Yobu 22 - Baibuli Ekibono kya Katonda 2014

Olughayo olwokusatu 22:1—27:23 Elifazi alumiriza Yobu ati aliku omusango

¹ Agho Elifazi Omutemani yairamu ng'akoba ati:

² “Omuntu asobola okuba ow'omugaso ye Katonda? Bwenebwene ni bw'aba omugezi, era aba yeegasa mwene.

³ Oti iwe okuba omutuufu ghaligho kye kiganhulamu Katonda? Oba, iwe obutabaaku musango ghaligho kye kimwongeraku?

⁴ Oti akuvunaana lwa kumwisaamu kitiisa, era oti ekyo ky'avaaku okukuwozesa?

⁵ Busa, akuvunaana lwa bibi byo ebingi n'ebyonoono byo ebitakoma.

⁶ Watoola ku baganda bo emisingo mu bukyamu nga weesasula by'obabandha; waabatoolamu ebivaalo byaibwe, wabaleka madu.

⁷ Abakooye tiwabaghanga maadhi kunhwa, era waimanga abayala emere.

⁸ Olw'okuba oli wa buyinza, eitaka lyonalyona walyefuga ng'olirekaku abo bonka abagonzi y'oli.

⁹ Banamwandu wabeebingaku nga tobaghaire kantu; waalumyanga bamulekwa ng'obanhagaku ebyaibwe.

¹⁰ Kyova mpegaano weezungulwirwa emitego, era waidhirwa ebitiisa ebikuzindula.

¹¹ Enzikiiza ekusandikiire waaloba kubona, era omiriibwa omwidhuzo gw'amaadhi.”

Katonda ali mu igulu aye abona bye tukola ku nsi

¹² “Katonda ali ghaigulu mu igulu, era abona n'emuunienie ye dheeghaniike.

¹³ Osobola okwebuuza oti, ‘Katonda kiki ky'aidhi? Aghanga okusalira abantu emisango ate ng'aghembeibwaku ebire ebigemye enzikiiza?’

¹⁴ Olowooza oti ebire ebigemu bimulobera okubona, ng'ali kutambulira ku nsalosalo ey'eigulu n'ensi?”

Elifazi alumiriza Yobu ati yeebisa ng'ababi

¹⁵ “Oli kwenda kukuuma mpisa edh'eira, ababi dhe beebisangamu?

¹⁶ Baafa ng'ekiseera kyaibwe eky'okufa kikaali, baayeyebwagho ng'oti n'ekizimbe bwekyeyebwagho amaadhi ag'omwidhuzo.

¹⁷ Abantu abo n'abaakoba Katonda bati, ‘Tuveeku.’ Era bati, ‘Oyo Aghanga Ebintu Byonabyona asobola kutukola ki?’

¹⁸ Ate nga Katonda n'eyaidhuza endhu dhaibwe ebirungi. Aye nze amagezi g'ababi tigaikiririzaamu.

¹⁹ Abatuufu basangaala n'abaziraku musango baaseka, bwe babona ababi nga babonerezebwa.

²⁰ Bakoba bati, ‘Bwenebwene abazigu baife bazikiriziibwa. Ni bye baleseegho, omuliro gubisaaniizaagho.’ ”

Elifazi akoba Yobu yeenenie aire ye Katonda

²¹ “Yobu, tabagana ni Katonda obe n'emiraala, olwo oidha kufuna ebirungi.

²² Ikiriza by'akulagira, okuume ebibono bye mu mwoyo gwo.

²³ Weewooye, okyuke oire eri Aghanga Ebintu Byonabyona, okomye agho ebibi byonabyona ebikolebwa mu ndhu yo.

²⁴ Suula ere zaabu wo mu nkungu, ni zaabu wo omukenenule ow'e Ofiri omusuule mu mabaale ag'omu mwiga.

²⁵ Katonda Aghanga Ebintu Byonabyona, n'abe afuuke zaabu wo. Era n'abe afuuke emungo yo eya feeza.

²⁶ Olwo Katonda Aghanga Ebintu Byonabyona aidha kukugha okusangaala einho, era omulingirire nga ghazira ky'otya.

²⁷ Aidha kukuwuliranga ng'oli ni ky'omusaba, era oidha kutuukirizanga ky'onaabanga weeyamye okukola.

²⁸ Buli ky'onaakolanga kiidha kukujiiranga bukalamu, n'engira y'obitamu eidha kubangamu obutangaavu;

²⁹ kuba Katonda aisa ghansi abo abeekuluntaza, aye yaalokola abo abeisa ghansi.

³⁰ Awonia omuntu aziraku musango. Kale aidha kukuwonianga bw'onaabanga ng'oziraku kibi.”