Yoshua 12 - Baibuli Ekibono kya Katonda 2014

Bakyabazinga Musa be yaghangula

¹ Musa bweyali ng'akaakulemberamu Abaisiraeli, baaghangula bakyabazinga babiri abaali e buvandhuba wa Yorudani, era baabanhagaku ebiketezo byaibwe. Bakyabazinga abo baali bafuga ekiketezo okuva mu kiiko ekirimu omwiga Arunoni ku luuyi olw'omukono omusaadha olw'e buvandhuba, okutuuka ku kiiko ekirimu omwiga Yorudani e buvandhuba ew'omwiga ogwo, era n'okutuukira irala ku lusozi Herimoni ku luuyi olw'omukono omugooda ng'olingiriire e buvandhuba.

² Kyabazinga ye baasooka okughangula nga bamweta Sihoni, ng'afuga ekibuga Heshiboni era nga Muamori. Obwakyabazinga bwe nga butwalizaamu ekitundu kya Gileadi: nga buva ku kibuga Aroeri ekiri kumpi n'ekiiko ekirimu omwiga Arunoni, ku luuyi olw'ekiiko ekyo olw'omukono omugooda olw'e buvandhuba, bwatuuka ku mwiga Yabboki, ku nsalosalo y'Abammoni.

³ Yali era nga n'afuga ekiiko ekirimu Yorudani okuva ku nhandha ey'e Galilaaya okutuuka e Bethi Yeshimothi e buvandhuba ow'Enhandha Eyomuunhu. Obwakyabazinga buno nga butuuka mu kiiko eky'olusozi Pisiga.

⁴ Kyabazinga owokubiri ye baaghangula nga bamweta Ogi kyabazinga owe Bashani. Yafugiranga mu bibuga bibiri, eky'e Ashitarothi n'eky'Ederei, era n'eyasembayo mu lulyo olw'abantu abawaigufu abaayetebwanga Abarefa.

⁵ Obwakyabazinga bwe nga butwalizaamu olusozi Herimoni, n'ekiketezo ekyetebwa Saleka ni Bashani yeenayeena okutuuka ku nsalo y'ab'e Geshuri n'ab'e Maaka. Era nga ku Gileadi afugaku ekitundu okutuuka ku kiketezo kya Sihoni kyabazinga wa Heshiboni.

⁶ Bakyabazinga bano bombi baaghangulwa Abaisiraeli nga bakulemberwa Musa omugheereza wa Musengwa Katonda. Era bwe yamala, yaagabaniamu ekiketezo kyaibwe yaakigha eb'ekika kya Reubeni, n'ekya Gadi, n'ekitundu eky'ekika kya Manasse, ng'omugabo gwaibwe.

Bakyabazinga Yoshua be yaghangula

⁷ Bano ni bakyabazinga abaaghangulwa Abaisiraeli nga bakulemberwamu Yoshua: bakyabazinga abo boonaboona abaafuganga ekiketezo ekiri e bugwandhuba wa Yorudani okuva e Baalagada mu kiiko eky'e Lebanoni, okutuuka ku lusozi Halaka oluli okumpi n'ensi Edomu. Ekiketezo kino Yoshua yakigabaniamu mu bika ebya Abaisiraeli, buli kika kyafunaku omugabo gwakyo.

⁸ Mu kiketezo kino n'omwali ebitundu eby'ensozi, n'eby'omu kiiko, ni Araba ekiiko ekirimu omwiga Yorudani, n'obuserengeto, n'eirungu ku luuyi olw'omukono omusaadha olw'e buvandhuba. Yoshua n'Abaisiraeli nga bakaali kunhaga kiketezo kino, mwalingamu Abahitti, Abamori, Abakanaani, Abaperizzi, Abahivi n'Abayebusi.

⁹ Abaisiraeli baaghangula bakyabazinga ab'ebibuga bino: Yeriko, Ayi ekiri okumpi ni Betheli,

¹⁰ Yerusalemu, Heburoni,

¹¹ Yaramuthi, Lakishi,

¹² Eguloni, Gezeri,

¹³ Debiri, Gederi,

¹⁴ Horuma, Aradi,

¹⁵ Libuna, Adullamu,

¹⁶ Makkeda, Betheli,

¹⁷ Tappua, Heferi,

¹⁸ Afeki, Lasharoni,

¹⁹ Madoni, Hazori,

²⁰ Shimuroni, Akishafu,

²¹ Taanaki, Megiddo,

²² Kedeshi, Yokineamu ekiri mu Karumeli,

²³ Dori ekiri kumpi n'enhandha, Goiimu ekiri mu Galilaaya,

²⁴ ni Tiruza woonawoona bali bakyabazinga amakumi asatu na mulala (31).