Okubala 35 - Baibuli Ekibono kya Katonda 2014

Ebibuga bye baagha Abalevi

¹ Agho Musengwa Katonda yaayogera ni Musa e Yeriko kumpi ni Yorudani, mu biketezo by'e Moabu eby'oku museetwe. Yaakoba Musa ati:

² “Lagira Abaisiraeli oti, mughe Abalevi ebibuga eby'okubangamu, nga mutoola ku ebyo imwe Abaisiraeli bye mwagabana bibe obutaka bwaibwe. Era mughe Abalevi abo eitaka ery'okwayiramu eryezungulwire ebibuga ebyo.

³ Ebibuga ebyo biidha kubanga bya Balevi abo nga bya kubangamu, n'eitaka eribyezungulwire libenga lya kwayirangamu nte dhaibwe, n'entaama, n'embuzi, n'ensolo edhindi.

⁴ Eitaka ery'okwayirangamu eryezungulwire ebibuga bye mwidha okugha Abalevi, liidha kuba lya bugazi bwa mita ebikumi bina n'ataanu, okuva ku kimante ky'ekibuga okwezungulula endhuyi dh'ekibuga ekyo dhoonadhoona.

⁵ Kale ni mwidha kupimanga mita lwenda kuliya okw'ekibuga ku luuyi olw'e buvandhuba, ni mita lwenda ku luuyi olw'omukono omusaadha olw'e buvandhuba, ni mita lwenda ku luuyi olw'e bugwandhuba, ni mita lwenda ku luuyi olw'omukono omugooda olw'e buvandhuba, ng'ekibuga kirimu ghagati. Eryo n'eriidha okubanga eitaka ery'okwayiramu eryezungulwire ebibuga eby'Abalevi ebyo.

⁶ Ebibuga mukaaga ku ebyo bye mwidha okugha Abalevi, biidha kubanga bya kulumukirwamu ole yeenayeena aita omuntu nga tagendereire. Ku ebyo mwidha kubongereraku ebibuga ebindi amakumi ana na bibiri.

⁷ Ebibuga byonabyona aghalala bye munaagha Abalevi, biidha kuba amakumi ana na munaana n'eitaka lyaku ery'okwayirangamu.

⁸ Mwidha kutoola ku bibuga imwe Abaisiraeli bye mwagabana, mubighe Abalevi nga mujiira ku bunene obwa buli kika. Ebika ebinene biidha kughangayo ebibuga kamaala, ate ebika ebitono bigheeyo ebibuga bitono.”

Ebibuga omuntu mw'asobola okulumukira

⁹ Agho Musengwa Katonda yaayogera ni Musa, yaamukoba ati:

¹⁰ “Koba Abaisiraeli oti, bwe muliba mumaze okusomoka omwiga Yorudani ni mungira mu nsi Kanaani,

¹¹ mulirondamu ebindi ku bibuga, byaba bya kulumukirangamu ole anaitanga omuntu nga tagendereire.

¹² Ebibuga ebyo mwe mwidha okulumukiranga olw'okwewonia oyo ayenda okwesasuuza. Olwo, ole anaitanga omuntu nga tagendereire, alobe kwitibwanga ng'akaali kwewozaaku mu maiso g'abantu nga beesoloiza.

¹³ Ebibuga ebyo bye munaaghaayo, omuntu mw'asobola okulumukira, biidha kuba mukaaga.

¹⁴ Mwidha kughaayo ebibuga bisatu eruuyi ere ng'osomoike Yorudani, n'ebindi bisatu mu nsi Kanaani, bibe ebibuga omuntu mw'asobola okulumukira.

¹⁵ Omuisiraeli yeenayeena, oba omuntu ow'endha, oba omusenze, bw'anaitanga omuntu nga tagendereire, aidha kubanga wa idembe okulumukira mu bibuga ebyo omukaaga olw'okwewonia.

¹⁶ “Aye ole bw'akubisa omuntu ekiisi eky'ekyuma ekigumu einho, omuntu oyo n'amala n'afa, oyo amukubye aba mutemo, era omutemo oyo aidhanga kwitibwa.

