Zekaria 7 - Baibuli Ekibono kya Katonda 2014

Musengwa Katonda avumirira okusiiba okw'obuguya

¹ Ku lunaku olwokuna olw'omwezi ogwomwenda ogwetebwa Kisilevu, mu mwaka ogwokuna nga Dario ni kyabazinga, Musengwa Katonda yaayogera ninze Zekaria omulanzi.

² Mu kiseera ekyo, abantu ab'e Betheli baali bamaze okutuma Sharezeri ni Regemmeleki n'abasaadha baibwe, baje ye Musengwa Katonda bamweghembe abagemerwe ekisa.

³ Era baabatuma n'okubuuza bakabona b'omu isinzizo lya Musengwa Katonda oyo Afuga Amagye aghalala n'abalanzi bati: “Tuje mu maiso n'okuliranga amaziga olw'okuzikirizibwa kw'eisinzizo, era nga tusiiba mu mwezi ogwokutaanu nga bwe tubairenga tukola mu myaka egyo gyonagyona egibiseegho?”

⁴ Agho Musengwa Katonda oyo Afuga Amagye yaayogera ninze, yankoba ati:

⁵ “Kobera abantu boonaboona abali mu nsi eno, ni ba kabona, oti bwe baasiibanga ni baliranga maziga mu mwezi ogwokutaanu n'ogwomusanvu okumala emyaka egyo ensanvu, tibaabikolanga lwa kugheesa nze kitiisa.

⁶ Era bwe baalyanga ni banhwa, byalinga bya kweigusa beene.”

⁷ Byene ebyo Musengwa Katonda bye yayogera ng'abita mu balanzi abaaligho mu biseera eby'eira. Mu biseera ebyo ekibuga Yerusalemu bye kyabeeranga ng'ebintu bikijiira bukalamu nga kiidhwire abantu. Era ng'abantu bali kamaala mu bibuga ebikyezungulwire, ni mu biketezo ebiri ku luuyi olw'omukono omusaadha olw'e buvandhuba, n'ebyo ebiri mu biiko.

Obudheemu bwaleetera abantu okutwalibwa mu bunhage

⁸ Kabiri Musengwa Katonda yaayogera ninze, yankoba ati:

⁹ “Nze Musengwa Katonda Afuga Amagye nagha ira abantu bange ebiragiro bino nti, ‘Musalenga emisango mu butuufu, buli muntu agemerwenga mwine ekivunika era amusaasirenga.

¹⁰ Mutafuginkirizanga muntu yeenayeena, k'abe namwandu, oba mulekwa, oba omusenze, oba omwavu. Era mutayiiyanga mu myoyo gyaimwe kukola kabi ku banaimwe.’

¹¹ “Aye abantu bange baakola bwa mpwitu, baaloba kuwulira waire okufaayo.

¹² Baakalangusa emyoyo gyaibwe ng'oti ibaale, baaloba kujiira ku mateeka na biragiro, nze Musengwa Katonda Afuga Amagye bye nabagha nga mbita mu balanzi abaaligho mu biseera eby'eira. Kyenava ni mbasungughalira ekibitiriire,

¹³ era olw'okuba baaloba okuwulira bye nabakobanga, zeena naalobanga okubagha bye bansabanga.

¹⁴ Nabasansaania mu maghanga goonagoona ge baali tibaidhi naku naire, nga ndi ng'oti n'empewo eyeezungulula n'amaani. Olwo ensi yaibwe enungi einho yaasigala bwagho nga ghazira muntu agirimu, yaafuuka bifulukwa byereere.”