Olwembo 1 - Baibuli Ekibono kya Katonda 2014

¹ Luno n'Olwembo Olusinga mu Nhembo, olwa Solomoni.

Olwembo olusooka Omukazi

² Nnhwegera n'omunwa gwo zeenazeena, kuba okugonza kwo kuwooma okusinga omwenge gw'emizabbibu.

³ Ebizigo bye weesiize biwunha kawoowo; eriina lyo irungi ng'oti n'ebizigo eby'akawoowo. Abaghala abaguna kyebava bakwegomba einho.

⁴ Ntwala y'oli kuja tuve ghano mangu, onhingize ewuwo iwe kyabazinga wange. Twidha kusangaala tusagambire ghalala n'iwe; era tusaake inho okugonza kwo, kuba kusinga omwenge ogw'emizabbibu. Abakwegomba batuufu okukwegombanga.

⁵ Imwe abaghala ab'e Yerusalemu, nze ndi mwirugavu aye mboneka bulungi, ng'oti ni weema edh'e Kedari era ng'oti n'ensuubo edh'omu kisaagaati kya Kyabazinga Solomoni.

⁶ Mutaaningirira nga mundalula olw'okuba ndi mwirugavu, kuba akasana n'akambabula. Baanhinaze bansungughalira, banta ku kulabirira eisamba ly'emizabbibu. Aye ate eisamba eryange lyene tyalirabirira!

⁷ Iwe omwoyo gwange ye gugonza, nkobera y'oyayira ebyayo byo, ni ye birambaala okuwuumulaku mu kasana ghagati. Lwaki mba ng'oti n'omuntu ali kutambulatambula eyo atyo, nga ndi kukunooneza mu byayo bya baayi baino?

Omusaadha

⁸ Mukazi iwe asinga obulungi mu bakazi boonaboona, obwo toidhiiyo? Nonereza ebigere eby'ebyayo mwe bibita, oje oyayire embuzi dho agho okumpi n'eweema edh'abaayi.

⁹ Iwe omugonzi wange, oleetera abasaadha okusuuyirira, ng'oti n'embalaasi enkazi bwe dhireetera ensaadha okusuuyirira edhighaluza ebigaali bya kyabazinga w'e Misiri eby'omu lutalo.

¹⁰ Amatama go gaboneka bulungi n'ebyamadholobera ebigalengeedheraku nga biri ku nviiri, ni mu nkoto yo mwabaamu ebinhere ebyakolebwa mu mabaale ag'omughendo.

¹¹ Twidha kukukolerayo n'ebyamadholobera ebya zaabu, tubidholigedholige ni feeza.

Omukazi

¹² Kyabazinga wange bwe yali yeeziziike akaito ng'ali kuwuumulaku, endhu yoonayoona yaidhula akawoowo ka narudo nga kava ku bizigo byange.

¹³ Omugonzi wange ali ng'oti n'akasawo akalimu akawoowo ka mirra, ke nta mu mabeere gange.

¹⁴ Omugonzi wange ali ng'oti n'ekifaaganda eky'ebimuli eby'omu nsiko ebiwunha akawoowo, ebiba mu masamba ag'emizabbibu mu kiketezo ekyetebwa Engedi.

Omusaadha

¹⁵ Ng'oboneka bulungi iwe omugonzi wange! Bwenebwene oboneka bulungi. Amaiso go malungi ng'oti njiibwa.

Omukazi

¹⁶ Bona eno iwe omugonzi wange, ng'oboneka bulungi, mu mazima geene oli mulungi. Eisubi erya kiragala n'eriidha okuba obuliri bwaife;

¹⁷ emiti emivule gibe empango edh'omu ndhu yaife, ate emiti emisipuressi gibe embaawo edh'akasolya kaayo.