Yoshua 19 - Baibuli Ekibono kya Katonda 2014

Ekiketezo ekyagheebwa Abasimeoni

¹ Akalulu bwe kaakubwa omukuzi ogwokubiri, kaagwa ku kika eky'Abasimeoni ng'enda dhaibwe bwe dhaali. Ekiketezo kyaibwe nga kiri munda mwa kiketezo kya Bayuda.

² Era kyalimu ebibuga bino: Beerisheba, Sheba, Molada,

³ Hazari Shuali, Bala, Ezemu,

⁴ Elitoladi, Bethuli, Horumona,

⁵ Zikulaga, Bethi Marikabothi, Hazari Susa,

⁶ Bethi Lebaothi ni Sharuheni. Ebyo nga n'ebibuga eikumi n'ebisatu n'ebyalo byaku.

⁷ Baafuna n'ekiketezo ekindi nga kirimu ebibuga bina n'ebyalo byaku era nga ni bino: Aini, Rimmoni, Etheri ni Ashani.

⁸ Ekiketezo ekyo nga kizingiramu ebyalo byonabyona ebyezungulwire ebibuga ebyo, okutuukira irala e Baalathi Beeri, ekyo nga ni Rama mu kiketezo ekikalukalu ku luuyi olw'omukono omusaadha olw'e buvandhuba. Ebyo byonabyona, n'ogwali omugabo ogw'ekika eky'Abasimeoni ng'enda dhaibwe bwe dhaali.

⁹ Abayuda baafuna ekiketezo kinene inho okusinga kye baali beetaaga, kyova kyasalibwaku ekitundu kyagheebwa ekika eky'Abasimeoni.

Ekiketezo ekyagheebwa Abazebuluni

¹⁰ Akalulu bwe kaakubwa omukuzi ogwokusatu kaagwa ku kika eky'Abazebuluni ng'enda dhaibwe bwe dhaali. Era ekiketezo kye baafuna ng'omugabo gwaibwe kyaja kyatuukira irala ku kibuga Saridi.

¹¹ Okuva agho ensalosalo yaasimbira e bugwandhuba, yaatuuka e Mareali, n'e Dabbeshethi, agho yaanonereza akaiga akali e buvandhuba wa Yokoneamu.

¹² Ensalosalo nga bw'eva ku luuyi lule olundi olwa Saridi esimbira buvandhuba, yaatuuka ku nsalosalo y'e Kisilothi Tabori, n'e Daberathi, era yeeyongerayo okutuuka e Yafia.

¹³ Era yeeyongerayo ku luuyi lwene olwo, yaatuuka e Gathi Heferi n'e Ethikazini, agho yaakyuka okwolekera Nea era yaatuuka e Rimmoni.

¹⁴ Ku luuyi olw'omukono omugooda olw'e buvandhuba, ensalosalo ekyuka yaayolekera Hannathoni, yaakoma e Ifutaheli mu kiiko.

¹⁵ Era yaazingiramu ebibuga bino: Kattathi, Nahalali, Shimuroni, Idala, ni Bethelehemu byonabyona byaghera ebibuga ikumi na bibiri n'ebyalo byaku.

¹⁶ Ebibuga ebyo byonabyona n'ebyalo byaku, n'ebyali omugabo ogw'ekika eky'Abazebuluni ng'enda dhaibwe bwe dhaali.

Ekiketezo ekyagheebwa Abaissakari

¹⁷ Akalulu bwe kaakubwa omukuzi ogwokuna, kaagwa ku kika kya Abaissakari ng'enda dhaibwe bwe dhaali.

¹⁸ Era ekiketezo kye baafuna nga kizingiramu ebibuga bino: Yezireeli, Kesullothi, Shunemu,

¹⁹ Hafaraimu, Shioni, Anaharathi,

²⁰ Rabbithi, Kishioni, Ebezi,

²¹ Remethi, Engannimu, Enihadda ni Bethi Pazzezi.

²² Ensalosalo yaibwe ng'ebita ku Tabori, ni ku Shahazuma, ni ku Bethi Shemeshi, yaakoma ku Yorudani. Ng'ekiketezo kyaibwe kizingiramu ebibuga ikumi na mukaaga n'ebyalo byaku.

²³ Ebyo byonabyona nga n'omugabo ogw'ekika ky'Abaissakari ng'enda dhaibwe bwe dhaali.

Ekiketezo ekyagheebwa Abasheri

²⁴ Akalulu bwe kaakubwa omukuzi ogwokutaanu, kaagwa ku kika ekya Abasheri ng'enda dhaibwe bwe dhaali.

²⁵ Ekiketezo kyaibwe nga kizingiramu ebibuga bino: Helikathi, Hali, Beteni, Akishafu,

²⁶ Allamu Meleki, Amadi ni Mishali. E bugwandhuba nga kibita ku Karumeli ni Shihori Libunathi.

