Yobu 31 - Baibuli Ekibono kya Katonda 2014

Yobu alayira ati taizanga musango

¹ “Neeyama ira okwekuumanga amaiso gange, kabiri ate nandisoboire ntya okulingirira omughala omuguna nga ndi kumwegomba?

² Katonda yampa mugabo ki okuva ghaigulu y'ali? Nagheebwa ki okuva mu igulu ew'oyo Aghanga Ebintu Byonabyona?

³ Akabi tikaidhira boonooni, n'okuzikirira tikugwira babi?

⁴ Katonda tabona bwe neebisa, era tabona buli kigere kye nsitula?

⁵ Nze ndayira nti tiguyangaku era tikupankupaniangaku muntu yeenayeena.

⁶ Kale Katonda ampime ku minzaani epima ekituufu, abone nga bwe nziraku musango.”

Yobu alayira ati tabangaku mwenzi

⁷ “Bwemba nga nadaaliima naava ku ngira entuufu, naatwalirizibwa bye mbona, era naakola ebibi ebyandeetera okuba atali mulongoofu,

⁸ kale bye nsiga ka biriibwe abandi. Emere ye mbaza ka bagiighe bagisuule.

⁹ Bwemba nga neegomba muka omusaadha, ni mmuleemesa ku mulyango gwa muliraanwa,

¹⁰ kale mukazi wange k'afumbirwe omusaadha owundi, era abandi basule naye.

¹¹ Kuba ekyo kyandibaire kiive, kyandibaire ekibi ekibonerezebwa abalamuzi.

¹² Kyandibaire ng'oti n'omuliro oguzikiriza ng'ogwa geyeena, gwandisiriiziiza buli kye ndi nakyo kyonakyona.”

Yobu akakasa ati yabisanga bukalamu abaghafu

¹³ “Bwemba nga naloba okuwulirisa omwiru wange k'abe omusaadha oba omukazi ng'aneemuluguunhiiza,

¹⁴ kale ndikola ntya, Katonda bw'alisituka okunsalira omusango? Ndimwiramu ki bw'aliidha okumbuuza?

¹⁵ Eyatonda nze mu nda ya maama, era ti n'eyatonda n'omwiru oyo? Ti n'omulala oyo eyatuwumba mu nda twembi?

¹⁶ Naali nhimyeku abaavu bye beetaaga? Naali mmazeeku mu namwandu eisuubi?

¹⁷ Naali ndiireku emere yange zenka, nga mulekwa taliire?

¹⁸ Obulamu bwange bwonabwona, mbaire ndabiriranga bamulekwa ng'oti ndi iseibwe.

¹⁹ Bwe nabonanga omuntu ali kufa empewo olw'okubulwa ekivaalo, oba omwavu azira kye yeebwika,

²⁰ nga mmugha ekivaalo ekikoleibwa mu buviiri bw'entaama edhange. Agho yaba musiimu ye ndi.

²¹ Tikupankupaniangaku mulekwa, nga neesiga nti abalamuzi baidha kumbeera.

²² Aye bwemba nga nakikola, eibega lyange ka liwogokeku, omukono gwange gukutukeku.

²³ Nali tisobola kukola bintu biri ng'oti n'ebyo, olw'okutya Katonda okumbonereza.”

Yobu yeegaana okululunkanira empiiya oba okusinza ebitali Katonda

²⁴ “Titangaku isuubi lyange mu bya bukombe, oba okwesiga ebintu bye mba nabyo.

²⁵ Tibangaku musangaavu lwa bukombe bwange bungi, waire okwesiima olw'empiiya kamaala.

²⁶ Tisinzangaku ndhuba na kwaka kwayo, oba okusinza omwezi n'okumesunkana kwagwo.

²⁷ Tidaaliimangaku ni mbisinza mu ngiso, nga nnhwegera engalo dhange okwoleka bwe mbigulumiza.

²⁸ Ekyo kyona kyandibaire kibi ekibonerezebwa abalamuzi, kuba nandibaire neegaine Katonda ali ghaigulu.

²⁹ Tisangaalirangaku kuzikirira kw'oyo ankyaye, oba okusagamba ng'akabi kamugwiriire.

³⁰ Tiganhangaku munwa gwange kwonoona, ni nsaba nga nkolima, nti afe.

³¹ Abantu boonaboona ababa mu maka gange baidhi bati kiisi muntu eyaidhanga ye ndi, yagabulwanga eby'okulya yaiguta.

³² Abatambuze nabasangaazanga, tyabalekanga kusula ku ngira.

³³ Tigisangaku ku bantu bibi byange, ng'oti n'abantu bwe bakweka ebintu mu ngoye dhe bavaire.

³⁴ Tirekerangaku kwogera oba ni ndoba kufuluma mu ndhu, olw'okutya okwogerwaku abantu, n'okunhoomebwa aboluganda.”

Yobu bye yasembyayo

³⁵ “Kale ngoli ghaligho awulirisa bye nkoba! Nkakasa nga bye nkoba bituufu. Aghanga Ebintu Byonabyona leka andhiremu. Ngoli omuntu yeenayeena aliku ky'anvunaana ampa omusango mu bughandiike,

³⁶ bwenebwene nandigubbeedeire ku ibega gwabonebwa. Nandigutaire ku mutwe gwange ng'oti ngule.

³⁷ Nandikobeire Katonda byonabyona bye nakola; nandyemereire mu maiso ge nga ndi mugumu ng'oti muntu mubbede.

³⁸ Bwemba nga naiba bwibe ekibandha kye nnimamu, era nga kiri kulirira okwirizibwa mwene kyo,

³⁹ era bwemba nga ndya ebibala byamu aghazira kusasula, ni ndeka beene byo okufa endhala,

⁴⁰ kale leka enkandwa dhikulemu mu kifo ky'engaano, n'obukaala mu kifo kya sayiri.” Ebibono bya Yobu bikanze agho.