¹⁷ Era ole bw'agema ekiisi eky'eibaale ekighanga okwita omuntu, n'akikubisa omuntu, era omuntu oyo n'amala n'afa, oyo amukubye aba mutemo, era omutemo oyo aidhanga kwitibwa.

¹⁸ Era ole bw'agema ekiisi eky'omuti ekisobola okwita omuntu, n'akikubisa omuntu era omuntu oyo n'amala n'afa, oyo amukubye aba mutemo, era omutemo oyo aidhanga kwitibwa.

¹⁹ Ali n'oluganda ku muntu oyo ye baise, n'aidhanga okwita omutemo oyo. Kasita anaamwagaananga ng'amwita.

²⁰ Ole bw'akyagha omuntu n'amufumita ekintu, oba n'amweteega n'amukonhoogerera ekintu n'amwita,

²¹ oba n'amukuba ebifunsi n'afa, oyo amukubye aba mutemo era aidhanga kwitibwa. Ali n'oluganda ku muntu oyo ye baise, aidhanga kwita omutemo oyo kasita anaamwagaananga.

²² “Aye kisoboka okuba nga ole yafumita omuntu mu kwanguyiriza ng'amuziraku nzigu yoonayoona, oba kyaba nga yamukonhoogerera ekintu nga tasoose kumweteega,

²³ oba kyaba nga yamukuba eibaale erighanga okwita omuntu, aye nga tamanhienga ng'ali agho, kale omuntu oyo yaafa, ate nga tabangaku muzigu we, era nga tiyagenderera kumukola kabi.

²⁴ Agho abantu abeesoloiza baidha kusalangagho omusango ghagati gh'eyaita n'owoluganda ku mufu ayenda okwesasuuza, nga bajiira ku mateeka ago.

²⁵ Era abantu abeesoloiza baidha kuwonianga oyo eyaita omuntu nga tagendereire, bamutoole mu ngalo dh'ole ali n'oluganda ku mufu ayenda okwesasuuza, bamwizeeyo mu kibuga omuntu mw'asobola kulumukira kye yali alumukiiremu. Olwo abenga eyo okutuusa Omukulu wa Bakabona aliku lw'anaafanga.

²⁶ Aye ole eyaita omuntu nga tagendereire bw'anaatuumanga ensalosalo ey'ekibuga eky'okulumukiramu kye yali alumukiiremu,

²⁷ memale ali n'oluganda ku mufu ayenda okwesasuuza n'amwagaana kuliya okw'ekibuga ekyo era n'amwita, olwo ali n'oluganda ku mufu oyo taabengaku musango gwa butemo.

²⁸ Oyo taabengaku musango, kuba ole eyaita omuntu ali n'okusigalira irala mu kibuga ekyo eky'okulumukiramu okutuusa Omukulu wa Bakabona lw'afa, memale yaikirizibwa okwirayo ku butaka bwe.

²⁹ Ago n'agaidha okubanga amateeka ge munaakuumanga, imwe n'abalibairirira boonaboona, buli ghe munaabanga.

³⁰ “Ole bw'anaitanga omuntu, aidha kwitibwanga nga ghamaze kubaagho obudhulizi obumulumiriza obuswika obw'omuntu omulala. Aye omudhulizi amulumiriza bw'anaabanga omulala ati yenka, omuntu oyo taitibwenga.

³¹ Mutaikirizanga mutemo kusasula kintu kyonakyona, olw'okununula obulamu bwe nga bamusaliire ogw'okufa. Aye mumwitenga bwite.

³² Era oyo eyalumukira mu kibuga eky'okulumukiramu, mutamwikirizanga kusasula kintu kyonakyona ng'ayenda okwirayo ku butaka bwe, ng'ate Omukulu wa Bakabona akaali kufa.

³³ Kale ni mutayonoonanga nsi ye mubaamu, kuba obutemo bwonoona ensi. Era ezira ky'oghanga kukola okufunisa ensi ekisonigho olw'obutemo obwo obugikoleirwamu, okutoolaku okwita oyo eyatemula.

³⁴ Mutayonoonanga nsi ye mubaamu, ensi nze Musengwa Katonda mwemba kuba nze Musengwa Katonda mba mu bantu bange Abaisiraeli.”