²⁷ Ensalosalo yaibwe ng'ekyuka yaayolekera e buvandhuba, yaaja yaatuuka e Bethidagona, era ng'ebita ku Zebuluni ni ku Efutaheli mu kiiko, olwo yaasimbira ku luuyi olw'omukono omugooda olw'e buvandhuba, yatuuka e Bethemeki n'e Neieli. Agho yaasimba, yaatuuka e Kabuli

²⁸ n'Eburoni, n'e Rehobu, n'e Hammoni, n'e Kana, era yaatuukira irala e Sidoni ekikologho.

²⁹ Olwo yaakyuka yaabita e Rama, yaatuuka e Tiro ekibuga ekyezungulwirwa ebimante ebigumu. Kabiri yaakyuka yaabita e Hosa era yaakoma ku Nhandha Eyaghagati. Era yaazingiramu n'ebibuga bino: Makalabu, Akazibu,

³⁰ Umma, Afeki, ni Rehobu. Ebyo nga n'ebibuga amakumi abiri n'ebibiri aghalala n'ebyalo byaku.

³¹ Ebibuga ebyo byonabyona n'ebyalo byaku, n'ebyali omugabo ogw'ekika eky'Abasheri ng'enda dhaibwe bwe dhaali.

Ekiketezo ekyagheebwa Abanafutali

³² Akalulu bwe kaakubwa omukuzi ogwomukaaga kaagwa ku kika eky'Abanafutali ng'enda dhaibwe bwe dhaali.

³³ Ensalosalo yaibwe ng'eva ku kibuga Helefu yaabita ku muvule ogwali agho mu Zaanannimu, yaatuuka Adaminekebu n'e Yamonia, n'okutuukira irala e Lakkumu, yaakoma ku Yorudani.

³⁴ Agho kabiri yaakyuka yaasimbira e bugwandhuba, yaaja yaatuuka Azanothi Tabori, era yeeyongerayo e Hukkoki, yaatuuka e Zebuluni ku luuyi olw'omukono omusaadha olw'e buvandhuba, era yaatuuka n'e Asheri e bugwandhuba, era ni ku Yuda e buvandhuba w'omwiga Yorudani.

³⁵ Ebibuga ebyezungulwirwa ebimante ebigumu byali nga ni bino: Ziddimu, Zeri, Hamathi, Rakkathi, Kinnerethi,

³⁶ Adama, Rama, Hazori,

³⁷ Kedeshi, Edurei, Enihazori,

³⁸ Yironi, Migadaleli, Horemu, Bethanathi, ni Bethi Shemeshi. Ebyo nga n'ebibuga eikumi n'omwenda aghalala n'ebyalo byaku.

³⁹ Ebibuga ebyo byonabyona n'ebyalo byaku n'ebyali omugabo ogw'ekika eky'Abanafutali ng'enda dhaibwe bwe dhaali.

Ekiketezo ekyagheebwa Abadani

⁴⁰ Akalulu bwe kaakubwa omukuzi ogwomusanvu, kaagwa ku kika eky'Abadani ng'enda dhaibwe bwe dhaali.

⁴¹ Ekiketezo kyaibwe kyalimu ebibuga bino: Zora, Eshitaolo, Irishemeshi,

⁴² Shaalabimu, Aiyaloni, Ithala,

⁴³ Eloni, Timuna, Ekuroni,

⁴⁴ Eliteke, Gibbethoni, Baalathi,

⁴⁵ Yehudi, Beneberaki, Gathirimmoni,

⁴⁶ Meyarakoni, ni Rakkoni, era n'ekiketezo ekyezungulwire Yoppa.

⁴⁷ Ekiseera kyatuuka, ekiketezo eky'Abadani kyabanhagibwaku abazigu. Agho Abadani baaja mu kibuga Leshemu baakirumba, baakighangula era baita abantu baamu, baakyeiriza. Baatoolera okukityamamu era baakikyusa n'eriina okuva ku Leshemu baakyeta Dani eriina lya dhaadha waibwe.

⁴⁸ Ebibuga ebyo byonabyona aghalala n'ebyalo byaku, n'omugabo ogwagheebwa ekika eky'Abadani ng'enda dhaibwe bwe dhaali.

Ekiketezo ekyasembayo okugabwa

⁴⁹ Abaisiraeli nga bamaze okugabana emigabo egy'ebiketezo byaibwe, baagha Yoshua omwana wa Nuni yeena omugabo ogugwe.

⁵⁰ Ng'ekiragiro kya Musengwa Katonda bwe kyali, baamugha ekibuga kye yasaba, nga ni Timunathi Sera ekyali mu bitundu eby'ensozi ebya Efuraimu. Yairamu yaakizimba bukalamu era yaatyama omwo.

⁵¹ Egyo n'emigabo, Eleazari kabona, ni Yoshua omwana wa Nuni, n'abakulu ab'ebika eby'Abaisiraeli, gye baagaba nga bakuba obululu mu maiso ga Musengwa Katonda, agho ku mulyango ogw'Eweema ey'Okwagaananirangamu ni Musengwa Katonda e Shilo. Kale batyo baamaliriza okugabaniamu eitaka.