२ कोरिन्थी 13 - घले नयाँ करारपात्ता ङ्येदे बोङ्बे आर्तेब 1 सोम्फे पोलोने ङ नमयू ट्याने रीय। कोइ मीदे चत्या नोङ्ग ख्यङ्लो, मी ङ्ही या सोम्जे गवाहीदे हम्ब तम्दम् ख्यङ् यदेबे तन पर्तीय। 2 ङ ङ्हीफे पोलोने रदेबे नमयूप्रे क्यूप्प ङैदे बोङ्बे आर्तीयेप्रने, चूजो ङ नमयूप्रे अन्क्यूल्ली नमयूने बोङ्बे आर्तीय। ङ फेरि रब मालाङ् पाप चेबयू मेस्ये सूजो सूनेये होरेने फार्-अन्क्या। 3 ख्रीष्ट ङैप्रे क्यूत्देबे क्यम ख्यङ् यब पोजे प्रमाण नमयूदे मे ख्यङ्। नमयूप्रे काम फरने ङू कमजोर त्वो, तर ङू नमयूजे अन्द्रने शक्तिशाली ख्यङ्। 4 चेनेयलो ङूने बोङ् त्व क्यूप्प मीयूदे खील् ठोक्दीदे क्रूसने पील्पीदे, तर परमेश्वरजे बोङ्दे ङू सोम्बो क्यूर ख्यङ्। येरप्रने ङी ङूप्रे क्यूप्प, ङूप्रने बोङ् त्व क्यूक्क्य, तर नमयूप्रे काम फर्ने ङी परमेश्वरजे बोङ् प्रेत्देबे ङूप्रेने जीया चैय। 5 नमयूजे विश्वास ख्यङ् यी त्वो यदेबे रङ्सेदे रङ्सेने चेला ले। येरे चेला लेप्प विश्वास ख्यब प्रेत्देयलो येशू ख्रीष्ट नमयूप्रे ख्यङ् यदेबे नमयूने था क्यूर पर्तीय! 6 ङ आशा चीक्क्य, ङीयूब काम अन्लादेब अन्क्यूरे ख्यङ् यब पो नमयूदे था प्रेक्क्य। 7 तर नमयूदे चैत्याये खराब अन्चीस्स्य यदेबे परमेश्वरने ङी प्रार्थना चीक्क्य। अम्ब ङी रङ्सेने ज्य तनजे लागि दी, तर मीयूदे ङी काम अन्लादेप्र तङ्लीने, नमयूदेब चैसे ज्य ख्यङ् हम्ब फरो। 8 चेनेयलो ङी सत्यजे लागि त्यामे फर खूइय, तर सत्यजे विरुद्ध चीत्देबे चैये फर अङ्खू। 9 चेनेयलो ङीदे चैये चे अङ्ख्व क्यूप्प, मेस्ये नमयूदेब चने यली चे ख्वब क्यूप्प, ङीजे सेम् सूग ख्यङ्। नमयूदे ज्य कामयू चीक्के खूस्य यदेबे ङी प्रार्थना चीक्क्य। 10 येरेक्यूत्देबे नमयू ख्यनेदे ङ चीन्तङ् क्यूल्लीने अम्ब पोयू लिख्दीन ख्यङ्, ङ होने रब सूनेये अन्-ङेयम्लाबे प्रभुदे ङैने पीनब हक चील्ले अम्पर्तीस्य। अम्ब हक प्रभुदे नोङ्बेजे लागि दी, तर ज्य चेजे लागि पीन ख्यङ्। पात्ता ङ्येदे चेब नमस्कार 11 अत-अची च्योन्यू, जेम्से अम्ब पोयू यदेबे लिख्देने बन्द चीक्क्य। सिद्ध क्यूरने बोङ् चीदो, ङैजे पो ङ्यीनो, त्या त्याप्रे थून्देबे टूङो, शान्तिने टूङो, मेस्ये प्रेम, शान्ति पीनब परमेश्वर नमयूप्रे क्यूक्क्य। 12 त्यादे त्याप्रे ख्रीष्टजे प्रेमदे नमस्कार ची। परमेश्वरजे पवित्र मीयूदे नमयूने नमस्कार येबे ख्यङ्। 13 नमयूने परमेश्वरजे पवित्र मीयू क्वादेने नमस्कार येबे ख्यङ्। 14 प्रभु येशू ख्रीष्टजे अनुग्रह, परमेश्वरजे प्रेम, मेस्ये पवित्र आत्माजे सङ्गति नमयू क्वाप्रेने क्यून्नूस्य। |
Ghale New Testament © Nepal Bible Society, 2011.
Nepal Bible Society