मूल स्यूस्स्यायूजे कामजे किताब 17 - घले नयाँ करारथेसलोनिकेजे सहरने 1 पावल मेस्ये सिलास अम्फिपोलिस मेस्ये अपोल्लोनियाजे लम् क्यूत्देबे थेसलोनिकेने रदे। हैयाने यहूदीयूजे सभा-कीम् त्या ख्य। 2 पावल रङ्सेदे येतारने चीन्न-प्रने हम्ब सभा-कीम्ने गीलीदे। ङूदे हैयाने सत सोम्सेमे धर्मशास्त्रजे पोने थमयूप्रे सवाल-जवाफ चीत्दे। 3 ङूदे धर्मशास्त्रदे प्रमाण पीन्देबे थमयूने येर्बे स्योत्दे, “ख्रीष्टदे छर्ङ प्रेत्देबे सीब पर्तेख्यङ्, मेस्ये सोम्बो क्यूर पर्ते ख्य, होर्दे ङैदे प्रचार चेब येशू हम्ब ख्रीष्ट ख्यङ्।” 4 थमयू नङ्जे कोलाप्र मीदे विश्वास चीत्देबे पावल मेस्ये सिलासतेले लादीदे। ईश्वरने मन्देब सोरो कूम ग्रीकयू मेस्ये कोलाप्र मूख्य मदीयूये थमयूतेले लादे ख्य। 5 तर सूजो यहूदीयूदे म्यातप् चीत्देबे बजारजे बदमाशयूने फूङ् पूत्देबे मीहुल लङ्देबे सहरने उपद्रव चीस्स्ये पीन्दे। थमयूदे पावल मेस्ये सिलासने मीहुलजे खूम्दे रेत्देबे मेर्स्ये पीनने यासोनजे कीम्ने हमला चीत्दे। 6 थमयूदे हैयाने त्व अन्खूब, थमयूदे यासोन मेस्ये कोइ-कोइ च्योन्यूने सहरजे न्याय चेब मीयू ट्याने येरे यदेबे पारा पुत्देबे खोस्योस्यो स्येन्डीदे, “मुलुकने उथूल्-पूथूल् चेब अम्ब मीयू यैयानेये फ्योरो। 7 अम्बयू यासोनजे ङ्योव क्यूत्देबे टूङ ख्यङ्, मेस्ये थमयू क्वादेने येशू यब सूजो मूरुम् त्या ख्यङ् यदेबे कैसरजे हुकुमजे विरुद्धने काम चे ख्यङ्।” 8 अम्ब पो तदेबे मीयू मेस्ये सहरजे हुकुम चील्लेबयू आतीदे। 9 थमयूदे यासोन मेस्ये ङूप्रे ख्यब बाँकी मीयूप्रे धरौटी हीत्देबे थमयूने क्यापीदे। बेरियाने 10 च्योन्यूदे पावल मेस्ये सिलासने मून्दैने छ्योट्टो बेरिया कूल्बीदे, होर्दे कन्छ्वाब थमयू हैयाने फ्योइदे हन्छ्वाबने ङू यहूदीयूजे सभा-कीम् नङ्ने गीलीदे। 11 अनेजे यहूदीयू थेसलोनिकेजे मीयू यली थेप् भलो ख्य। चेनेयलो अम्बयूदे वचन सेम् पीन्देबे ङ्यीन्दे, पावलदे यब पोयू चेलाबे होरप्रने लिख्दीये ख्यङ् यी त्वो यदेबे येतार्ने धर्मशास्त्र छ्योत्देबे जाँचते ख्य। 12 होरेक्यूत्देबे हम्बयू नङ्ने कूमदे, मेस्ये थेप्प्र फ्योबो कीम्जे ग्रीक मदीयूदे मेस्ये पतीयूदेये विश्वास चीत्दे। 13 तर कन्छ्वाब परमेश्वरजे वचन पावलदे बेरियानेये प्रचार चीन्न ख्यङ् यदेबे थेसलोनिकेजे यहूदीयूदे था प्रेत्दे, हन्छ्वाब हैयानेये थमयू मीहुलने लङने मेस्ये उक्सीतेने फ्योरदे। 14 होर्दे च्योन्यूदे छ्योटो पावलने समुद्रतेले कूल्बीदे। तर सिलास मेस्ये तिमोथीब हैयानेने टूङ्दे। 15 पावल सने गीलेबयूदे ङूने एथेन्ससेमे रेत्दे। थमयूने पावलदे सिलास मेस्ये तिमोथीने खूदासेमे छ्योट्टो ख यदेबे खबर चङ्पीदे। एथेन्सने 16 पावलदे एथेन्स सहरने सिलास मेस्ये तिमोथीने रेन्नूब हम्ब सहरने मूर्तियू कूम फ्यानब तङ्देबे ङूजे सेम् ठोदे। 17 होरेक्यूत्देबे ङू यहूदीयू मेस्ये ईश्वर मन्देबे मीयूप्रे सभा-कीम्ने, मेस्ये होने त्व मीयूप्रेब बजारने दिनजेने सवाल-जवाफ चे ख्य। 