Siraki 47 - Baibuli Ekibono kya Katonda 2014

Nathani

¹ Samueli bwe yamala okufa, Nathani yafuuka omulanzi mu biseera bya kyabazinga Daudi.

Daudi

² Nga ekitundu ekisavu bwe bakitoola ku nsolo egheebwayo ng'omusengo olw'okutabagana nga kya Musengwa, ni Daudi yeena atyo bwe yatoolebwa mu baana ba Isiraeli.

³ Yazaanhisanga empologoma ng'oti bubuzi buto, era yaazaanhisanga ebisolo ebikambwe ng'oti butaama buto.

⁴ Bwe yali akaali mwisuka yaita omusaadha omuwaigufu, yaawonia abantu be okunhoomebwa. Yaata eibaale mu nsuumulo ye, yaaliwolooberera lya kuba Goliathi, yaamukomya okwesuutiriza.

⁵ Yasooka yaasaba Musengwa Ali Ghaigulu Yeene, Musengwa oyo yaamugha amaani mu mukono gwe omusaadha, ag'okwita omusaadha oyo eyali omulwani w'entalo aziramu ntete. Olwo Daudi oyo yaasobola okwiza mu bantu be amaani.

⁶ Abantu baamugha ekitiisa olw'okwita emitwalo n'emitwalo egy'abazigu, era bwe baamuvaaza engule ey'obwakyabazinga baamusaaka olwa Musengwa okumugha enkabi n'amulonda.

⁷ Yaasaaniagho abazigu be boonaboona, yaakuba Abafilisiti baanafughalira irala, baaloba kwiramu kuba ba maani kabiri ni ye buli eno.

⁸ Daudi oyo yeebazanga Musengwa Omutukuvu Ali Ghaigulu Yeene mu buli kye yakolanga kyonakyona, era yaamughanga ekitiisa. Yagonzanga inho Omutonzi we oyo, yaamwemberanga enhembo edhimusaaka n'omwoyo gwe gwonagwona.

⁹ Yatanga abembi mu maiso g'alutaari okwembanga enhembo edhinhuma.

¹⁰ Yanhumisa ebibinuko era yaataagho ebiseera oby'okubikulizangamu, buli kibinuko mu kiseera kyakyo omwaka gwonagwona. Nga bemba enhembo edhisaaka eriina lya Katonda eitukuvu, eisinzizo lyawaala olunaku lwonalwona.

¹¹ Musengwa yasonigha Daudi ebibi bye, yaaleetera obwakyabazinga bwe okusigalagho nga bugumu begulugulu ebyanda n'ebyanda. Era yaakola naye endagaano ati mwene n'abaana be n'abaidhukulu, n'abanaafuganga Isiraeli mu kitiibwa.

Solomoni

¹² Daudi bwe yamala okufa, mutabane we Solomoni eyali omugezi yaafuuka kyabazinga. Era yaafuga ng'ali bukalamu mu miraala, kuba lata we oyo Daudi yamutegekera.

¹³ Tighaalighooku lutalo nga Solomoni n'afuga. Katonda yamugha emiraala ku nsalosalo dhoonadhoona edh'obwakyabazinga bwe, asobole okuzimbira Musengwa eisinzizo nga lya kubaagho byanda na byanda.

¹⁴ Solomoni, nga wali mugezi mu bwisuka bwo! Amagezi go nga mangi ng'oti n'omwiga ogukuuluula ni gubanda n'okubanda!

¹⁵ Amagezi go gaabuna ensi yoonayoona, enfumo dho n'ensambo dho dhaamanhika woonawoona.

¹⁶ Wamanhika okutuukira irala ni mu bizinga ebiri eghala einho, era abantu baakugonza inho olw'okuleeta emiraala.

¹⁷ Waleetera amaghanga mu nsi yoonayoona okukwewuunhia olw'enhembo dho, n'ensambo dho, n'enfumo dho, n'olw'ebyo eby'amagezi by'oinhonhola.

¹⁸ Kulwa Musengwa Katonda wa Isiraeli, wasoloza zaabu ng'oti n'asoloza amabaati obubaati era waasoloza feeza ng'oti n'asoloza ekyuma obuuma.

¹⁹ Aye okwefuluguta n'abakazi einho n'okwakuleetera okugwa.

²⁰ Ekitiibwa kyo wakisiiga enziro, n'eky'abaana bo n'abaidhukulu waakyonoona.

²¹ Waabaleetera enaku n'okubonerezebwa olw'eky'obusiru kye wakola.

²² Aye Musengwa talekerangaku kuba na kivunika, oba okulekulira agho ekintu kye yakola ni kizikirira. Talizikiriza izaire lya Daudi ye yalonda era eyamugonza. Kale ku lwa Isiraeli kyeyava n'alekagho abaawonagho ku izaire lya Daudi oyo.

Rehoboamu ni Yeroboamu

²³ Agho Solomoni yaafa yeeyimba ku badhaadha be abaafa. Owundi ku batabane be nga ni Rehoboamu, yaamusikira ku bwakyabazinga. Aye yali musiru ng'aziramu kategeera, era enkola ye n'eyaleetera abantu okudheema. Ghaaligho ni Yeroboamu mutabane wa Nebati, eyaleetera Abaefuraimu mu Isiraeli ey'oku luuyi olw'omukono omugooda olw'e buvandhuba okugwa mu kibi.

²⁴ Ebibi byaibwe byaba kamaala inho, byatuuka n'okubabingisa mu nsi yaibwe, baasindikibwa mu bunhage

²⁵ kuba baakola ebibi ebya buli nsambo okutuusa Musengwa bwe yatuuka okubeesasuulizaaku.