Siraki 45 - Baibuli Ekibono kya Katonda 2014

Musa

¹ Musengwa yalonda mu baidhukulu ba Yakobo omusaadha atya Katonda, eyasiimya abantu boonaboona era nga mugonzi eri Katonda n'eri abantu. Omusaadha oyo ni Musa, era buli amwidhukira afuna enkabi.

² Musengwa yamuleetera okuba ow'ekitiisa ekyagayaga n'ekya bamalaika, era yaaleetera abazigu be okumutya.

³ Musa oyo ng'olwogera ati, ng'ebyewuninkiriza bitoolera okubaagho. Musengwa ng'aleetera bakyabazinga okuta mu Musa oyo ekinhagansi. Yamugemya ebiragiro bye abighe abantu be era yaamwoleka n'ekitiisa kye.

⁴ Yamulonda mu bantu boonaboona, yaamutukuza olw'obwesigwa bwe n'obuwombeefu.

⁵ Musengwa yaleetera Musa okuwulira amamiro ge, yaamweta aje mu kire ekigemye enzikiiza, mwe yamugheera ebiragiro ng'ali ghalala naye maiso ku maiso. Ebiragiro ebyo nga n'Amateeka agaleeta obulamu n'okumanha, Musa ge yali n'okusomesa Abaisiraeli beege endagaano ya Katonda.

Aaroni

⁶ Musengwa yagha Aaroni muganda wa Musa ekifo eky'ekitiisa. Aaroni oyo yali wa mu kika kya Levi era nga yeena musaadha mutukuvu ng'oti ni muganda we Musa.

⁷ Musengwa yakola endagaano ey'ebyanda n'ebyanda ni Aaroni oyo, yaamugha okukolanga obwakabona mu bantu be. Yaamuvaaza ebivaalo ebirungi einho ebimugheesa ekitiisa,

⁸ yaaboneka bulungi inho. Era yaamugha obumanhiso buno obwoleka ng'ali n'obuyinza: empale edh'olugoye olughegheevu, ekanzu, n'ekivaalo eky'obwakabona.

⁹ Okwezunguluza ekitundu eky'eifo eky'ekanzu, baatungiraku ebifaananie eby'ebibala eby'oku muti omukomamawanga. Era baatungiraku endege kamaala nga dha zaabu, dhijenga nga dhiwaala mu isinzizo ng'ali kutambula, olwo Musengwa aidhukirenga abantu be.

¹⁰ Musengwa era yaagha Aaroni ekivaalo ekitukuvu nga baakidholiga n'empiso n'ewuuzi dha langi ya zaabu n'eya bbululu n'eya nakasooma. Yaamugha n'ekivaalo eky'omu kifuba nga kirimu ebintu ebyetebwa Urimu ni Thummimu.

¹¹ Ekivaalo kino kyalimu ewuuzi edha langi ya kasaayisaayi nga dhaalangibwa omuntu omukugu. Kyabaaku amabaale ag'omughendo nga buli irala lyakolebwa ng'oti n'empeta ekozesebwa ng'akamanhiso, nga lighandiikiibwaku n'ekyuma ekisongovu eriina irala. Omubaadhi ow'amabaale ag'omughendo n'eyasala amabaale ago, yaagataaku n'omugo ogwa zaabu. Amabaale ago gaali ga kwidhusa Musengwa ebika eikumi n'ebibiri eby'Abaisiraeli.

¹² Musengwa era yagha Aaroni ekitambaala eky'oku mutwe ekyaliku akabaati aka zaabu, nga kaaghandiikibwaku n'ekyuma ekisongovu kati: “Yayawulibwa nga wa Musengwa.” Ako koona nga kaakolebwa omufundi omukugu, nga kaboneka bulungi inho era nga kagheesa omuntu akavaire ekitiibwa kinene.

¹³ Nga Aaroni akaali kubaagho, ghaali tighabangaghooku bivaalo biboneka bulungi ng'oti n'ebyo. Ghazira muntu yeenayeena yali abivaireku oba alibivaalaku, okutoolaku Aaroni n'abaana be ni baidhukulu be bonka.

¹⁴ Aaroni yaghangayo emisengo gya mikuzi ebiri buli lunaku, nga giri n'okwokebwa gyaweekereragho.

¹⁵ Musa yayawula Aaroni okumufuula kabona ng'amufuka omuzigo omutukuvu ku mutwe. Eyo yaaba endagaano ya Musengwa ni mwene n'eizaire lye ebyanda n'ebyanda, okugheerezanga Musengwa nga bakabona, n'okusabiranga abantu be enkabi.

¹⁶ Musengwa yalonda Aaroni mu bantu boonaboona, aghengayo emisengo era aniosenga obubbaani obuwunha akawoowo, olw'okwidhukiza Musengwa abantu be, okutoolebwaku ebibi byaibwe.

¹⁷ Yagha Aaroni obuvunaanizibwa obw'okukuumanga ebiragiro, yaamugha n'obukumu obw'okusalanga ensonga n'okwegeresanga Abaisiraeli Amateeka.

¹⁸ Lulala nga bali eyo mu irungu, abantu abataali bakabona baagemwa ensaalwa n'obusungu beekobaana batakanie Aaroni. Abo nga ni Dathani ni Abiramu ni Kora n'abantu baibwe.

¹⁹ Musengwa ekyo yakibona kyaloba kumusanhusa naire. Kale mu busungu obungi yaakola ekyewuunhio, yaabazikiriza mu muliro oguli kubbeibbera.

²⁰ Era yaayongera ku kitiisa ky'Aaroni, yaamugha ebintu abantu bye baghaayo ku ebyo ebisooka okukungulwa mu misiri gyaibwe, bibenga omugabo gwe. Olwo bakabona bafunenga eby'okulya ebibamala obukalamu

²¹ kuba bakabona abo n'abalya ku bigheebwayo ye Musengwa ng'emisengo, Musengwa mwene bye yagha Aaroni n'abaana be n'abaidhukulu nga n'omugabo gwaibwe.

²² Aye Aaroni tibaamugha mugabo gwa itaka lya nsikirano ng'abantu boonaboona lye baafuna, kuba Musengwa mwene n'omugabo gwe era n'obusika bwe.

Finehasi

²³ Finehasi mutabane wa Eleazari atwala kifo kyakusatu mu kitiibwa, bw'oba ng'obaze Musa ni Aaroni bonka, kuba yali atya inho Musengwa. Era yagumira ku Musengwa oyo, waire ng'abantu abandi boonaboona baadheema. Kale yaasoniyisa Abaisiraeli ebibi byaibwe.

²⁴ Agho Musengwa yaakola naye endagaano ey'emiraala, akulirenga eisinzizo n'abantu be. Era mwene n'abaana be n'abaidhukulu, babe nga n'omunaavanga abanaabanga Abakulu ba Bakabona ebyanda n'ebyanda.

²⁵ Endagaano eyindi Musengwa ye yakola ni Daudi ow'omu kika kya Yuda mutabane wa Yesse, yali egema ku bwakyabazinga nga buva ku lata w'omwana, bwasikirwa omwana we. Aye obwakabona bwa Aaroni busikirwa abaana be n'abaidhukulu boonaboona.

²⁶ Imwe bakabona, Musengwa abaghe omwoyo ogw'amagezi, musalenga ensonga mu butuufu, ebintu bibajiirenga bukalamu, n'ekitiibwa kyaimwe kibengagho mu nse n'ense.