I Yoannes 2_1 - SOMA CHHAD - CHHAMBO

¹ Wahunik ngi chaqtse buthsaun khyentes nyespa ma bashik zere ngas di tamun khyentanga di phya zbrid, yang taqdir sus nyespa basna, ni Ati shitia ngantanga yato bakhan chikchik yod : Khadrang inkhan Yeshu Masih in.

² Yang kho nganti nyespauni phya Kho khraqskal inkhan rgoskin in, yang ngantang tse nyespauni phya men dobasang miyul gangmi nyespauni phya-ang in.

³ Yang taqdir ngantes khos molskhanuni lzadruls bedna, ni dekana ngantanga kho ngozin songsed zere ngantanga rshtaḵẖspa chhok.

⁴ Ngâ kho ngozin songsed zere zerkhan yang Khoe kasalunika madrulskhan kho rdzonma in yang Khoeang mantaḵẖs med.

⁵ Amma gasus khoe kasalpeka drulsna chnadkhika khoeang Ashipi rgalukspo rshtanpo songsed, dyanekana ngatang khoeang yodpao ngantanga rshtaḵẖspa chhed.

⁶ Suchigis (nga) rshtane yod zere zeredna Ashipa drulba tsoḵẖs base dyu-unika ang drulba rgosed.

⁷ Wahunik rinchanun! ngas khyentanga chang soma skalskhanchik zbria med dobasang khyentanga ryaḵẖsiangna thobskhan dyana rshnyingma skalskhanpo zbrid; di rshnyingma skalskhanpo khyentanga goskhan dyana Kasalpo in.

⁸ Ni khyentanga yang soma skalskhan chikchik zbrid, yang di tampo khoeka yang khyentika mantaḵẖs chhed chiazerbana ṯhubpo jigen chhed yang mantaḵẖsi odpo zbrelchan chha ryaḵẖsed.

⁹ Gasus nga odiang yod zere zerkhan yang rangi phono na khon jaqkhanpo kho dare thsaqpa thup khuriang yod.

¹⁰ Suchigis rangi phono na rgaluks jaqsna Kho Odiang duged, yang kho khoeang phoqchukpi snyad med.

¹¹ Amma gasu rangi phono na khon jaqsna kho ṯhubiang yod; yang ṯhup khuriang druled, yang gar chned zerchao rshtaḵẖspa chha med, chiazerbana ṯhubis khoe migun jarchuksed.

¹² Wahunik (chaqtse) buthsaun, ngas khyentanga zbrid chiazer-bana khoe mingtaḵẖsi phya khyenti nyespaunla skyonzod songsed.

¹³ Kasa Ataun ngas khyentanga zbrid chiazerbana mana chisna yodkhanpo khyentanga sheskhan songse shesen duged. Wahunik khyoq-thongun ngas khyentanga zbrid chiazerbana khyentang nganpeka lokhan songse loen duged; wahunik (thsuntse) phrûn ngas khyentanga zbrised chiazerbana khyentanga atao sheskhan songse she-sen duged.

¹⁴ Kasa Ataun ngas khyentanga zbrised chiazerbana mana chisnâ yodkhanpo khyentanga sheskhan songse shesen duged. Wahunik khyoqthongun! ngas khyentanga zbrised, chiazerbana khyentang ngadchan in yang Ashipi kasalpo khyentiang [khare las ben] rshtane lused, yang khyentang nganpeka lokhan songse loen duged.

¹⁵ Miyulpona rgaluks majaqshik, hana deang yodkhanun na rgaluks majaqshik! Taqdir gasus miyulna rgaluks jaqed narek khoeang Ati rgalukspo minduk.

¹⁶ Chiazerbana miyuliang yodkhan rgoe tongoun yang mik-uni tongoe ltalukspo nang thsê ngarpo ati ngoslana men dobasang miyuli ngoslana in.

¹⁷ Yang miyulpo nang khoe tongoun nyiska jigen chhed, amma Ashipi ranluks bakhanpo mana rshtanea lused.

¹⁸ Wahunik phru-un dyu jugi namzao in, yang ga tsoḵẖspo khyentanga Masihi loqpar yodkhan yonged zere gosed, do nazomse dareang Masihi loqpar yodkhan bingsed, dekana ngantanga dyu jugi namzao in zere rshtaḵẖspa chned.

¹⁹ Khong ngantiangna bingse song, amma ngantiangna menmin, taqdir khong ngantiangna insukpin na, ni ngantang nanyambo duktukpa; amma khongun ngantiangna menchao ngonchukpi phya bingse songsuk.

²⁰ Khyentang de rtsangme inkhanpoe rollana rdamse phespao thobsed yang khyentanga saq rshtaḵẖspa yod.

²¹ Ngas khyentanga mantaḵẖs shespa medpi phya mazbris dobasang khyentanga do shespi phya zbris, yang ga rzonchik mantaḵẖsi rollana menmi phya zbrid.

²² Yeshua Masih men zere zerkhanpo mene yang su rdzonma in ? Ata nang Rshrasla men zerkhanpo khorang Masihi locparla yodkhan in.

²³ Rshraspoa men zeskhanpoe der Atâng med; Rshraspoa in zeskhanpoe der Ata-ang yod.

²⁴ Dephya khyentanga manachisneangna goskhanpo khyentiang luspa rgos taqdir khyentiang mana chisneangna goskhanpo rshtane lusna ni khyentangang Rshrasiang yang Atiang rshtane juk-suk.

²⁵ Yang khos ngachana chhad baskhanpo dyu in; rshtane luspi sonlukspo in.

²⁶ Ngas di tamun khyentang lamstorla tangkhanuni rshmangeang khyentanga zbrised.

²⁷ Khoe rollana baskhan khyentang rdamse phespao khyentiang rshtane lused; yang khyentanga gasus ltsaba rgospamed, dobasang gatsoḵẖspo khoe rolna songskhan rdamse phespao khores khyentanga chiun saq ltsabed yang dyanao mantaḵẖs in yang rdzon men; yang khos ltsabchao natsoḵẖs base khyentang khoeang rshtane duged.

²⁸ Yang dare, wahunik phrûn kho ngonmi thoeka ngantanga khyud chne phya yang ngantang kho skyodpana khoe dunla khrelkhan michna khoeang rshtane dukpa rgos.

²⁹ Taqdir kho khadang in zere khyentanga rshtaḵẖspa yodna ni gasus khaḏangi las basna kho deangna skyeskhan inmawang khyentanga rshtaḵẖspa chhed.