२ पत्रुस 2 - घले नयाँ करारलूच्च पो लोम्मेब मीयू मेस्ये हम्बयूजे नाश 1 केर्बे इस्राएलीयूजे अन्द्रने लूच्च अगमवक्तायू ख्य, होरप्रने नमयूजे अन्द्रनेये लूच्च पोयू लोम्मेब मीयू क्यूक्क्य। अम्बयूदे नङ्सू रुप्दे नाश चेब लूच्च शिक्षायू रेक्क्य, अन्छ्वासेमे यी थमयू रङ्सेने उद्धार चीम्मेब प्रभुनेये क्यापीय, मेस्ये रङ्सेने छ्योटोने नाश क्यूस्स्ये पीन्क्य। 2 कूम मीयूदे थमयूजे अन्ज्य व्यवहारयू तङ्देबे होरप्रने चीक्क्य, मेस्ये थमयूजे व्यवहारयू तङ्देबे तम्दम् लम्जे बदनाम क्यूक्क्य। 3 थमयूदे लूच्च पोयू यदेब लोभ तन्क्य, होर्दे नमयूप्रे फाइद कीन्क्य। थमयूदे प्रेब दण्डजे पो खूम्ने पक्क क्यूक्क ख्यङ् मेस्ये थमयूजे नाश क्यूरब पो पक्क ख्यङ्। 4 परमेश्वरदे पाप चेब स्वर्गदूतयूनेये अन्क्यापी, तर थमयू नरकने छाबीदे, मेस्ये न्याय चेब दिनसेमेजे लागि सङ्लोदे ख्यादेबे नरकजे मून्दूङ्ने हीदे ख्यङ्। 5 परमेश्वरदे मीयूङ्जे संसारनेये अन्क्यापी, तर परमेश्वरजे पो अन्ङ्यीनबयू फ्याने क्यूदे नाश चीप्प धार्मिकताजे पो स्य्वेब नोआ मेस्ये सूजो मी-ङ्यीने जूक्तीमीदे। 6 परमेश्वरदे सदोम मेस्ये गमोरा सहरयूने प्ल्याङ्नब-मीदे भस्सम् चीत्देबे मेल चीप्पीदे। परमेश्वर अम्मन्देब मीयूजे गती येर क्यूर टूङ् यदेबे परमेश्वरदे नमूनात्या तम्मीदे। 7 दुष्टयूदे चेब अन्ज्य काम तङ्देबे सोरो सेम् ठ्व धर्मी लोतने परमेश्वरदे जूक्दीमीदे। 8 लोत हम्ब मीयूजे अन्द्रने टूनूब, मेस्ये दिनजेदिन थमयूजे अन्ज्य कामयू तङ्नूब मेस्ये तैनूब, ङूजे सेम् सोरो ठ्वोदे, चेनेयलो ङू धर्मी ख्य। 9 परमेश्वर मन्देब मीयूने सकस्यू रब केरे जूक्तीमे, मेस्ये परमेश्वर अम्मन्देब मीयूने न्याय चेब दिनसेमे दण्ड पीनजे लागि केरे हीन्न पर्ते हम्ब प्रभुदे स्ये ख्यङ्, 10 पात्ता केन् पोब, थमयू अशुद्ध चेब वेश्य कामयू चीन्नीय, मेस्ये परमेश्वरजे अधिकारने ह्यल चीक्क्य। अम्ब मीयू अर्बो मेस्ये सोरो केन् त्वेब क्यूक्क्य, होरदे स्वर्गने ख्यबयूजे न-प्वेने चैये अम्फ। 11 तर हम्ब लूच्च पो लोम्मेयूजे यली स्वर्गदूतयूजे शक्ति मेस्ये बोङ् थेप् केन् ख्यङ्, होरेक्यूल्ली स्वर्गदूतयूदे स्वर्गने ख्यब सूजोयूने प्रभुजे खूम्ने न-प्वेब दोष अन्लैदी। 12 तर अम्ब मीयू रङ्सेदे क्व-अङ्ख्वब पोयूजे न-पूक्क्य। अम्ब मीयू विवेक त्वब रोलायूप्र ख्यङ्, अन्ज्य इच्छादे थमयू कबूने येक्क्य। थमयू, ङ्येप्देबे सेजे लागि जन्मीदेयूप्र ख्यङ्, मेस्ये रोलायूप्र थमयू नाश क्यूक्क्य। 