Zekaria 13 - Baibuli Ekibono kya Katonda 2014

¹ Musengwa Katonda Afuga Amagye akoba ati: “Ekiseera ekyo bwe kirituuka, ensulo eriigulwagho olw'okunaaza ebibi n'obwonoonefu ku baidhukulu ba Daudi n'abantu b'omu Yerusalemu, basobole okwetukuza.

² Nditoola mu nsi Isiraeli ebisinzibwa ebitali Katonda, ghalobe kubaagho muntu abiidhukira waire okwidhukira amaina gaabyo. Nditoolagho n'abo boonaboona abeeyeta abalanzi, era naatoola ni mu bantu omwoyo ogwenda okusinza ebitali Katonda.

³ Bwe ghalibaagho ole alyenda okweyeta omulanzi, ise n'inhina balimukoba bati ateekwa okwitibwa, olw'okwogera eby'obuguya aye ate n'abyeta ebibono bya Musengwa Katonda. Era bw'aligezaaku okukola obulanzi, ise n'inhina abo balimufumita yaafa.

⁴ Mu kiseera ekyo, buli mulanzi okubonekerwa kwe kulimugemya ensoni, yaatya n'okukola obulanzi, waire okuvaala ekivaalo eky'obuviiri okulimbira okwo abantu.

⁵ Aye alikoba bukobe ati, ‘Nze tiri mulanzi, ndi mulimi bulimi. Era eitaka n'ekibaire eky'obukombe kyange okuva mu buto.’

⁶ Era ole bw'alimubuuza ati, ‘Ate ebibwa ebikuli mu mugongo?’ Alimwiramu ati, ‘Ebibwa ebyo nabifunira mu ndhu ya bakagwa bange.’ ”

Musengwa Katonda alagira okwita omwayi

⁷ Musengwa Katonda Afuga Amagye akoba ati: “Iwe empiima yange situkiramu, ja olumbe omwayi wange andhayira entaama. Ita omwayi oyo entaama dhisansaane. Nze mwene ndirumba abantu bange.

⁸ Abantu ab'omu nsi yoonayoona baligabanizibwamu ebitundu bisatu. Abaliba mu bitundu ebibiri ku bisatu ebyo baliitibwa baazikirira. Kitundu kirala kyonka ku ebyo n'ekiribaamu abalisigalagho nga balamu.

⁹ Era abo abaliba mu kitundu ekyo ekirala ndibatukuza ng'oti ni feeza bwe bamukenenula mu muliro, era naabagezesa ng'oti ni zaabu bwe bamugezesa. Balinsaba, era zeena naabairamu. Ndibeeta bantu bange, era boona bandheta Katonda waibwe.”