18 इपिक्यूरी मेस्ये स्तोइकीजे यब दार्शनिकयू नङ्जेये कोइदे ङूप्रे सवाल-जवाफ चीत्दे। थमयू कोइदे यदे, “अम्ब ल-काब मी च य यी? सूजो फी देशजे देवी-देवतायूजे प्रचार चेप्र तङ्को।” चेनेयलो ङूदे येशू मेस्ये सीयेबदे सोम्बो क्यूरब पोजे प्रचार चेख्य। 19 होर्दे थमयूदे अरियोपागसजे सभाने पावलने स्योल्गीदे मेस्ये लोत्दे, “नदे यब अम्ब सर् शिक्षा च ख्यङ्, हम्बजे बारेने ङीदे स्ये प्रेक्क्या? 20 चेनेयलो नदे ङीने नोङ्ल्या पोयू स्योम्मीन ख्यङ्। होरेक्यूत्देबे अम्ब पोजे मतलब च ख्यङ् हम्ब ङीदे स्येब सेम् चीक्कय।” 21 एथेन्सजे मीयू क्वाने मेस्ये हैयाने टूङ्ब फीदेशजे मीयू नोङ्ल्या-नोङ्ल्या पो यने या ङ्यीनत्या दीलाबे रङ्सेजे सेमे सूजो कम्ब पोनेये खेर अन्छा ख्य। 22 पावलदे अरियोपागस सभाजे खूम्ने मेर्देबे यदे, “एथेन्सजे मीयू, नमयूदे सोरो धर्म चेब ङैदे तङ्दे। 23 चेनेयलो अम्ब सहरने ट्वाबीनूब नमयूदे पूज्देब सेयू ङैदे तङ्दे। ङैदे येर टेये त्या होने तूदे, “अन्स्येब देवताजे लागि” यदेबे खोप्तीये टोङ्। नमयूदे स्येने अन्स्येला पूस्तेब हम्ब परमेश्वरजे ङ चूजो प्रचार चीन्न ख्यङ्। 24 परमेश्वर, ङूदे संसार मेस्ये संसारने ख्यब साप्ता थोक बन्दीदे, ङू स्वर्ग मेस्ये पृथ्वीजे प्रभु क्यूरब कारणदे लादे बन्दीयेब मन्दिरने बास अन्टोङ्, 25 ङूने चत्यासेजे हर्जो पर्देप्र चीत्देबे मीजे लादे ङूजे सेवा चेपर्तीय यब अन्मेन्लाची। चेनेयलो ङूदेने क्वानेने जीया, स मेस्ये साप्ता सेने पीन्क्य। 26 का-मुलुकने मीयू टूङ्स्य यदेबे ङूदे मी तीत्यात्यादे कूम जातयूजे सृष्टि चीत्दे। थमयूदे बच्दे पर्देब सेमे मेस्ये टूङ पर्देब ने ङूदे खूम्ने तोक्दीमे ख्यङ्। 27 मीयूदे परमेश्वरने मेल्स्य, कादेये थमयूदे छामछूम चीत्देबे प्रेखूस्य यदेबे ङूदे येर्बे चीत्दे। होरनेयली परमेश्वर ङीनयूप्रे चीन्तङ् त्वो। 28 चेनेयलो “ङीन ङूप्रे सोम्बो क्यूक्क्य, मेस्ये चील्लीय होर्दे ङीन कर ख्य, हम्ब ङूदे चीत्देबे क्यूर ख्यङ्।” नमयूजे रङ्से कवियूदेये य ख्यङ्, ‘तम्दम्ने ङीन ङूजे छगूम्-पूर्गूम् ख्यङ्।’ 29 “होरेबे परमेश्वरजे छगूम्-पूर्गूम् क्यूरमेस्ये ङीनदे परमेश्वरने मीजे बुद्धि मेस्ये सीप्दे बन्देब मर् चाँदी या पत्थरजे मूर्तिप्र मन अन्क्यूर्। 30 होरेक्यूत्देबे थाने त्व अन्स्येदेबे चीक्कब कामने परमेश्वरदे ध्यान् अम्पीन्, तर जेम्से टक्क नेने मी क्वानेने ‘रङ्से-रङ्सेजे पापजे पश्चात्ताप चेब आज्ञा पीन ख्यङ्। 31 चेनेयलो परमेश्वरदे दिन त्या तोक्दीमे ख्यङ्, हम्ब दिनने ङूदे चून्देब मी त्यादे संसारने चेलाबे न्याय चीक्क्य। ङूने सीयेबदे सोम्बो चीत्देबे ङूदे मीयू क्वानेने अम्ब पोजे प्रमाण पीन ख्यङ्।” 32 थमयूदे सीबङ्येदे सोम्बो क्यूक्क्य यब पो कन्छ्वाब तदे, हन्छ्वाब कोइ-कोइदे फ्योदे। तर सूजोयूदे “ङी फेरि अम्बजे बारेने नैजे पो ङ्यीन्क्य” यदे। 33 होर्दे ङ्येदे पावल थमयूजे अन्द्रदे गीलीदे। 34 तर कोइ मीयू ङूप्रे गीलीदे, होर्दे विश्वास चीत्दे। थमयू नङ्ने अरियोपागसजे डियनुसियस, दामारिस मीन् ख्यब मदी त्या, मेस्ये सूजोयूये ख्य। |
Ghale New Testament © Nepal Bible Society, 2011.
Nepal Bible Society