२ कोरिन्थी 1 - घले नयाँ करार1 परमेश्वरजे इच्छादे ख्रीष्ट येशूजे मूल स्यूस्स्या ङ पावल मेस्ये ङीनजे च्योन् तिमोथीदे, कोरिन्थने ख्यब परमेश्वरजे मण्डलीने, होरदे अखैयाजे का-मुलुकने ख्यब परमेश्वरजे पवित्र मीयू क्वानेने: 2 ङीनजे प परमेश्वर मेस्ये प्रभु येशू ख्रीष्टदे नमयूने अनुग्रह मेस्ये शान्ति पीन्स्य। सान्त्वना पीनब परमेश्वर 3 ङीनजे प्रभु येशू ख्रीष्टजे प-परमेश्वर ङीनने सोरो ङ्येमब प, मेस्ये साप्ता थर्जे सान्त्वना पीनब परमेश्वरने जै-जै क्यूस्स्य। 4 ङीनने साप्ता थर्जे दु:खयू रब ङूदे सान्त्वना पीन्क्य, चेनेयलो परमेश्वरदे पीन्देबे ङीनदे प्रेब हम्ब सान्त्वनादे कर दु:ख प्रेन्नबयू क्यूल्लीने थमयूने सान्त्वना पीन खूस्य। 5 चेनेयलो ङीन केर्बे ख्रीष्टजे सकस्ने कोलानेयली सामेल् क्यूक्क्य। होरप्रने ख्रीष्टप्रे क्यूत्देबे प्रेब सान्त्वनानेये ङीन कोलानेयली सामेल् क्यूक्क्य। 6 कादेये ङीदे दु:ख प्रेत्देयलो हम्ब नमयूजे सान्त्वना मेस्ये उद्धारजे लागि ख्यङ्। कादेये ङीदे सान्त्वना प्रेत्देयलीने हम्ब नमयूजे सान्त्वनाजे लागि ख्यङ्। ङीदे भोक्ते जेङ्कप्र हम्ब दु:खयूने धेरेन् क्यूत्देबे सैदीनूलो नमयूदेये हम्ब सान्त्वना प्रेक्क्य। 7 ङीदे नमयूने पक्क रूप्दे आशा चेख्यङ् चेनेयलो केर्बे ङीजे दु:खने नमयू सामेल् क्यूत्दे, होरप्रने ङीदे प्रेब सान्त्वनानेये नमयू सामेल् क्यूक्क्य यदेबे ङीदे स्ये ख्यङ्। 8 अत च्योन्यू, ङीदे एशियाने भोक्तीकब दु:खजे पोयू नमयूने स्य्वेस्ये मन ख्यङ्। चेनेयलो ङीदे सैदेने अङ्ख्वब दु:ख प्रेप्ब ङी सोम्बो क्यूर प्रेक्क्य यब आशाये त्वक्यूरे ख्य। 9 तम्दम्ने ङी सीब बील फ्योर टोङ् मन्दे। ङी रङ्सेने भरपर्तेने दी, तर सीयेबयूने सोम्बो चीम्मेब परमेश्वरनेत्या भर् पर्तेखूस्य यदेबे यर क्यूट्ट टोङ्। 10 परमेश्वरदे ङीने येर फत्या खतरा क्यूल्लीने जूक्तीमीदे, होरदे ङूदे ङीने जूक्तीनीय। ङूदे ङीने फेरिये जूक्तीमीय यदेबे ङू फ्याने ङी आशा चीन्न ख्यङ्। 11 नमयूदेये ङीजे लागि प्रार्थना चीत्देबे तोङ्मे पर्दीय। येर्बे कूम मीदे प्रार्थना चीत्देबे ङीदे असी प्रेक्क्य, मेस्ये कूम मीदे ङीजे लागि धन्यवाद पीन्क्य। पावलजे योजना सूजो क्यूरेब 12 अम्ब पोने ङी त्वोक्क्य, होर्दे ङीजे विवेकदेये हम्बजे गवाही पीन्क्य, चेनेयलो संसारने क्यूप्प ङीदे थेप्प्र नमयूप्रे पवित्र रूप्दे मेस्ये परमेश्वरजे सत्य तन्देबे प्र-ख्यङ्, अम्ब संसारजे बुद्धि अनुसार दी, तर परमेश्वरजे अनुग्रह अनुसार चे ख्यङ्। 