Okuvaayo 31 - Baibuli Ekibono kya Katonda 2014

Abaakola ebintu eby'omu Weema ey'Okwagaananirangamu ni Musengwa Katonda

¹ Musengwa Katonda yaakoba Musa ati:

² “Bona eno, nonze Bezalelo mutabane wa Uri era mwidhukulu wa Hura, era nga wa mu kika ekya Yuda.

³ Naamugha ku maani gange, naamugha obusobozi, n'amagezi, n'obumanhi, era naamugha okutetenkania n'okuyiiya.

⁴ Nhenda ayiiye ng'akozesa amagezi amangi einho, ng'akola ebintu ebitali bya nsambo ndala, mu zaabu, mu feeza, ni mu byuma eby'ekikomo.

⁵ Era ng'abaadha amabaale ag'omughendo ag'okutaanha, era ng'asala obuntu obudholiga ku mbaawo, era ng'atetenkania yaayiiya mu nsambo kamaala.

⁶ Era naamulonderaku Oholiabu mutabane wa Ahisamaka ow'ekika kya Dani. Era naagha ekitone eky'obusobozi abo boonaboona abakozi ab'amagezi, baghange okukola ebyo byonabyona bye ndi kulagira okukola.

⁷ Bye ndi kulagira ni bino: Eweema ey'Okwagaananirangamu ni Musengwa Katonda, Esanduuku ey'Endagaano n'ekisandikiza kyaku, ni byonabyona eby'okukozesanga mu Weema eyo, bino

⁸ emeeza n'ebikozesebwa byaku byonabyona, ekikondo eky'entaala nga kikolebwa mu zaabu omukenenule n'ebikozesebwa byaku byonabyona, alutaari ey'okuniokezaaku obubbaani,

⁹ ni alutaari ey'okwokeraku ebigheebwayo ebyokebwa n'ebikozesebwa byaku byonabyona, n'ekyogero ghalala n'ekityamo kyakyo.

¹⁰ N'ebivaalo ebirungi einho ebya Aaroni, n'ebya batabane, eby'okukola obwakabona,

¹¹ n'omuzigo ogw'okusiiga, n'obubbaani obuwunha akawoowo obw'okuniokeza mu Kifo Ekitukuvu. Ebyo byonabyona biri na kukolebwa nga bwe nakulagira.”

Sabbato

¹² Musengwa Katonda yaakoba Musa ati:

¹³ “Koba abantu Abaisiraeli oti mukuzenga olunaku lwange olwa Sabbato, kuba n'akamanhiso ghagati ghange n'imwe, n'abaana baimwe, n'abaidhukulu ense n'ense olwo mughange okumanha nga nze Musengwa Katonda ninze mbatukuza.

¹⁴ Mwidha kukuzanga olunaku lwa Sabbato, kuba lutukuvu. Ole ataalutwalenga nga lutukuvu wa kwitibwanga, era omuntu yeenayeena anaalukolerangaku omulimo gwonagwona anaabanga takaabalirwa mu bantu bange.

¹⁵ Emirimo giidha kukolebwanga mu nnaku mukaaga, aye olunaku olwomusanvu, ni Sabbato, lunaku lwa Musengwa Katonda lwa kuwuumula era lutukuvu. Omuntu yeenayeena anaakolanga omulimo gwonagwona ku Sabbato aidha kwitibwanga.

¹⁶ Kale Abaisiraeli boonaboona, abaana n'abaidhukulu, baidha kukuzanga olunaku lwa Sabbato ng'akamanhiso ak'endagaano etawaagho.

¹⁷ Era kaidha kubanga kamanhiso akatawaagho ghagati ghange n'Abaisiraeli boonaboona okubaidhusanga nze Musengwa Katonda bwe nakola eigulu n'ensi mu nnaku omukaaga, ku lwomusanvu ni ndekera agho okukola, ni mpuumula.”

¹⁸ Katonda bweyamala okwogera ni Musa ku lusozi Sinai, yaamugha ebibaadho ebibiri eby'amabaale Katonda mwene bye yaghandiikaku amateeka.