Zabbuli 108 - Baibuli Ekibono kya Katonda 2014Okusaba kw'omuntu ali mu bazigu ( Zab 57:7-11 ; 60:5-12 ) 1 Wo Katonda wange, omwoyo gwange gwonagwona guli ku iwe era ku iwe wenka! Ndidha kwembanga enhembo edhiwooma! Iwe omwoyo gwange zuuka! 2 Iwe entongooli yange n'iwe endingidi yange, muzuuke! Leero ndidha kuzuusa endhuba. 3 Wo Musengwa Katonda, ndidha kukusiimanga nga ndi mu bantu, era nkusaakenga nga ndi mu maghanga. 4 Okugonza kwo okutakoma kungi inho okusinga n'eigulu mu bugungumavu, ate obwesigwa bwo butuuka ni ku bire. 5 Wo Katonda wange, laga obukulu bwo bubonebwe ghaigulu okusinga eigulu, n'ekitiisa kyo kimaamire ensi yoonayoona. 6 Ife b'ogonza tubeere n'amaani go otuwulire, olwo abantu bo basobole okuwonezebwa. 7 Katonda yayogera mu kifo kye ekitukuvu ati: “Mu kusagamba okw'obughanguzi, ndidha kwawuzayawuza mu Shekemu, era ngabaniegabanie ekikonko eky'e Sukkothi mu bantu bange. 8 Ensi Gileadi yange, n'eighanga ery'Abamanasse lyange, ate ery'Abaefuraimu n'enkoofiira yange ey'ekyuma, olwo ery'Abayudaaya lyaba omwigo gwange ogw'obwakyabazinga. 9 Ensi Moabu n'ekyogero kyange ate mu Edomu mwe ndisuula engaito dhange okwoleka nga bwekiri ekyange. Buti nkuba emizira olw'okuba mpangwire ab'e Filisitia.” 10 Naani alintwala mu kibuga ekyezungulwirwa ebimante ebigumu? Naani alinkulembereramu okuntuusa mu Edomu? 11 Wo Katonda, mbo bwenebwene otusuuliire irala ere? Tooje na magye gaife kulwana? 12 Tubeere tulwanise omuzigu, kuba okwesigulira ku muntu okutubeera kiziramu muganhulo. 13 Kasita Katonda aba ku luuyi lwaife twidha kughangula; kuba oyo n'aja okutyankirira abazigu baife boonaboona. |
Baibuli Ekibono kya Katonda © The Bible Society of Uganda, 2014
Bible Society of Uganda