13 चेनेयलो नमयूदे छ्य्वे अङ्ख्वब मेस्ये क्व-अङ्ख्वब चै पोये ङीदे नमयूने अन्लीख्दी, मेस्ये नमयूदे चेलाबे क्व खूइय यदेबे आशा चीक्क्य, 14 केर्बे दीनी नमयूदे ङीयूने तेतेत्यामे स्येख्यङ्, होर्प्रने ङीनजे प्रभु येशू ल्वारब दिनने नमयूदे ङीयूने चेलाबे स्येखूइय, मेस्ये ङीयूदे नमयूजे लागि केर्बे त्वे प्रेक्क्य, होरप्रने नमयूदे ङीयूजे लागि त्वे प्रेक्क्य। 15 ङैने अम्ब पो पक्क क्यूर ख्यङ्, होरेक्यूत्देबे पट्टी ङ्हीदेने नमयूने फाइदा क्यूस्स्य यदेबे पात्ता खूम् नमयू ट्याने रब सेम् चीत्दे। 16 माकेडोनिया प्रब नमयूने तूरस्ये मेस्ये माकेडोनियादे ल्वारबये नमयू ट्याने रस्ये मेस्ये हैयादे यहूदियाने ङ प्रब नमयूदे ङैने तोङ्मीस्ये यब मन्न ख्यङ्। 17 ङैदे अम्ब सेम् चीप्प तीप्लीङ्-छोप्लीङ् पो य औ स्व? ङैदे रङ्सेजे योजना चीप्प अम्ब संसारजे मीदेप्र खात्याने “क्यूक्क्य” होर्दे खात्याने “अन्क्यूर्” ये य क्यूर औ स्व? 18 कलङ्बेये धोका अम्पीनब परमेश्वर क्यूरप्र ङैजे पोये खात्याने “क्यूक्क्य” होरदे खात्याने “अन्क्यूर्” यप्र त्वो। 19 चेनेयलो सिलास, तिमोथी, मेस्ये ङैदे नमयूजे अन्द्रने प्रचार चेब परमेश्वरजे च येशू ख्रीष्टप्रे खात्याने “क्यूक्क्य” होर्दे खात्याने “अन्क्यूर्” यब पो त्वो, तर ङूप्रे येतार्ने “क्यूक्क्य” यब पो ख्यङ्। 20 चेनेयलो परमेश्वरदे चेब कबुलयू क्वाने येशू ख्रीष्टने पूरा “क्यूक्क्य” यब पो ख्यङ्। येरेक्यूत्देबे येशू ख्रीष्टप्रे क्यूत्देबे परमेश्वरने महिमा पीनजे लागि ङीन “आमेन” यीय। 21 तर, ङीयूने नमयूप्रे-प्रे ख्रीष्ट फ्याने बोल्यो विश्वास चीन्न ख्वब चीम्मीदे, मेस्ये ङीनने अभिषेक चीम्मेब परमेश्वर ख्यङ्। 22 ङूदे ङीनने रङ्सेजे यदेबे छाप पूक्क जेन ख्यङ्, होरदेमेस्ये बैनाजे रूप्ने पवित्र आत्मा ङीनजे सेम्ने पीन ख्यङ्। 23 नमयूने अप्ठ्यारो चेने ङ कोरिन्थने अन्ल्वार, यब पोने परमेश्वर ङैजे साक्षी ख्यङ्। 24 नमयूजे विश्वास फ्याने ङी हक जेमेदे दी, तर नमयूने सूग्लाबे चेने नमयूप्रे मील्लीदेबे काम फर्क्य। चेनेयलो नमयू रङ्से विश्वासने बोल्यो क्यूर ख्यङ्। |
Ghale New Testament © Nepal Bible Society, 2011.
Nepal Bible Society