Yeremia 37 - Baibuli Ekibono kya Katonda 2014

Zedekia kye yasaba Yeremia

¹ Kyabazinga Nebukadinezzari ow'e Babilonia, yafuula Zedekia mutabane wa Yosia okuba kyabazinga wa Buyudaaya mu kifo kya Yehoiakini mutabane wa Yehoiakimu.

² Aye Zedekia oyo, n'abakungu be, era n'abantu abandi mu ighanga, tibaagondera bukwenda Musengwa Katonda bwe yayogerera mu nze.

³ Agho kyabazinga Zedekia oyo yaatuma Yehukali mutabane wa Shelemia, ni kabona Zefania mutabane wa Maaseia, baidha bankoba bati: “Tusabire eri Musengwa Katonda waife.”

⁴ Mu kiseera ekyo nali nga bakaali kunta mu ikomera, nga ntambula mu bantu nga bwe nhenda.

⁵ Eigye ery'Abababilonia lyali lizingiiza Yerusalemu okugyezunguluza. Aye bwe baawulira bati eigye erya Abamisiri lyali limaze okusala ensalo okuva mu Misiri, baaleka olutalo bairayo einhuma.

⁶ Agho Musengwa Katonda, Katonda wa Isiraeli yankoba ati:

⁷ “Nze Musengwa Katonda, Katonda wa Isiraeli nkoba nti, kyabazinga oyo Zedekia eyakutuma okwidha okuneebuuzaaku, ja omukobe oti, ‘Eigye lya Misiri libaire liri mu ngira nga liri kwidha okubayamba, aye lija bwa kwirayo ewaibwe.

⁸ Olwo Abababilonia baidha kwira kabiri, balumbe ekibuga kino bakigeme, era bakyokye omuliro.

⁹ Nze Musengwa Katonda mbalabula mulobe kwerimba muti Abababilonia tibaidha kwira. Bwenebwene baidha kwira.

¹⁰ Ni bwemughangula eigye lyonalyona ery'Abababilonia ni ghasigalagho bw'abo be bafumiite ebibwa bonka, nga balambaire mu weema dhaibwe, era abo balisituka baayokya ekibuga kino omuliro.’ ”

Yeremia bamugema baamusiba mu ikomera

¹¹ Eigye ery'Abababilonia lyali lirese okulumba Yerusalemu lyairayo einhuma, olw'okuba eigye ery'Abamisiri lyali liri kwidha.

¹² Agho nze naava mu Yerusalemu, naaja mu kiketezo kya Benjamini nfune omugabo mu b'ekika kyange.

¹³ Aye bwe natuuka ku gwetebwa Omulyango gwa Benjamini, ghaabaagho omukulu w'abaisirukale nga bamweta Iriya mutabane wa Shelemia era nga mwidhukulu wa Hanania. Yaanhemereza yankoba ati: “Oli kulumuka oire ku luuyi olw'Abababilonia!”

¹⁴ Nze naamwiramu nti: “Busa, tiri kulumuka kwira ku luuyi lwa Bababiloni.” Aye Iriya yaaloba kuwulirisa bye namukoba. Kale yangema bugeme, era yantwala y'abakungu.

¹⁵ Abakungu bankambughalira, baalagira bankube, era bansibira mu ndhu ya Yonathani omughandiisi, kuba endhu eyo baali bagifiiremu ikomera.

¹⁶ Bansibira mu kasenge ak'omu ikomera erya ghansi mu itaka, naamalayo enaku kamaala.

¹⁷ Nga ghabiseeghooku ekiseera, kyabazinga Zedekia yandhetesa bantwale ye yali, era bwenatuukayo yambuuza nga tuli twenka ati: “Ghalighooku obukwenda obuva ye Musengwa?” Nze naamwiramu nti: “Buligho.” Era naamukoba nti: “Iwe baidha kukughaayo eri kyabazinga ow'e Babilonia.”

¹⁸ Agho naamubuuza nti: “Musango ki gwe naiza ku iwe, oba ku bakungu bo, oba ku bantu bano, memale ove okwo onsibe mu ikomera?

¹⁹ Abalanzi baimwe baaja gha, abaalanganga bati kyabazinga ow'e Babilonia talibalumba imwe, waire okulumba ensi eno?

²⁰ Mpegaano ni, Isebantu kyabazinga, nkweghembye wulirisa kye nkusaba: otandhizaayo mu ikomera mu ndhu ya Yonathani, kuba nja kufiira eyo.”

²¹ Kale kyabazinga Zedekia yaalagira bansibire mu luya olw'ekisaagaati kye eky'obwakyabazinga. Naaba omwo, era bampanga omugaati mulala buli lunaku nga bagutoola mu kifo ye baagifumbiranga. Baakola batyo, okutuusa mu kibuga bwe mwawa emigaati.