Okwolekebwa 21 - Baibuli Ekibono kya Katonda 2014

Eigulu eiyaaka n'ensi empyaka

¹ Agho naabona eigulu eiyaaka n'ensi empyaka, kuba eigulu eryasooka n'ensi eyasooka byali bibuzeegho, n'enhandha nga tekaaligho.

² Naabona ekibuga ekitukuvu, Yerusalemu ekiyaaka, nga kiika kiva mu igulu ewa Katonda, nga kiri ng'oti n'omugole ye bavaaziiza, eyetegeike okutwalibwa ewa iba.

³ Naawulira amamiro ag'amaani nga gava gha kityamo eky'obwakyabazinga, nga gakoba gati: “Bona, mperaano ekifo Katonda mw'aba kiri mu bantu. Katonda anaabanga nabo, nga ni Katonda waibwe, era nga beene bantu be.

⁴ Alibeeya amaziga goonagoona mu maiso. Ghaliba tighakaali kufa, kugegenga oba kulira, oba obulumi. Kuba olwo eby'eira biriba nga byawaagho.”

⁵ Agho eyali atyaime ku kityamo eky'obwakyabazinga yankoba ati: “Bona! Ebintu byonabyona mbiiza buyaaka.” Era yankoba ati: “Bino bighandiike, kuba ebibono bino bituufu era bya mazima.”

⁶ Era yankoba ati: “Biwoire! Ninze Alufa ni Omega, entoolo n'enkomerero. Kiisi ali ndiwo ndimugha yaanhwera ku bwereere ku nsulo ey'amaadhi ag'obulamu.

⁷ Oyo aghangula, alifuna ebyo. Nze ndiba Katonda we, mwene yaaba mwana wange.

⁸ Aye abo abati, n'abataikiriza, n'abadankaanu, n'abatemo, n'abenzi, n'abalogo, n'abasinza ebitali Katonda, n'abaguya boonaboona, ekifo kyaibwe kiriba mu nhandha ey'omuliro n'obunhota bwa salufa: okwo n'okufa okwokubiri.”

Yerusalemu ekiyaaka

⁹ Agho owundi ku bamalaika omusanvu abaali n'ebibya omusanvu, ebyali biidhwire ebibamba omusanvu eby'ensembo, yaidha, yaayogera ninze, yankoba ati: “Idha, ndidha kukwoleka omugole Entaama Ento y'ebayiiza.”

¹⁰ Agho mu Mwoyo malaika yantwala ku lusozi olukologho era oluleeyi, yandholeka Yerusalemu ekibuga ekitukuvu, nga kiika nga kiva mu igulu ewa Katonda.

¹¹ Kyali kiidhwire okumesunkana okw'ekitiisa kya Katonda. Okumesunkana kwakyo nga kuli ng'oti n'okw'eibaale ery'omughendo einho eryetebwa Yasipera, nga kibitamu amaiso.

¹² Kyali kyezungulwirwa ekimante ekikologho era ekireeyi, nga kuliku emiryango ikumi n'ebiri nga giriku bamalaika ikumi na babiri. Era nga gighandiikiibwaku amaina ag'ebika eikumi n'ebibiri eby'Abaisiraeli.

¹³ Ku luuyi olw'e buvandhuba nga kiriku emiryango esatu, ni ku luuyi olw'omukono omusaadha olw'e buvandhuba emiryango esatu, ni ku luuyi olw'omukono omugooda olw'e buvandhuba, emiryango esatu ni ku luuyi olw'e bugwandhuba emiryango esatu.

¹⁴ Ekimante ekyo eky'ekibuga kyali kyemereire ku mabaale ikumi n'abiri ag'omusingi, ku kiisi ibaale nga kuliku eriina ery'omulala ku batume eikumi n'ababiri ab'Entaama Ento.

¹⁵ Malaika eyali ali kwogera ninze, yali n'olupimo olwa zaabu olw'okupima ekibuga, n'emiryango gyakyo, n'ekimante ekikyezungulwire.

¹⁶ Endhuyi edh'ekibuga ekyo eina dhaali dhaagayaga, obuleeyi n'obugazi. Agho malaika yaapima ekibuga ekyo n'olupimo lwe, nga kigheza kilomita nkumi ibiri na bina (2,400) obuleeyi, n'obugazi, n'obugungumavu bwakyo nga byagayaga.

¹⁷ Era yaapima n'ekimante ekikyezungulwire, nga kigheza mita nkaaga malaika yapima mu kipimo ekyabuliidho eky'abantu.

¹⁸ Ekimante ekyo kyali kizimbiibwa n'amabaale ag'omughendo ageetebwa yasipera. Aye ekibuga kyene nga kya zaabu omukenenule, omutangaavu ng'oti kirawuli.

¹⁹ Omusingi ogw'ekimante eky'ekibuga nga gutoneibwatoneibwa n'amabaale ag'omughendo aga buli nsambo. Erisooka nga lyetebwa yasipera, eryokubiri saffiro, eryokusatu agate, eryokuna emeraludo,

²⁰ eryokutaanu sarudokinisi, eryomukaaga sarudioni, eryomusanvu kurisolito, eryomunaana berulo, eryomwenda topazio, eryeikumi kirusopuraso, eryeikumi n'eirala yakinto, eryeikumi n'abiri ametusito.

²¹ Ate emiryango eikumi n'ebiri gyali amabaale ag'omughendo einho ikumi n'abiri. Nga buli mulyango gukoleibwa mu ibaale irala. Oluguudo olw'ekibuga ekyo lwali lwa zaabu omukenenule abitamu amaiso ng'oti kirawuli.

²² Mu kibuga ekyo tyabonamu isinzizo, kuba Musengwa Katonda Aghanga Ebintu Byonabyona aghalala n'Entaama Ento, abo nga n'eisinzizo lyakyo.

²³ Era ekibuga ekyo tikyetaaga ndhuba, waire mwezi kukyakira, kuba ekitiisa kya Katonda n'obutangaavu bwakyo, era Entaama Ento n'entaala yaakyo.

²⁴ Abantu abamaghanga goonagoona banaatambuliranga mu butangaavu bwakyo, era bakyabazinga ab'oku nsi banaaleetangamu eby'obukombe byaibwe.

²⁵ Emiryango gyakyo tigija kwigalwanga olunaku lwonalwona, era eyo teribaayo bwire.

²⁶ Ekitiisa n'eby'obukombe eby'amaghanga goonagoona birireetebwa mu kibuga ekyo.

²⁷ Aye tikiringiramu kintu kitali kirongoofu, waire omuntu akola ebyenhinhalwa oba omuguya, okutoolaku abo bonka abaaghandiikibwa mu kitabo eky'obulamu eky'Entaama Ento.