१ थेसलोनिकी 4 - घले नयाँ करारपरमेश्वरने सूग्ला ची 1 आखिरीने अत-अची च्योन्यू प्रभु येशूने क्यूत्देबे ङी नमयूने बिन्ती चीक्क्य, मेस्ये अर्ती पीन्क्य, यी परमेश्वरने केरे सूग्ला चे पर्दे मेस्ये केरे रङ्से जीया च पर्दे, हम्ब नमयूदे ङीप्रे लोम्दे, मेस्ये होरप्रने चीन्नये ख्यङ्। अम्ब पोने नमयू थेप्थेप् ज्य क्यूप्पीनू। 2 चेनेयलो प्रभु येशूदे ङीने पीनेब आज्ञायू च-च ख्य हम्ब ङीदे नमयूने पीन्दे। अम्ब नमयूने थाने ख्यङ्। 3 चेनेयलो परमेश्वरजे इच्छा नमयू पवित्र क्यूस्स्य मन ख्यङ्। हम्ब यब अम्ब ख्यङ् यी नमयू वेश्य काम अन्चील्लाची। 4 नमयू क्वाने पवित्र मेस्ये गेसेन् प्रेब लायकजे क्यूत्देबे रङ्से ङ्येन् ची, हम्ब नमयू क्वादेने स्ये, 5 तर परमेश्वरने अन्स्येब विश्वास अन्चेयूप्र वेश्य काम अन्चील्लाची। 6 होर्दे अम्बजे बारेने सूदेये रङ्से अत-अची च्योन्ने हनी चेने अन्ज्य अन्चीस्स्य, चेनेयलो येर खल्जे साप्ता पोजे खी फाब प्रभु ख्यङ्। नमयूने ङीदे मालाङ्ने अम्बजे बारेने बोङ्बे आर्तेजेन ख्यङ्। 7 चेनेयलो परमेश्वरदे ङीनने अशुद्धजे लागि क्व दी, तर पवित्र जीया चने क्व ख्यङ्। 8 येरेक्यूत्देबे सूदे अम्ब पोने स्वीकार अन्चीक्क, हम्बदे मीने दी, तर परमेश्वरने स्वीकार अन्चेब क्यूक्क्य, हम्ब परमेश्वरदे नमयूने रङ्सेजे पवित्र आत्मा पीन्क्य। 9 तर अत-अची च्योन्यूजे प्रेमजे बारेने सूदेये नमयूने लिख्दे पर्देब हर्जो त्वो, चेनेयलो त्यादे सूजोने प्रेम ची यब परमेश्वरजे शिक्षा नमयूदे प्रे ख्यङ्। 10 होरदे माकेडोनिया भरीजे खोत्ता अत-अची च्योन्यूने तम्दम्ने नमयूदे माया चे ख्यङ्। तर झन् थेप्थेप् येरप्रने चीक्की यदेबे ङी नमयूने अर्ती बुद्धि पीन्क्य। 11 ङीदे नमयूने आज्ञा पीनप्र नमयू सून्ताकी क्यूत्देबे टूङने, रङ्से कामनेत्या सेम् पीन् मेस्ये रङ्सेजे लादेने काम फरने बोङ् ची, 12 येरेक्यूप्प प्रभुने अन्स्येबयूदे नमयूने गेसेन् चीक्क्य, मेस्ये नमयू सूजेये भर् अम्पर्तीलाची। प्रभु फेरि रीय 13 तर अत-अची च्योन्यू सीयेबयूजे बारेने नमयूने था क्यूस्स्य मन ख्यङ्, मेस्ये नमयूदे आशा त्वब मीयूदेप्र शोक् चे अम्पर्दीस्य। 14 चेनेयलो येशू सीइदेबे फेरि सोम्बो क्यूत्दे यब पो ङीन विश्वास चीक्क्य, मेस्ये होरप्रने परमेश्वरने विश्वास चीत्देबे सीयेबयूने येशू रब ङूप्रेने परमेश्वरदे कूबीय। 15 परमेश्वरजे वचनदे येये अनुसारने ङी नमयूने बोङ्बे स्योक्क्य, यी ङीन जीती सोम्बो ख्यङ् प्रभु फेरि ल्वारब दिनसेमे सोम्बो क्यून्नीय, मेस्ये केर्बेनेयली हम्ब सीयेबयूयली खूम् क्यूप्पस्ये त्वो। 16 चेनेयलो प्रभु रङ्सेजे गर्जेदेब हुकुमप्रे, पात्ता केन् स्वर्ग दूतजे आवाज मेस्ये परमेश्वरजे धूङ्कूर्जे आवाज प्रे-प्रे स्वर्गदे मो तेल्लीय, मेस्ये ख्रीष्टने विश्वास चीत्देब सीयेबयूने खूम् सोम्बो चीत्देबे लङ्क्य। 17 होर्दे ङीन सोम्बो ख्यबयू मेस्ये संसारने पोङ्येबयू प्रभुने त्वने तो मूने थमयूप्रे मूक्पने प्रे-प्रे कूबीय, मेस्ये येर्बे ङीन प्रभुप्रे येतार्ने टूनीय। 18 येरेक्यूत्देबे त्यादे त्याने अम्ब वचनयू यदेबे सान्त्वना पीन्। |
Ghale New Testament © Nepal Bible Society, 2011.
Nepal Bible Society