१ थेसलोनिकी 1 - घले नयाँ करार1 पावल, सिलास मेस्ये तिमोथीदे प परमेश्वर होरदे प्रभु येशू ख्रीष्टने ख्यब थेसलोनिकीयूजे मण्डलीने: अनुग्रह मेस्ये शान्ति क्यूस्स्य। थेसलोनिकीयूजे विश्वासजे लागि पीनब धन्यवाद 2 ङीजे प्रार्थनायूने नमयू येतार्ने ह्वेचीत्देबे नमयू क्वाजे लागि परमेश्वरने धन्यवाद पीन्क्य। 3 ङीनजे परमेश्वर पजे खूम्ने प्रभु येशू ख्रीष्टने क्यूत्देबे विश्वासने नमयूदे चेब काम, प्रेमदे चेब छेम्प्रे होर्दे आशा चीत्देबे धेरेन् क्यून्नब येतार्ने ह्वेचीन्न ख्यङ्। 4 अत-अची च्योन्यू, परमेश्वरदेने नमयूने प्रेम चीत्देबे सेलब पो ङीने था ख्यङ्। 5 चेनेयलो ङीनजे सूगब खबर नमयूट्याने वचनजे रूप्ने त्यामे अन्ड, तर शक्ति मेस्ये पवित्र आत्माने होर्दे पक्क रूप्ने रदे। नमयूप्रे क्यूप्प नमयूजे लागि ङी कर खल्जे मी ख्य, नमयूदे स्ये ख्यङ्। 6 नमयू ङीजे मेस्ये प्रभुजे के थाब क्यूत्दे, चेनेयलो नमयूने कूम सतनम् क्यूल्लीने पवित्र आत्मादे पीनब आनन्दने सूगब खबर ङ्यीन्देबे सेम्ने यीत्दे। 7 अन्छ्वासेमे क्यूत्दे यी माकेडोनिया होर्दे अखैयाने ख्यब विश्वासीयूजे अन्द्रने नमयू नमूना क्यूत्दे। 8 चेनेयलो नमयूदे परमेश्वरजे वचन माकेडोनिया मेस्ये अखैयाने त्यामे स्योक्क दी, तर परमेश्वर फ्याने नमयूदे चेब विश्वास का-मुलुक नेयूने ड्वाङ्गे क्यूरे ख्यङ्, मेस्ये ङीदे सूजो चैये य पर्देब जरूरी अन्थे। 9 नमयूट्याने ङी रब कर किसिमदे स्वागत चीत्दे, होर्दे नमयू तम्दम् सोम्बो परमेश्वरजे सेवा चेने मूर्तियूजे सेवा चेब कामदे ल्वारदे यब पो मीयूदेने स्योक्क्य। 10 होर्दे स्वर्गदे रस्ये ख्यब ङूजे च येशूने परमेश्वरदे सीयेबदे सोम्बो चीम्मीदे, हम्ब येशूजे लम् नमयूदे लेन्न ख्यङ्, येशूदे ङीन फ्याने र मेल्नब परमेश्वरजे छीदे जूक्तीमीय। |
Ghale New Testament © Nepal Bible Society, 2011.
Nepal Bible Society