Siraki 49 - Baibuli Ekibono kya Katonda 2014

Yosia

¹ Okwidhukira Yosia kusanhusa ng'oti n'okuwunhirwa akawoowo k'obubbaani obukoleibwa omukugu mu kutabula. Okumwidhukira kudhuudhuula ng'oti n'okukomba ku mudheenene. Era kuwooma ng'oti n'okwembera enhembo ku mbaga eriku n'omwenge ogw'emizabbibu.

² Yosia oyo yakola bukalamu okwiza abantu be obuyaaka, yaatoolagho okusinza ebyenhinhalwa ebitali Katonda.

³ Yagumira ku Musengwa n'omwoyo gwe gwonagwona, yaakubirizanga abantu okutya Katonda mu biseera ebyo ebyali ebibi.

Yeremia

⁴ Ng'otoireku Daudi ni Hezekia ni Yosia, bakyabazinga ba Buyudaaya abandi boonaboona baakola inho ebibi, kuba baava ku Mateeka g'oyo Ali Ghaigulu Yeene, n'ekyabaviiramu okulemwa.

⁵ Ekyo kyava ku beene okutoola obuyinza obwaibwe n'ekitiibwa ekyaibwe, ni babighaayo eri abantu abamaghanga agandi.

⁶ Abantu abo baayokya ekibuga ekitukuvu, enguudo dhaakyo dhaasigala bwagho nga muzira bantu, ng'era Yeremia omulanzi bwe yali amaze okukiranga.

⁷ Yeremia oyo baali nga bamaze okumubisa obubi, waire nga Musengwa yamulonda ng'akaali mu nda ya inhina okuba omulanzi. Musengwa oyo yamutuma aje aiwululegho, amenhemenhe, azikirize era asaaniegho. Kabiri amale azimbe era asimbe buyaaka.

Ezekieli

⁸ Ezekieli n'eyabona ekitiisa kya Katonda mu kubonekerwa, nga kiri ghaigulu gh'ekigaali eky'omu lutalo eky'ebitonde ebiramu ebyetebwa bikerubi.

⁹ Era yayogera ku Yobu eyakolanga buliidho ebintu mu butuufu.

Abalanzi eikumi n'ababiri

¹⁰ Amagumba ag'abalanzi eikumi n'ababiri gagwananga gaava mu magombe gairamu obulamu, kuba abalanzi abo baiza mu Baisiraeli amaani era baabaleetera okulokolwa nga bali n'eisuubi lyene eryesigika.

Zerubbabeli ni Yoshua

¹¹ Tusobola tutya okusaaka Zerubbabeli ekimala? Yali ng'oti n'empeta eriku akamanhiso, Musengwa yaavaala ku ngalo ye ey'oku mukono omusaadha.

¹² Ni Yoshua mutabane wa Yehozadaki yeena atyo bwe yali. Mu kiseera kyaibwe baazimba buyaaka eisinzizo lya Musengwa eitukuvu, nga lya kubanga lya kitiisa ebyanda n'ebyanda.

Nehemia

¹³ Ni Nehemia yeena aidha kwidhukirwanga byanda na byanda. Yairamu okutuzimbira ekimante ekyezungulula ekibuga Yerusalemu ekyali kimenheibwagho, yaataaku emiryango n'endhigi n'eminhololo egisiba. Yairamu n'okutuzimbira endhu dhaife edhaali dhifuuse ebifulukwa.

Badhaadha baife

¹⁴ Ezira muntu wundi ku nsi kuno yali nga Enoka, kuba yatoolebwa ku nsi yaatwalibwa butwalibwe.

¹⁵ Era ezira muntu wundi yazaalibwa ku nsi kuno yali nga Yosefu. Era amagumba ge gakuumibwa.

¹⁶ Shemu, ni Sethi, ni Enoshi, baateebwamu ekitiibwa inho okuwula abantu boonaboona. Aye ekitiibwa kya Adamu kiwula eky'ebitonde ebindi byonabyona ebiramu.