Olwembo 4 - Baibuli Ekibono kya Katonda 2014

Omusaadha

¹ Ng'oboneka bulungi, iwe omugonzi wange! Bwenebwene oboneka bulungi. Amaiso go gali ng'oti ga njiibwa, nga gali mu kitambaala kyo kye weebwikiriire. Enviiri dho dhiikirira ku mutwe gwo ng'oti n'ekighaso eky'embuzi bwe kiikirira ku lusozi Gileadi.

² Amaino go gatukula ng'oti kighaso kya ntaama, dhe baakamala okusalaku obuviiri ni badhinaaza, ni dhitambula nga dhiri ibiri ibiri, nga ghazira eziragho.

³ Omunwa gwo guli ng'oti n'ewuuzi ey'olugoye olw'ekitiibwa olwa langi ya kasaayisaayi. Bwe gwogera gusanhusa. Amatama go nga gali mu kitambaala kyo kye weeghembereire, gaboneka bulungi ng'oti kibala kya ku mukomamawanga, kye basazeemu aghabiri.

⁴ Enkoto yo ndeeyi ng'oti munaala gwa Daudi, gwe baazimba okuterekangamu eby'okulwanisa. Erimu ekinhere ekiri ng'oti n'engabo olukumi (1,000), dhe baghaniike ku munaala okugwezunguluza.

⁵ Amabeere go gombi gaboneka bulungi, ng'oti n'empuuli ento eibiri enongo, nga dhiri kuliira mu bimuli ebyetebwa liri.

⁶ Ndidha kuja ku lusozi okuli akawoowo ka mirra, ni ku kasozi okuli akawoowo k'obubbaani, mbe eyo okutuusa obwire bwe bunaakya, n'enzikiiza n'ewaagho.

⁷ Omugonzi wange, oboneka bulungi weenaweena! Oziraku kakyamu naire.

⁸ Omugole wange, idha tuje, tuve ku nsozi dh'e Lebanoni; idha tuje, tuve mu Lebanoni. Vaayo ku mutwe ogw'olusozi Amani, ove n'eyo ku mitwe egy'ensozi Seniri ni Herimoni, eri empologoma n'empala.

⁹ Mwanhinaze iwe omugole wange, ontwaliriiza omwoyo. Ontwaliriiza omwoyo olw'eriiso ly'oninzeeku, n'olw'ekinhere ekikuli mu nkoto.

¹⁰ Mwanhinaze iwe omugole wange, engeri y'ongonzaamu ensanhusa inho. Engeri y'ongonzaamu ensanhusa inho okusinga okunhwa omwenge ogw'emizabbibu. Obuwoowo bwo buwunha bulungi okusinga obuwoowo obundi bwonabwona.

¹¹ Iwe omugole wange, omunwa gwo gudhuudhuula ng'oti guliku mudheenene gwa ndhuki. Olulimi lwo luwoomerera ng'oti luliku bwa mudheenene gwa ndhuki na mata. Ebivaalo byo biwunha ng'oti n'obuwoowo bwonabwona obw'e Lebanoni.

¹² Mwanhinaze iwe omugole wange, oli ng'oti nimiro ye baazimbaku ekisenge ni bagyezunguluza, era oli ng'oti nsulo eriku kuufulu, omuntu owundi y'atasobola kusenamu maadhi.

¹³ Oli ng'oti isamba lya mikomamawanga, egitaaku ebibala ebirungi einho. Era ng'eisamba eryo lirimu n'ebivaamu obuwoowo, obwa henna ni narudo,

¹⁴ ni saffuroni, ni kalamu, ni kinnamoni, n'obubbaani obwa buli nsambo, ni mirra ni aloe, n'obuwoowo obundi bwonabwona obuwunha obulungi einho.

¹⁵ Oli ng'oti nsulo edh'amaadhi amalungi agafukirira enimiro, era waaba ng'oti n'obwiga obukuuluula, nga buva ku lusozi Lebanoni.

Omukazi

¹⁶ Iwe empewo eva ku luuyi olw'omukono omugooda olw'e buvandhuba, n'iwe empewo eva ku luuyi olw'omukono omusaadha olw'e buvandhuba, musituke mwidhe mufuuwe ku nimiro yange, akawoowo akagirimu kaje, kasansaanire woonawoona. Olwo omugonzi wange aidhe mu nimiro ye, alye ku bibala byayo ebirungi einho.