Siraki 50 - Baibuli Ekibono kya Katonda 2014

Simoni mutabane wa Oniasi

¹ Simoni mutabane wa Oniasi yali Mukulu wa Bakabona, nga mukulembeze wa baganda be, era ng'abantu be bamwenhumiririzaamu inho. Yalongoosa eisinzizo yaaligumya bukalamu.

² Yateesaagho emisingi egy'ekimante ekigulumivu, ekyazimbibwa nga kirimu ebimante bibiri olw'okugumya eisinzizo.

³ Mu biseera bye, baasima ekidiba eky'okukuumiramu amaadhi, nga kinene ng'oti ni tanka ey'ekyuma eky'ekikomo mu bwetooloovu.

⁴ Yakola entegeka ey'okuwoniamu abantu be okuzikirira, yaayongera ku bugumu obw'ekimante okwezunguluza ekibuga, olw'okuziyiza abazigu okukirumba nga bakizingiiza.

⁵ Ye nga yaidhiranga mu bitiibwa ng'ali kufuluma mu Kifo Ekitukuvu Einho, okwidha mu bantu abeesoloiza okusinza!

⁶ Yabonekanga oti ni muunienie ey'oku nkyo ng'eri kwakira mu bire, era ng'oti n'omwezi omukulu.

⁷ Era yaabonekanga oti n'endhuba ng'eri kwaka ku isinzizo ly'oyo Ali Ghaigulu Yeene, era ng'oti ni musoke ng'ali kumirimiinhira ku bire.

⁸ Era ng'oti bimuli ebyetebwa roza mu kiseera ng'eisubi lyakatoolereza okusibuka. Era ng'oti bimuli ebyetebwa liri ebikulira ku mbali okw'omwiga. Era ng'oti n'obusaga obuto obuli kutoolereza okusibuka ku miti egy'e Lebanoni.

⁹ Era ng'oti n'omuliro n'obubbaani nga biri mu kiniokezebwamu obubbaani. Era ng'oti n'ekibya kye baagheesa mu zaabu ni bakidholiga n'amabaale ag'omughendo aga buli nsambo.

¹⁰ Era ng'oti n'omuti omwoliva nga gusagaatiriire ebibala. Era ng'oti n'omuti omusipuressi ogwaleegherera okutuuka mu bire.

¹¹ Simoni oyo bwe yatangaku ebivaalo bye eby'ekitiisa n'aboneka obulungi einho era n'aniinaniina eri alutaari entukuvu, ng'agheesa eisinzizo ekitiisa.

¹² Bakabona bwe baamughanga omugabo ku musengo ng'ayemereire ku mbali kwa alutaari era nga baganda be bamwezungulwire ng'oti ngule ku mutwe, nga mwene aboneka ng'oti muvule muto ogw'e Lebanoni ogwezungulwirwa emiti eminaazi.

¹³ Abo nga ni baidhukulu ba Aaroni mu bitiibwa byaibwe, nga bagemye mu ngalo ebigheebwayo eri Musengwa era nga beemereire emberi wa Abaisiraeli nga beesoloiza.

¹⁴ Era nga bw'amala okugheereza ku alutaari, n'okutegeka ebigheebwayo eri oyo Ali Ghaigulu Yeene era Aghanga Ebintu Byonabyona,

¹⁵ ng'atoola ekikopo eky'omwenge ogw'emizabbibu yaagufuka ku kikolo kya alutaari. Ekyo nga n'ekigheebwayo ekifukibwa ekiri n'akawoowo akasangaaza oyo Ali Ghaigulu Yeene, Kyabazinga ow'ebintu byonabyona.

¹⁶ Agho nga bakabona baidhukulu ba Aaroni baleekaana era nga bafuuwa amagwala agaagheesebwa mu feeza. Nga baasiikana inho oyo Ali Ghaigulu Yeene awulire abaidhukire.

¹⁷ Agho ng'abantu boonaboona mu kaseera keene ako baakuba amakiryaivu era baakutama n'ebyeni byatuuka ku itaka nga basinza Musengwa waibwe Aghanga Ebintu Byonabyona, Katonda Ali Ghaigulu Yeene.

¹⁸ Abembi boona baamusaaka nga bemba enhembo edhinhuma.

¹⁹ Abantu baasigala nga bakeeghemba Musengwa oyo Ali Ghaigulu Yeene, okutuusa omukolo ogw'okusinza bweguwa.

²⁰ Agho Simoni yaika okuva y'alutaari, yaagololera emikono ku bantu Abaisiraeli abeesoloiza, yaalangirira n'obuwombeefu enkabi dha Musengwa ye bali.

²¹ Agho abantu kabiri baakuba amakiryaivu omukuzi ogwokubiri okufuna enkabi dh'oyo Ali Ghaigulu Yeene.

Okusaba enkabi

²² Kale ni musaake Katonda wa byonabyona, akola eby'amaani buli ghantu. Oyo n'atuleetera okukula okuviira irala lwe tuzaalibwa, era n'atugema empola olw'ekisa ky'ali nakyo.

²³ Tumusabe atughe eisanhu era atuleetere okubanga mu miraala mu Isiraeli ebyanda n'ebyanda.

²⁴ Ayongerenga okutusaasira era atuwonienga mu kiseera ekituufu.

Amaghanga asatu agaakyayibwa

²⁵ Ghaligho amaghanga abiri agangemya enaku, era eriyo n'eryokusatu eritagwaine kwetebwa ighanga naire.

²⁶ Amaghanga ago ni gano: ery'Abaedomu, ery'Abafilisiti, n'ery'Abasamaria abasiru.

Amagezi ga Yesu mutabane wa Siraki

²⁷ Ninze Yesu mutabane wa Siraki, Siraki oyo nga mutabane wa Eleazari ow'e Yerusalemu. Ninze nata amagezi gange goonagoona mu kitabo kino kye naghandiika, abantu bafune okugalagirwa, okumanha n'okutegeera.

²⁸ Wa nkabi oyo atwala ebintu bino nga bikulu byene ebimugemaku, era ole aisaayo omwoyo okubigema aidha kubanga mugezi.

²⁹ Ole ajiira ku kye bikoba aidha kusobolanga okukola ekintu kyonakyona, kuba Musengwa aidha kumumuliikiriranga.