I Yoannes 5_1 - SOMA CHHAD - CHHAMBO

¹ Yeshu khorang Masih in zere chhesluks ben yodkhan rere saq Ashipâ skyeskhan in, yang skyechukkhanpo na rgaluks jaqskhanpos khoa skyeskhanpoang rgaluks jaqed.

² Ngantes Ashipa na rgaluks jaqse khoe molchaunika drulsna ni dekana Ashipi Rshrasun rgaluks jaqchao rshtaḵẖspa chned.

³ Yang Ashipi rgalukspo ngantang khoe skalchasunika drulbao insuk yang khoe skalchasun osmed minduk,

⁴ chiazerbana mana Ashipâ skyeskhan saq miyulika loed yang khoe dya miyulika lose loen yodkhanpo dyu in : nganti chheslukspo.

⁵ Ni Yeshu Ashipi Rshras in zere chhesluks bakhanpo mene miyulika lokhanpo su in ?

⁶ Chhu nang khraqis skyodskhanpo Yeshu Masih Khorang in; kho chnu tsas men dobasang chhu nang khraq nyiskas base skyodskhan in, yang chhebji tangkhanpo Sems in chiazerbana Semspo mantaḵẖs in.

⁷ Chiazerbana rshnamiang chnebji tangkhan sum yod, Atao, Kasalpo nang Rtsangma Semspo, yang di sumka chik in.

⁸ Yang miyuliang chhebji phekhan sum yod; Semspo chhû, nang khraqpo yang de sumka grikse chik in.

⁹ Taqdir ngantes miuni chhebjiwa in zespana pharla Ashipi chhebjyu dobasang those in. Chiazerbana khos rangi Rshras mantaḵẖsiang chnebji tangkhanpo Ashipi chhebji khorang in.

¹⁰ Ashipi Rshrasika chhesluks jaqskhanpoa khorang rangeang de chhebji thobse yod Ashipika machheskhanpos kho rdzonma rchoed chiazerbana khos Ashipas rangi Rshrasi mantaḵẖsiang salskhan chhebjika ckhesluks mabas.

¹¹ Yang de chhebjyu dyu in : chizesna Ashipas ngantanga rshtane lushi sonluks salsed yang di sonlukspo khoe Rshrasiang yod.

¹² Rshras yodkhanpoe der Sonluks yod yang Ashipi Rshras medkhanpoe der sonluks yodmed.

¹³ Ngas khyentang Ashipi Rshrasi mingtaḵẖsika chhesluks bakhanun di tamun khyentanga rshtane lushi sonluks yod zere rshtaḵẖspa chhachukpi phya zbris.

¹⁴ Yang ngantanga khoe dunla snying khyud di phya chhed, taqdir khoe ranlukspo nazomse dyandek rtsodna ni khos ngantanga rshra bazaded.

¹⁵ Yang ngantanga ngantes rtsodkhanpoa khos rshna ba zadpao rshtaḵẖspa chhed, ni ngantes rtsodskhanpo thobchawang rshtaḵẖspa chhed.

¹⁶ Taqdir suga katoa rangi phonos shiluksla michhachukhhan nyespa ben thongna laqpa zune rtsod. Ashipas khoe phya shiluksla michhachukkhan nyespa ma baskhanunla sonluks saluk shiluksla chhachukkhan nyespa-ang yod; dî rshmangeang laqpa zune rtsod zere ngas zerbamed.

¹⁷ Khadrangi loqpari lasun rere saq nyespa in, amma, shiluks la michhachukkhan nyespa-ang yod.

¹⁸ Ngantanga Ashipa-a skyeskhanpos nyespa bamed zere rshtaḵẖspa yod, dobasang Ashipa-a skyeskhanpos rang strunged, yang nganpao yang nganpaos khoa thukpa med.

¹⁹ Ngantanga ngantang saq Ashipi in, yang miyul gangma nganpi laqa phoqse yod zere rshtaḵẖspa yod.

²⁰ Yang Ashipi Rshras skyodpawang rshtaḵẖspa yod, yang khos ngantanga mantaḵẖsi in-khanpo shespi phya shangsi hao salsed, yang ngantang de mantaḵẖsi inkhanpeang khoe Rshras Yeshu Masiheang yod, Khorang mantaḵẖsi Ashipao nang rshtane Lushi sonlukspo in.

²¹ Wahunik phrûn, khyentes rang skûnikana strungse jaqshik! [Amen] [mi saqa tangskhan Yoannesi snani resi shugû]