Zabbuli 148 - Baibuli Ekibono kya Katonda 2014

Ebintu byonabyona bisaake Musengwa Katonda

¹ Mwenamwena musaake Musengwa Katonda! Musaake Musengwa Katonda mwenamwena abali mu igulu, musaake Musengwa Katonda imwe mwenamwena abali ghaigulu.

² Musaake Musengwa Katonda imwe bamalaika be mwenamwena, musaake Musengwa Katonda imwe ab'omu igulu ab'amaani mwenamwena.

³ Iwe endhuba n'iwe omwezi mumusaake, mumusaake imwe emuunienie edhaaka mwenamwena.

⁴ Mumusaake imwe eigulu erisingayo okuba ghaigulu, n'imwe amaadhi agali ghaigulu gh'eigulu.

⁵ Ebintu byonabyona ka bisaake eriina lya Musengwa Katonda, kuba yalagira bulagire byatondebwa.

⁶ Yaata ebintu ebyo mu bifo byabyo, bibenga omwo ebyanda n'ebyanda, yaabiteeragho eiteeka lye biri n'okujiiraku.

⁷ Musaake Musengwa Katonda mwenamwena abali mu nsi, imwe mwenamwena agasota ag'omu maadhi ni byonabyona ebiri ku ntobo y'enhandha.

⁸ N'imwe omuliro, omugozi, omuzira, n'olufu era n'empewo ya kiwunga ejiira ku biragiro bye, mumusaake.

⁹ Mumusaake imwe ensozi n'obusozi mwenamwena, imwe emiti egy'ebibala n'emiti egy'omu nsiko;

¹⁰ imwe ensolo mwenamwena edh'omu nsiko n'edha ghaka, ebintu ebyeghaluliza ku itaka n'enhonhi edhiguluka.

¹¹ Musaake Musengwa Katonda imwe bakyabazinga ab'oku nsi mwenamwena n'abantu baimwe, imwe abakungu n'abafuzi abandi boonaboona ab'oku nsi;

¹² imwe abaisuka n'imwe abaguna, abakaire n'abaana abato.

¹³ Boonaboona ka basaake eriina lya Musengwa Katonda, kuba eriina lye n'erisinga agandi goonagoona obukologho; ekitiisa kye kiri ghaigulu okusinga ensi n'eigulu.

¹⁴ Eighanga lye alighaire amaani, abantu be abamutya baamusaaka, abo nga n'Abaisiraeli b'agonza einho. Mwenamwena musaake Musengwa Katonda!