Yoanne 2 - Baibuli Ekibono kya Katonda 2014

Embaga eyali e Kana

¹ Ku lunaku olwokusatu yaabaayo embaga ey'abagole mu kibuga Kana eky'e Galilaaya. Inhina Yesu yaliyo.

² Yesu n'Abeegeresebwa be boona baayetebwa era baaliyo.

³ Omwenge ogw'emizabbibu bwe gwawaagho inhina Yesu yaamukoba ati: “Omwenge gw'emizabbibu gubawoireku.”

⁴ Yesu yaamwiramu ati: “Mukazi iwe, ombeereire ki? Ekiseera kyange kikaali kutuuka.”

⁵ Aye inhina yaakoba abagheereza ati: “Ky'abakoba kyonakyona kye mube mukole.”

⁶ Mperaano agho ghaaligho ensugha edh'amaadhi mukaaga edhaakolebwa mu mabaale ng'Abayudaaya dhe bakozesa mu mpisa yaibwe ey'okwetukuza. Era buli ndala nga ejaamu lita nga kikumi.

⁷ Yesu yaakoba abagheereza ati: “Mwidhuze ensugha edho amaadhi.” Baadhiidhuza ni ku migo.

⁸ Yaakoba ati: “Mperaano museneku mutwalire omugabuzi omukulu.” Baasena baatwala.

⁹ Omugabuzi omukulu bwe yakomba ku maadhi nga gafuuse omwenge ogw'emizabbibu, tiyamanha ye guviire, aye abagheereza abaasena amaadhi baamanha. Agho yaayeta omugole omusaadha

¹⁰ yaamukoba ati: “Omuntu yeenayeena asooka kugabula omwenge ogw'emizabbibu ogw'endiko, abantu bwe bamala okunhwa ni baghezaamu memale yaabagha dhuule. Aye kabiri iwe omwenge ogw'emizabbibu ogw'endiko gw'otereike okutuusa ni ye buli eno!”

¹¹ Yesu yakolera ekyewuunhio kino ekisooka e Kana mu Galilaaya. Atyo yaayoleka ekitiisa kye era Abeegeresebwa be baamwikiriza.

¹² Olumaliira lw'ekyo yaaja e Kaperinaumu n'inhina, ni baganda be n'Abeegeresebwa be, baaba eyo enaku ntono.

Okubinga abaali batundira mu isinzizo

¹³ Ekibinuko eky'Okubitizibwa eky'Abayudaaya nga kiri kumpi okutuuka, Yesu yaaniinaniina e Yerusalemu.

¹⁴ Bwe yatuuka mu isinzizo yaayagaanamu abali kutunda ente, entaama n'enjiibwa, n'abafaana empiiya nga batyaime agho bali ku gwaibwe.

¹⁵ Yaatoola obugugha yaabukolamu akaswanhu, yaababingamu boonaboona n'entaama n'ente, era yaafundika emeeza edh'abaali bafaana empiiya, n'empiiya dhaibwe yaadhisansa.

¹⁶ Yaalagira abaali bali kutunda enjiibwa ati: “Bino mubitoole ghano. Era mulekere okufuula endhu ya Lata wange ekiya!”

¹⁷ Agho Abeegeresebwa be baidhukira ebyaghandiikibwa ebikoba biti: “Omwoyo gw'endhu yo guliimalagho.”

¹⁸ Agho Abayudaaya baamukoba bati: “Kamanhiso ki k'osobola okukola okutumanhisa ng'oli n'obukumu obukola bino?”

¹⁹ Yesu yaabakoba ati: “Mumenhegho eisinzizo lino ndidha kulizimba mu nnaku isatu.”

²⁰ Abayudaaya baamukoba bati: “Kyatwala emyaka amakumi ana na mukaaga (46) okuzimba eisinzizo lino! Waakoba oti oghanga okuliizaagho mu nnaku eisatu?”

²¹ Aye eisinzizo Yesu lye yali ayogeraku n'omubiri gwe.

²² Kale bwe yazuukira mu bafu Abeegeresebwa be baidhukira nga yayogera kino, era baikiriza Ebyaghandiikibwa, ni Yesu bye yakoba.

Yesu aidhi ebidhuubo eby'abantu

²³ Yesu bwe yali mu Yerusalemu, mu nnaku edh'Ekibinuko eky'Okubitizibwa abantu kamaala baamwikiriza bwe baabona ebyewuunhio bye yakolanga.

²⁴ Aye Yesu nga tabeeyalizaamu, kuba boonaboona yali abaidhi.

²⁵ Kyali tikyetaagisa kubaagho amukobera ebifa ku muntu, kuba yali ng'aidhi ebiri mu myoyo egy'abantu.