I Yoannes 3_1 - SOMA CHHAD - CHHAMBO

¹ Ltashik! Ngantanga Ashipi Rshras zercha chhe phya Atas ngantika gatsuk rgalukshik jaqs yang ngantang dyanao in, di phya miyulpoa ngan-tang rshtaḵẖspa med chiazerbana dyua khoang rshtaḵẖspa masong.

² Wahunik rinchanun ngantang dare Ashipi Rshrasun in. Yang ngantang gatsukshik ldanuk zerchao darang thsaqpa ngonspamed; amma dyao ngonspachikha ngantang kho natsoḵẖs chhok, chiazerbana yang kho mana inlkhanpoe zosteka ngantanga thangnuk zere rshtaḵẖspa yod.

³ Yang mana gasus khoekana di rdyangmao jaqsna kho khorang rtsangma yodpao tsoḵẖs base rang rtsangma bed.

⁴ Yang mana sus nyespa basna khos khakhrimsla men zespao in yang khakhrimsla men zerchao khorang nyespa in.

⁵ Yang Yeshu nganti nyespaun lene khyerchi phya ngonspin zere khyentanga rshtaḵẖspa duktuk; yang khuriang chang nyespek med.

⁶ Khoeang rshtane dukhhanpos nyespa ba med, nyespa benyodkhanpo hana khoa kho thongspamed hana kho rshtaḵẖspa-ang med.

^7-8 Wahunik phrûn khyentang rang mana sua lamstorla ma tangchukshik, khadrang las ben yodkhanpo Khorang natsoḵẖshik, Khadrang in. Nyespa ben yodkhanpo Nganpi der na in chiazerbana Nganpas manachisnâ khuriangna nyespa ben duged, Nganpi lasun shikpi mingna Ashipi Rshras ngonskhan songsuk.

⁹ Ashipaa skyeskhan rere saqis nyespa bamed chiazerbana Khoe sonpo khoeang ldane duged yang Khoa nyespa manaba nyanmamed, chiazerbana kho Ashipâ skyeskhan in.

¹⁰ Dyana khurikana Ashipi Rshrasun nang Nganpi buthsaun ngonkhan chhe khaḏang las mabaskhan rere tsoq Ashipi derna men, yang rangi phonona rgaluks mijaq khanpoang (Ashipi derna) men.

¹¹ Chiazerbana ryaḵẖsiangna khyentanga gokhan phrinpo dyu in: ngantang chikchiga rgaluks jaqpa rgosuk.

¹² Yang Kaïn natsoḵẖs maldanshik kho de Nganpekana inmin yang khos rangi phono sads, khos chî phya sadsuk zerbana : Khoe lasun rtsoqpo yodpi phya yang khoe phonoe lasun khadrangika yodpi phya sadsuk.

¹³ Kasa phonoun, taqdir miyulpos khyentangna khon jaqsna rgyal margyalshik!

¹⁴ Ngantanga shiluksiangna bingse sonluksiang juks juksed zere shesed chiazerbana ngantes phonoun na rgaluks jaqed, rangi phonoeka rgahks majaqkhanpo shiluksiang dukse yod.

¹⁵ Rangi phonona khon jaqskhan rere saq mi sadkhan in; yang khyentanga rshtaḵẖspa yod, mi sadkhan reretsoqiang rshtane lushi sonluks dukpamed.

¹⁶ Ngantanga rgalukspo diphya rshtaḵẖspa songsed, chiazerbana khos nganti phya khuri stroqpo sals; yang ngantang nganti phonouni phya nganti stroqun tangchao rgosha song.

¹⁷ Gasui der miyuli kyema yoden yang rangi phono nyalbachan songse thongen zdikpa mathsorna ni khoeang Ashipi rgalukspo gatsuga rshtane luspa nyanuk ?

¹⁸ Wahunik, ngi chaqtse phrûn ngantos tamtseka lche tseka rgaluks ba rgospa med dobasang laszoeka yang mantaḵẖsika-ang rgaluks ba rgos.

¹⁹ Dekana ngantang mantaḵẖsika yodchao ngantanga rshtaḵẖspa chnok yang khoe rgyazgoeang ngantes nganti snyinga yang mana chhadkha chhachuk-tuk,

²⁰ chiazerbana taqdir nganti snyingpos nganti shaḵẖs phesna Ashipa nganti snyingpo basang chhopo yod yang khoa saq rshtaḵẖspa yod.

²¹ Wahunik rinchanun, taqdir nganti snyingpos nganti shakhs ma phesna, ni ngantang Ashipi rgyazgoeang snyingchan chhed.

²² Yang ngantes tsalskhanpo ngantangang khoe rollana thobed chiazerbana ngantang khoe kasalunika druled yang kho thadkhanpo ngantes malla khyonged.

²³ Yang khoe molchao dyu in : ngantes khoe Rshras Yeshu Masihi mingtaḵẖsika chhesluks bargos, yang khos ngantanga molchao nazomse ngantes ngantang chikchiga rgâluks jaqpa rgos.

²⁴ Yang khoe kasalunika drulskhanpo khoeang duged yang kho dyana khoeang rshtane lused; yang dyanekana, khos ngantanga salskhan de Semsika kho ngantiang rshtane lushao ngantanga shesed.