मूल स्यूस्स्यायूजे कामजे किताब 5 - घले नयाँ करारहननिया प्रे सफीरा 1 तर हननिया मीन्जे मीत्या मेस्ये ङूजे मज सफीरादे स चोक्रत्या सोङ्दे, 2 मेस्ये हम्ब सजे नोर् ङूजे मजप्रे मोतो चीत्देबे छीत्या रङ्सेप्रे हीत्दे, मेस्ये छीत्याब रेत्देबे मूल स्यूस्स्यायूजे खूम्ने हीम्मीदे। 3 तर पत्रुसदे यदे, “या हननिया, पवित्र आत्माप्रे लूच्च क्यमब मेस्ये स-क्यू सोङब नोर् छीत्या रङ्सेप्रे हीनब पो शैतानदे केर्बे नैजे सेम्ने फ्यामीदे? 4 हम्ब स-क्यू अन्सोङ्दासेमे नैजेने ते? मेस्ये हम्ब सोङ्बे ङ्येदेये हम्ब नैजे लानेने ख्य ते या? येर काम चेब सेम् नैजे सेम्ने केर्बे रदे? नदे मीयूने दी, तर परमेश्वरने लूच्च क्यम ख्यङ्।” 5 अम्ब पो तदेबे हननिया सने री-फोली मेस्ये ङूजे प्राण गीली। अम्ब पो तबयू क्वाने सोरो फैगदे। 6 होर्दे स्योर्बयूदे लङ्देबे ङूने कोलादे फूर्दे मेस्ये प्लेत्देबे फीने कूदीदेबे पोप्बीदे। 7 घण्टा सोम्लाप्र ङ्येदे ङूजे मजये नङ्ने रदे मेस्ये होने च क्यूरे हम्ब ङूदे थाने त्व ख्य। 8 मेस्ये पत्रुसदे ङूने लोत्दे, “ङैने य, नमयूदे स हन्छ्वानेने सोङ औ?” होर्दे ङूदे यदे, “अँ हन्छ्वानेने।” 9 तर पत्रुसदे ङूने यदे, “नमयूदे प्रभुजे आत्माजे जाँच चेने केरे मोतो चीत्दे? ले, नैजे पती पोप्बेबयू ख्यो लनेने ख्यङ् मेस्ये थमयूदे ननेये प्लेत्देबे फीने कूबीय।” 10 होर्दे हन्छ्वाबने ङू पत्रुसजे तोप् ट्याने री-फोलीदेबे दीयो पूत्दे। कन्छ्वाब स्योर्बयू नङ्ने रदे, हन्छ्वाब मदी सीयेब तङ्देबे फीने प्लेत्देबे कूतीदे, मेस्ये ङूजे पती ट्याने पोप्बीदे। 11 का-मुलुकजे मण्डलीजे मीयू मेस्ये अम्ब पो तब मीयू क्वाने सोरो फैगदे। मूल स्यूस्स्यायूदे कूम मीयूजे बीद तम् चीम्मीदे 12 जेम्सेमेस्ये मूल स्यूस्स्यायूदे मीयूजे अन्द्रने कूम हार्मन्देब कामयू चीत्देबे च्यूनूयू तन्दे। सोलोमनजे दोलेन्ने विश्वास चेब मीयू क्वाने नेत्याने रुप् क्यूर ख्य। 13 तर सूजो मीयू नङ्जे सूये थमयूप्रे मील्लेने रब आँट त्वो, होरनेयली मीयूदे थमयूने गेसेन् चे ख्य। 14 प्रभुने विश्वास चेब पती-मदीयू थर् ङ्हीजे हुल झन् थेप् थप्दीरदे, 15 अन्छ्वासेमे क्यूत्दे यी, मीयूदे नवयू लम्-लम्ने रेत्दे, मेस्ये पत्रुस रब ङूजे ल त्या-यलीने थमयू नङ्ने कोइ-कोइ फ्याने पर्दीस्य यदेबे कप-तीकयू मेस्ये खर्यूने थमयूने ङ्येल्देबे येख्य। 16 यरूशलेमजे तीला छोला सहरयूदेये कूम मीयूदे नवयू मेस्ये अशुद्ध आत्मादे पेर्दीनब मीयू टेल्देबे रेख्य मेस्ये हम्ब क्वाने तम् क्यूर ख्य। मूल स्यूस्स्यायूने सतनम् 17 पात्ता केन् पूस्र्या मेस्ये ङूप्रे ख्यब क्वादेने (थमयू सदुकी पक्षजे ख्य) म्यातब चीत्देबे मूल स्यूस्स्यायूजे विरुद्धने लङ्दे, 18 मेस्ये थमयूने चूङ्देब सूनेयली येब झ्यालखानने स्य्वोपीदे। 19 तर प्रभुजे दूत त्यादे मून्दे झ्यालखानजे ख्योयू पूक्मीदे, मेस्ये थमयूने फीने रेत्देबे यदे, 20 “प्र मेस्ये मन्दिरने मेर्देबे अम्ब जीयाजे साप्ता खबर मीयूने स्य्वे।” 21 अम्ब पो ङ्यीनङ्येदे थमयू नप्देने मन्दिर नङ्ने क्योइदेबे लोम्मेने सुरु चीत्दे। तर पात्ता केन् पूस्र्या मेस्ये ङूप्रे ख्यब मीयू रदेबे पात्ता केन् सभा या इस्राएलजे मीयूजे पूरा सभाजे क्वानेने कोदे, मेस्ये मूल स्यूस्स्यायूने झ्यालखानदे योन्सीस्य यदेबे मीयू कूल्बीदे। 