Siraki 44 - Baibuli Ekibono kya Katonda 2014

Okusaaka badhaadha baife

¹ Ka tusaake abasaadha abamanhifu einho, badhaadha baife ab'omu nse edhaabita.

² Musengwa yabagha okugabana ku kitiisa kye ekitaloodheka, era n'amaani ge gaababaamu nga gakola okuviira irala mu mainhama.

³ Ghaaligho abo abaafuganga obwakyabazinga, ghaabaagho abaamanhikana einho olw'amaani gaibwe. Abandi baali bawi ba magezi balungi, abandi baayogeranga eby'obulanzi.

⁴ Abandi baali bakulembeze bakalamu ba bantu baibwe, baabafuganga nga babagha amagezi amalungi, era nga babagalagira n'ebibono eby'amagezi.

⁵ Ghaaligho abaayiiyanga enhembo, ghaabaagho n'abo abaayesanga endheso ni babighandiika,

⁶ nga bali mu maka gaibwe mu miraala, era nga bantu bakombe beene.

⁷ Abo boonaboona baali bantu bamanhifu inho, era ng'abantu ab'omu biseera byaibwe babagha ekitiibwa.

⁸ Ghaaligho abaaleka eriina eirungi, nga ni ye buli eno abantu bakaabasaaka.

⁹ Abandi tibakaidhukirwa, baazikirira ng'oti tibaalighooku naire. Baafuuka ng'oti se ti baazaalibwa, era n'abaana baibwe abaabairirira boona batyo.

¹⁰ Aye ghaaligho bano abaali nga batya Katonda, abaakola ebituufu ebitaja kwerabirwa.

¹¹ Ekitiibwa kyaibwe kirisigala mu izaire lyaibwe ng'eky'obusika eri abaana n'abaidhukulu.

¹² Eizaire lyaibwe likaakuuma endagaano, kuba badhaadha baibwe abo boona bwe baakola.

¹³ Eizaire lyaibwe tirija kuwaagho byanda na byanda, n'ekitiibwa kyaibwe tikirisangulwagho.

¹⁴ Emibiri gyaibwe gyaziikibwa bukalamu mu miraala, aye ebikolwa byaibwe ebirungi tibija kwerabirwa ebyanda n'ebyanda.

¹⁵ Abantu abamaghanga agandi baidha kughayanga ku magezi gaibwe, n'abantu nga beesoloiza okusinza Musengwa baidha kubasaakanga.

Enoka

¹⁶ Enoka yasiimya Musengwa, era Musengwa oyo yaamutwala mu igulu. Olw'okwenenia kwe, yaafuuka eky'okuboneraku okuta mu bantu ab'ense dhoonadhoona omwoyo ogwenda okwenenia.

Noa

¹⁷ Noa yali muntu mulungi eyakoleranga ku butuufu. Kale omwidhuzo gw'amaadhi bwe gwazikiriza ebyali ku nsi, yaasigalagho nga mulamu, olwo ku nsi kwasigala nga kukaaliku abantu abaawonagho.

¹⁸ Musengwa yakola naye endagaano ey'ebyanda n'ebyanda, ati taja kabiri kusindika mwidhuzo gwa maadhi kusaaniagho biramu biri ku nsi.

Aburahamu

¹⁹ Aburahamu ni dhaadha w'amaghanga kamaala, era ezirayo muntu wundi yeenayeena eyaali abaireku n'ekitiisa ng'oti ni mwene.

²⁰ Yakuuma Amateeka g'oyo Ali Ghaigulu Yeene, eyamala naakola naye endagaano ng'ekakasibwa n'akamanhiso ku mubiri gwe. Era Musengwa oyo bwe yamugezesa, yamukakasa nga mwesigwa.

²¹ Kale Musengwa yaamusuubiza nga yeerayirira ati, baidhukulu be baidha kugheesanga amaghanga enkabi. Era ati balyala baaba bangi nga tibabalika ng'oti nkungu mu nsi. Era ati alibagulumiza ng'oti muunienie edh'oku igulu. Era ati ekiketezo kyaibwe kija kuva ku nhandha kituuke ku nhandha, n'okuva ku mwiga Eufurate okutuuka ensi y'ekanga.

Isaaka ni Yakobo

²² Isaaka yeena, Musengwa yamusuubiza mu nsambo n'endala ku lwa ise Aburahamu.

²³ Ate ku Yakobo yaayongera okukakasa enkabi dhe yasuubiza okugha abantu boonaboona. Yaamugha ekiketezo ng'omugabo gwe, kye yagabaniamu mu bika eikumi n'ebibiri.