Siraki 42 - Baibuli Ekibono kya Katonda 2014

Ebitagwaine kugemyanga muntu nsoni kubikola

¹ Aye ate baana bange, mutajiiranga inho ku bya bantu, kubaleetera kugwa mu kibi. Ka mbakobereku ebindi ku bitagwaine kubagemyanga nsoni:

² Otabangamu nsoni ku bigema ku Mateeka g'oyo Ali Ghaigulu Yeene, ni ku ndagaano ye, ni ku kusalanga emisango aghazira kusaliriza, waire ng'oli kugisalira bantu abatatya Katonda.

³ Otabangamu nsoni kubalirira bintu bukalamu nga muli ghalala ni mwino ye musuubula naye, oba ye mubita naye mu ngendo. Era ogabananga bukalamu eby'obusika ni basika baino.

⁴ Otabangamu nsoni kukozesa bipimo bituufu, na kufunanga magoba mangi oba matono,

⁵ na kulamuzanga na basuubuzi. Era otabangamu nsoni kukangaivulanga baana bo mikuzi kamaala, na kukubanga mwiru atali mwesigwa miigo mingi.

⁶ Mukazi wo bw'aba nga ti mwesigwa oba nga ghaka oligho n'abantu kamaala, otabangamu nsoni kuta kuufulu ku bintu byo.

⁷ Obalanga era waapimanga ebintu byonabyona by'oghaayo, era oghandiikanga buli kintu ky'ofulumya ni ky'ongiza.

⁸ Otabangamu nsoni kugalagira muntu aziramu magezi oba omusiru, oba omuntu omukulu asoola n'abato. Bw'okola otyo oidha kwoleka nga bwenebwene wakuzibwa bukalamu, era oja kusiimyanga abantu boonaboona.

Abaghala ni baiseibwe

⁹ Waire omughala mwene aba takiidhi, ise endoolo dhimubula mu buliri olw'okumweraliikirira. Bw'aba akaali kufumbirwa amweraliikirira ati oba talifumbirwa. Bw'aba yafumbirwa, amweraliikirira ati oba balimala baamukyagha.

¹⁰ Bw'aba omwegha, amweraliikirira ati oba basobola okumwonoona, oba yaafunira ku luya lwa ise amabunda. Bw'aba yafumbirwa, amweraliikirira ati oba taliba mwesigwa, oba ati katyo aliba mugumba.

¹¹ Okuumanga butatemya mughala wo omukanukanu, kuba asobola okukuleetera okusekererwa abazigu bo. Waafuuka eky'okwogerwaku mu kibuga, era abantu boonaboona baakuyeeyerezanga.

¹² Otamuganhanga kwolesa bulungi bwe eri basaadha oba okumuganha okubanga aghalala n'abakazi abandi;

¹³ kuba, ng'ensiiriri bwe dhoonoona engoye, n'abakazi boona batyo bwe boonoona bakazi banaibwe.

¹⁴ Omusaadha ni bw'aba omubi mu mpisa asingira ghala omukazi omulungi mu mpisa, kuba omukazi n'aswaza era n'anhoomesa.

Ekitiisa kya Katonda kyeyoleka mu bitonde bye

¹⁵ Buti ka ndidhukire Musengwa bye yakola, ndhogere bye nabona. Musengwa yayogera bwogere ebintu byatondebwagho. Era byonabyona bigondera ky'alagira.

¹⁶ Endhuba eba ghaigulu yaayakira ku bintu byonabyona, buli kintu kyabuna ekitiisa kya Musengwa.

¹⁷ Ni bwebaba bamalaika abatukuvu, Musengwa tiyabagha bukumu kwinhonhola byewuunhio bye yakola, waire nga yabaganha okubanga gh'ali mu kitiisa kye nga ghazira kabi kabatuuseeku naire.

¹⁸ Yeekebeedha ebiri ghansi eyo mu lwina olutakoma, yaalinga ni mu myoyo egy'abantu, yaategeera entegeka dhaibwe dhe bagetageta. Oyo Ali Ghaigulu Yeene aidhi byonabyona ebisobola okumanhibwa, era ategeera obumanhiso obubaagho mu nse dhoonadhoona.

¹⁹ Aidhi bukalamu ebyo ebyaligho n'ebyo byonabyona ebija okubaagho. Era ayoleka n'eby'omunda einho ebikwekeibwa.

²⁰ Ghazira ky'odhuuba ky'ataidhi, waire ky'oyogera n'atakiwulira.

²¹ Ensambo ye yasengekamu ensi eyoleka ng'amagezi ge tigaloodheka, era asigala ng'aligho ebyanda n'ebyanda. Ghazira kintu kimwongerwaku waire kimutoolebwaku, era tiyeetaaga muntu yeenayeena kumugha magezi.

²² Ye nga bye yakola byonabyona byegombesa inho! Ye nga bimesunkana ebitaloodheka!

²³ Ebintu ebyo byonabyona birigho era bija kubaagho ebyanda n'ebyanda. Buli kintu kimugondera okutuukiriza ekyakiteesaagho.

²⁴ Yabigereka nga biri bibiri bibiri, ng'ekindi kyawukanaku ku kiinaakyo. Aye ghazira Musengwa oyo kye yakola n'atakimaliriza bukalamu.

²⁵ Buli kintu kikakasa obulungi obwa kiinaakyo. Naani bwenebwene asobola okusinwa okwerolera ebitiibwa ebyo?