22 तर अफसरयूदे थमयूने झ्यालखानने अन्तूब ल्वारदेबे अम्ब खबर स्योत्दे, 23 “ङीदे झ्यालखानने रक्षा चीत्देबे कोल्ज्या पूत्दे, मेस्ये सीन्त्रीयूब ख्योयूने मेर्नब तङ्दे, तर ख्यो पूक्प ङीदे नङ्ने सूत्याये अन्तू।” 24 कन्छ्वाब मन्दिरजे कप्तान मेस्ये पूस्र्या केन्यूदे अम्ब खबर तदे हन्छ्वाब जेम्से च-चम क्यूट्टीय यदेबे थमयू मूल स्यूस्स्ययूजे बारेने आ-थोम्दे। 25 तर मीत्या रदेबे थमयूने यदे, “ले, नमयूदे कम्ब मी झ्यालखानने हीदे ख्य, थमयूदे मन्दिरने मेर्देबे मीयूने शिक्षा पीन्न ख्यङ्।” 26 होर्दे अफिसरयूप्रेप्रे कप्तान गीलीदेबे थमयूने बोङ् अन्तनलाबे रेत्दे, चेनेयलो मीयूदे थमयूने लूङ्दे ठरीगने यदेबे थमयू फदे। 27 हम्बयूदे थमयूने स्योल्लीदेबे पात्ता केन् सभाजे खूम्ने मेर्से पीन्दे, मेस्ये पात्ता केन् पूस्र्यादे थमयूने लोत्दे, 28 “ङीदे नमयूने अम्बजे मीन्ने चै शिक्षाये अन्लोम्मीलाची यदेबे आज्ञा पीन ख्य, तर नमयूदे रङ्से शिक्षादे यरूशलेमजे का-मुलुकने फ्याकदे, मेस्ये हम्ब मीजे काजे दोष ङी फ्याने लैते मेख्यङ्।” 29 तर पत्रुस मेस्ये मूल स्यूस्स्यायूदे यदे, “ङीदे मीयूजे दी तर परमेश्वरजे आज्ञा मन्देने पर्दीय। 30 ङीनजे मेमेजे परमेश्वरदे येशूने सीयेबदे सोम्बो चीत्दे, ङूने नमयूदे स्यङ्ने खील् ठोक्दीदे मेस्ये पील्देबे सेक्क ख्य। 31 परमेश्वरदे इस्राएलजे पश्चात्तापजे लागि मेस्ये पापयूजे क्षमा पीनने ङूने मूरूम् मेस्ये मुक्ति पीनब बन्दीदेबे रङ्सेजे स्येत्तेयोर् हीत्दे। 32 अम्ब साप्ता पोयूजे ङी गवाही ख्यङ्, मेस्ये हेरप्रने पवित्र आत्माये, परमेश्वरदे हम्बने रङ्सेजे आज्ञा मन्देब मीयूने पीने ख्यङ्।” 33 होर्दे थमयूदे अम्ब पो तदेबे थमयू क्वाने सोरो छी-लङ्दे, मेस्ये थमयूने से मेदे। 34 तर मोशाजे नियमजे पन्डे मेस्ये मीयूदे मन्देब गमलिएल यब फरिसी पात्ता केन् सभाने लङ्देबे थमयूने खात्या फीने प्र यदेबे हुकुम पीत्दे, 35 ङूदे पात्ता केन् सभाजे मीयूने यदे, “ओ इस्राएलजे मीयू, अम्ब मीयूने नमयूदे च चेमे ख्यङ्, हम्बने होस्स्यार क्यूरो। 36 चेनेयलो दीनीयली खूम्ये थूदासदे ङ मी केन् न यदेबे य ख्य मेस्ये थेप्प्र: सै स्यीलाप्र मीयू ङूजे ङ्ये-ङ्ये लादीदे। ङू सेक्कदे, होर्दे ङूजे ङ्ये-ङ्ये लादेबयूये क्वाने स्वा-स्वा थरी मेस्ये क्वाने थेन्ने क्यूत्दे। 37 अम्ब मीजेङ्येदे मीजे संख्या चीलब बीलने गालीलजे यहूदा यब मी योङ्रदे, होर्दे कोइ मीयू रङ्से तेले चीक्कीदे। हम्बये नाश क्यूरी, मेस्ये ङूने मन्देयूब तीछो स्वा-स्वा क्यूरी। 38 दीनीजे अम्ब मम्लने ङ नमयूने यीय, अम्ब मीयूप्रे अलाके टूङ्, मेस्ये अम्बयूने क्यापी, चेनेयलो अम्बयूजे अम्ब चेमेब काम या योजना मीदे चीन्नब ख्यङ्यलो हम्ब ङूदेने मलबीय। 39 तर कादेये परमेश्वरदे चीन्नब ख्यङ्यलोब नमयूदे अम्ब रोक्ते अन्खू। नत्रयलो नमयू परमेश्वरजे विरुद्धने लङब ठर्दीय।” 40 होर्दे थमयूदे ङूजे मोतो ङ्यीन्दे। मेस्ये थमयूदे मूल स्यूस्स्यायू नङ्ने कोदेबे ठरीदे, मेस्ये “येशूजे मीन्ने अन्क्यम्लाची” यब आज्ञा पीन्देबे थमयूने क्यापीदे। 41 हन्छ्वाब येशूजे मीन्ने ह्यल सैदेब खल्जे ठर्दीदे यब पोने आनन्द मन्दीदेबे थमयू पात्ता केन् सभादे योङ्गीदे। 42 होर्दे येतार्ने थमयूदे मन्दिरने मेस्ये कीम्-कीम्ने प्रदेबे येशू ने ख्रीष्ट ख्यङ् यदेबे लोम्मेब मेस्ये प्रचार चेब काम अन्क्यापी। |
Ghale New Testament © Nepal Bible Society, 2011.
Nepal Bible Society