे महिमाने सामेल् क्यूरप्रेब आशा ख्यङ्। 28 ख्रीष्टने मीयू क्वाने पाको चीत्देबे परमेश्वरजे खूम्ने तम्मेखूस्य यदेबे मीयू क्वानेने बोङ्बे आर्तीदेबे, मेस्ये पूरा बुद्धिने लोम्मीलीम् चीत्देबे ख्रीष्टजे पोयू ङी बोङ्बे स्योक्क्य। 29 ख्रीष्टदे ङैजे सेम् नङ्ने काम फरब शक्ति पीन्दे, हम्ब शक्ति अनुसार ङ अम्ब कामजे लागि सोरो बोङ्बे छेम्प्रे चीक्क्य। |
Ghale New Testament © Nepal Bible Society, 2011.
Nepal Bible Society