Zabbuli 142 - Baibuli Ekibono kya Katonda 2014

Okusaba obuyambi

¹ Ndirira Musengwa Katonda aidhe ambeere; era mmweghemba awulire okusaba kwange.

² Mmulomboodhera ebineeraliikiriza; naamukobera ebizibu byange byonabyona.

³ Amaani bwe gampwamu, ankuuma yandabirira. Mu ngira mwe mbita, abazigu bange batezeemu omutego okungemya.

⁴ Nninga eno n'ere mbone munange, aye nga ghazira andiku naire, ghazira ye naalumukira, era ghazira muntu yeenayeena anfaaku.

⁵ Wo Musengwa Katonda, nkulirira oidhe ombeere; niiwe onkuuma era niiwe wenka ye neesiga mu nsi muno.

⁶ Otaloba kumbeera nga nkulirira, kuba mpoiremu eisuubi. Mponia abo abankiriga, kuba ba maani inho okunsinga.

⁷ Ntoola mu ikomera, nsobole okukusiimanga buliidho era nkusaakenga nga ndi mu bantu bo abeesoloiza okukusinza; kuba onaaba onkoleire bukalamu.