२ तिमोथी 1 - घले नयाँ करार1 ख्रीष्ट येशूने ख्यब जीयाजे कबुल अनुसार परमेश्वरजे सेम् क्यूत्देबे ख्रीष्ट येशूने ङ, पावल मूल स्यूस्स्या क्यूर ख्यङ्, 2 ङैजे छेब च तिमोथीने: प परमेश्वर मेस्ये ङीनजे प्रभु येशू ख्रीष्टजे अनुग्रह, कृपा मेस्ये शान्ति क्यूस्स्य। विश्वास चे ख्वब क्यून्नजे लागि आँट 3 येतार्ने ङैजे प्रार्थनाने नो-मून् नने ह्वे चीक्क्य, ङ परमेश्वरने धन्यवाद पीन्क्य, ङूजे सेवा ङ ङीनजे मेमेयूदे चेप्र शुद्ध विवेकदे चीक्क्य। 4 नैजे म्यामू ह्वे चीप्प नो-मून् ङ नने त्वब केन् इच्छा क्यूर ख्यङ्। नने त्व प्रेल्लो ङ सोरो सूग ख्यङ्दे। 5 नैजे चै-स्वार्थ त्वब विश्वास ङैदे ह्वेर ख्यङ्। हम्ब विश्वास मीयूङ् नैजे मम् लोइस, मेस्ये नैजे म युनिसप्रे ख्य, होरप्रने हम्ब विश्वास नैप्रेये ख्यङ् यदेबे ङैने पक्क ख्यङ्। 6 होरेक्यूत्देबे ङ नने ह्वे चीम्मीय, ङैदे नैफ्याने ला हीप्प नदे प्रेब परमेश्वरजे बर अम्मल्कालाबे काम चीन्नू। 7 चेनेयलो परमेश्वरदे ङीनने कान्द्राजे आत्मा दी, तर बोङ्, प्रेम मेस्ये रङ्सेदे रङ्से सेम् काबूने ये ख्वब आत्मा पीन ख्यङ्। 8 होरेक्यूत्देबे ङीन प्रभुजे गवाही पीनने, ङ कैदने टूङब पो स्य्वेने कलङ्बेये अन्त्वालाची, तर परमेश्वरजे बोङ्दे सूगब खबर स्य्वेने प्रब छरङ् प्रेल्लीने हम्ब काम चीन्नू। 9 परमेश्वरदेने ङीनने उद्धार चीम्मीदे, रङ्से मी चेने कोदे। अम्बब ङीनदे चेब कामदे दी, तर ङूजे रङ्सेजे उदेश्य मेस्ये अनुग्रहदे चे ख्यङ्। हम्ब ङूदे ख्रीष्ट येशूने जूग्दे-जूग्मेस्येने ङीनजे लागि पीने ख्य, 10 तर ङीनने मुक्ति पीनब ख्रीष्ट येशू रदेबे हम्ब उदेश्य मेस्ये अनुग्रह तम्मीक ख्यङ्। येशूदे सीबब काल नाश चीत्देबे कलङ्बेये अन्सीबब जीयाने सूगब खबर स्योत्देबे तङ्लाबे चीम्मीदे। 11 अम्ब सूगब खबर स्य्वेजे लागि ङ प्रचार चेब मी, मूल स्यूस्स्या, लोम्मेब मी क्यूरने चून्तीदे। 12 अम्ब कारण ङैदे हम्ब छरङ् प्रेन्न ख्यङ्। तर ङ अन्त्वा, चेनेयलो ङैदे सू फ्याने विश्वास चे ख्यङ् हम्ब ङैदे स्ये ख्यङ्, मेस्ये ङैने पक्क ख्यङ्, कम्ब ङैदे परमेश्वरने सूम्दीये ख्य। हम्ब पो रब दिनसेमे चेलाबे चीम्देबे येन ख्वब ङू ख्यङ्। 13 ख्रीष्ट येशूने ख्यब विश्वास मेस्ये प्रेमने ङैदे यदेबे नदे तब तम्दम् पोयूजे नमूना अनुसार हम्ब चीन्नू। 14 नने जिम्मा लैदीयेब तम्दम् पोने ङीन नङ्ने बास चेब पवित्र आत्माजे शक्तिदे चीम्देबे यीन्। 15 एशियाने ख्यब मीयू क्वाने ङैने पोङ्इदेबे गीलेब नने थाने ख्यङ्, हम्बयू नङ्ने फुगेलस मेस्ये हर्मोगेनस ख्यङ्। 16 प्रभूदे ओनेसिफरसजे म्हीतीने कृपा चीम्मीस्य, चेनेयलो ङूदे ङैने कूमफे बोङ् पीन्दे, मेस्ये ङ जेलने पर्तेब पोने ङू अन्त्वा ख्य। 17 तर ङू रोमने रमेस्ये ख्वार्-ख्वार् मेल्देबे ङैने तूरदे। 18 प्रभुजे दिनने प्रभुदे ङूने कृपा चीम्मीस्य। एफिससने ङ ख्यब बीलने ङूदे ङैजे पूरा सेवा चेब नने चेलाबे थाने ख्यङ्। |
Ghale New Testament © Nepal Bible Society, 2011.
Nepal Bible Society