13 थमयूदे सूजो मीने पीनब छरङ्जे सट्टने थमयू रङ्सेदेये छरङ् प्रेक्क्य। नोदेने मोज-मज्जा चीत्देबे आनन्द टूङ प्रेप्प थमयूदे अम्बने सूगब पो मन्क्य। नमयूप्रे-प्रे थमयू भात्यार् चने टूङ्ब नमयूजे लागि त्वाब मेस्ये गेसेन् त्वब पो ख्यङ्, चेनेयलो थमयू बेस्से च-थूङ चीत्देबे मोज-मज्जाने मस्त क्यून्नीय। 14 थमयूजे म्यादे कलङ्नेयली वेश्य काम चेब लम्त्यामे लेन्नीय, पापजे काम अन्चीत्दासेमे थमयूजे सेम् सूग्स्ये त्वो। थमयूदे कमजोर मीयूने पाप चेने फस्तीपीय। लोभ चीत्देबे चत्यासे प्रेजे लागि थमयू ख्यक्कू ख्यङ्, थमयू फ्याने परमेश्वरदजे श्राप पीन्क्य। 15 सोझो लम् पोङ्गीदेबे हम्बयू अन्ज्य लम्तेले गीले ख्यङ्। अन्ज्य कामजे फाइदाने सोरो ज्य थेब बओरजे च बालामजे लम्ने थमयू लादे ख्यङ्। 16 अन्क्यमब गधादे मीदेप्र क्यम्देबे बालाम अगमवक्ताने फ्राचीदे मेस्ये हम्बजे परप्रे क्यूरब कामने रोक्तीपीदे। 17 थमयू क्यू त्वब होङ्जे मूरुम्यू ख्यङ्, सोरो तर्कन रब उन्दू-झीरीदे उर्तीकेब लोकर्मप्र ख्यङ्। थमयूजे लागि परमेश्वरदे पातालने सोरोफत्या मून्दूङ् ख्यब ने तयार चीत्देबे हीदे ख्यङ्। 18 थमयू मूर्ख क्यूत्देबे केन् त्वेब पोयू चीक्क्य, होर्दे अन्ज्य लम् पोङ्गीदेबे ख्रीष्टने विश्वास चेब सर् मीयूने ङ्वजे अन्ज्य इच्छा अनुसार लोभ तन्देबे फेरि अन्ज्य लम्तेले होम्देबे कूबीय। 19 थमयूने स्वतन्त्र चीम्मीय यदेबे कबुल चीक्क्य, तर रङ्सेब अन्ज्य बनीजे त्वो क्यून्नीय। चेनेयलो कम्ब पोदे मीने कबू चीक्क्य हम्ब पोजेने थमयू त्वो क्यूक्क्य। 20 कादेये थमयूदे ङीनजे प्रभु मेस्ये मुक्ति पीनब येशू ख्रीष्टने स्येदेबे संसारजे अन्ज्य कामयू पोङ्यीदे, होर्देङ्येदे फेरि पापजे लम्ने ल्वारदेबे पापजे तो क्यून्नूदेयलो, थमयूजे हम्ब खूम्जे जीयायली ङ्येजे जीया झन् थेप् अन्ज्य क्यूक्क्य। 21 चेनेयलो परमेश्वरदे पीनेब आज्ञा स्येदेबेये थमयूदे अम्मन्दे चीक्क्य यलो, धार्मिकताजे लम् कलङ्बेये अन्स्येब क्यून्नूदेयलो थमयू थेप् ज्य क्यूर ख्यङ्दे। 22 अम्ब तम्दम् उखानदे यप्रने थमयूने येरे क्यूत्दे, “क्योदे रङ्से ओङ् फेरि चरीय”, “मेस्ये ठूमेब पा फेरि योलोने ङ्यूम्देबे क्याय।” |
Ghale New Testament © Nepal Bible Society, 2011.
Nepal Bible Society