Okubala 21 - Baibuli Ekibono kya Katonda 2014

Okughangula Abakanaani

¹ Agho Aradi kyabazinga ow'Abakanaani eyabanga mu kiketezo ekikalukalu ku luuyi olw'omukono omusaadha olw'e buvandhuba olwa Kanaani, yaawulira ng'Abaisiraeli bali kwidhira mu ngira ebita mu Atharimu. Kale yaaja okubalumba era yaanhagaku abandi, yaabatwala nga basibe.

² Abaisiraeli beeyama eri Musengwa nga bakoba bati: “Bw'onaatugha okughangula abantu bano, twidha kuzikiriza ebibuga byaibwe tubimaliregho irala.”

³ Musengwa Katonda yaaganha Abaisiraeli kye baamusaba, yaabagha okughangula Abakanaani, era baabazikiriza okubamaliragho irala aghalala n'ebibuga byaibwe. Kale ekifo ekyo baakituuma eriina Horuma.

Omusota ogwakolebwa mu kyuma eky'ekikomo

⁴ Abaisiraeli bwe baava ku lusozi Hori, baagema engira eja ku Nhandha Emyufu, basobole okwekooloobya nga tibabiseeku mu kiketezo eky'ensi Edomu. Bwe baali nga bakaatambula, abantu beesinwa olugendo.

⁵ Kale baatoolera okwemuluguunhiza Katonda ni Musa nga bakoba bati: “Lwaki mwatutoola mu Misiri okwidha okufiira ghano mu irungu? Ghano ghazira mere waire amaadhi, era bino ebimere bitusinie.”

⁶ Agho Musengwa Katonda yaabasindikira emisota egy'obusagwa, gyabamoodha, Abaisiraeli kamaala baafa.

⁷ Agho abantu baaja ye Musa baamukoba bati: “Twayonoona okwemuluguunhiza Musengwa n'iwe. Tusabire Musengwa atutooleku emisota gino.” Kale Musa yaabasabira.

⁸ Musengwa Katonda yaalagira Musa ati: “Kola omusota ogufaanana ng'oti n'egyo egy'obusagwa, ogughanike ku mpango. Buli muntu omusota ye gunaamoodhanga bw'anaalinganga ku ogwo oguli ku mpango, aidha kuwonanga.”

⁹ Kale Musa yaakola omusota mu kyuma eky'ekikomo, yaagughanika ku mpango. Era buli muntu omusota ye gwamoodhanga, memale n'alinga ku ogwo ogw'ekikomo, ng'awona.

Okuva ku lusozi Hori okutuuka ku kiiko eky'Abamoabu

¹⁰ Agho Abaisiraeli baasitula, baaja baatuuka mu Obothi, baasimba agho weema dhaibwe.

¹¹ Bwe baasitula okuva mu Obothi, baaja baasimba weema dhaibwe mu Iye Abarimu, mu irungu eriringiriire Moabu, ku luuyi olw'e buvandhuba.

¹² Bwe baasitula okuva agho, baaja baasimba weema dhaibwe mu kiiko eky'e Zeredi.

¹³ Bwe baava agho, baaja baasimba weema dhaibwe ku luuyi lule nga bamaze okusomoka omwiga Arunoni, oguli mu irungu erituukira irala ku nsalosalo y'Abamori. Omwiga Arunoni n'ogwawula ekiketezo eky'Abamoabu ku ky'Abamori.

¹⁴ Mu kitabo ky'entalo dha Musengwa kyebava bakoba bati: “Ekibuga kya Wahebu ekiri mu biketezo bya Sufa, n'ebiiko by'oku mwiga Arunoni,

¹⁵ n'obuserengeto obw'ebiiko, ebija ni bituuka ku kibuga Ari, kumpi n'ensalosalo ni Moabu.”

¹⁶ Bwe baava agho, beeyongerayo baatuuka ku Beeri eyo nga n'ensulo Musengwa ye yakoba Musa ati: “Soloza abantu ghalala, ndidha kubagha amaadhi.”

¹⁷ Agho Abaisiraeli baayemba olwembo luno bati: “Nsulo iwe, sembula enhindo dho dhiveemu amaadhi, twidha kugembera olwembo.

¹⁸ Ensulo eyasimwa abakologho, abakungu ab'abantu; nga basimisa emiigo gyaibwe egy'obwakyabazinga, emiigo gyaibwe egy'omu ngalo.” Bwe baava mu irungu, baaja e Mattana.

¹⁹ Bwe baava e Mattana, baaja e Nahalieli. Bwe baava e Nahalieli, baaja e Bamothi.

²⁰ Bwe baava e Bamothi, baatuuka mu kiiko ekiri mu biketezo bya Moabu gh'olengerera eirungu, kumpi n'entwiko y'olusozi Pisiga.

Okughangula bakyabazinga Sihoni ni Ogi

²¹ Agho Abaisiraeli baatuma abakwenda ye kyabazinga Sihoni ow'Abamori, okumukoba bati:

²² “Tukweghemba otuleke tubiteku mu nsi yo. Titwidha kubita waire mu musiri oba mu isamba ery'emizabbibu, oba okunhwa amaadhi mu nsulo. Twidha kutambulira mu luguudo mwonka, okutuusa nga tumaze okuva mu kiketezo kyo.”

²³ Aye Sihoni yaalobera Abaisiraeli okubita mu kiketezo kye. Era yaasoloza abantu be, yaaja nabo e Yahazi mu irungu, yaalwanisa Abaisiraeli.

²⁴ Abaisiraeli baita abasaadha be mu lutalo olwo, era baabanhagaku ekiketezo kye, okuva ku mwiga Arunoni okutuukira irala ku Bammoni, ku mwiga Yabboki kuba e Yazeri n'aghaali ensalosalo n'Abammoni

²⁵ Abaisiraeli baanhaga era baaba mu bibuga eby'Abamori byonabyona, nga batwaliizaamu n'ekibuga Heshiboni n'ebyalo ebikyezungulwire.

²⁶ Heshiboni kyali nga n'ekibuga ekikulu ekya kyabazinga Sihoni ow'Abamori. Einhuma ere, Sihoni oyo yali nga yamala okulwanisa eyali kyabazinga wa Moabu, yaamunhagaku ekiketezo kye, okutuukira irala ku mwiga Arunoni.

²⁷ Abembi kye baava ni bemba bati: “Mwidhe mu Heshiboni, kizimbibwe, leka ekibuga kya Sihoni kiizibwegho.

²⁸ Omuliro gwava mu Heshiboni; enimi dhaagwo dhaava mu kibuga kya Sihoni. Gwayokya ekibuga Ari ekya Moabu; gwamamulamamula abakungu ab'ebifo ebigulumivu eby'okusinzizaamu 1 ku mwiga Arunoni.

²⁹ Mukagwireku imwe ab'e Moabu! Muzikiriire imwe abasinza omusambwa Kemoshi! Omusambwa ogwo gulese batabane baimwe baafuuka ekiyiigibwa, ate baghala baimwe baafuuka abanhage ba Sihoni kyabazinga ow'Abamori.

³⁰ Abaana n'abaidhukulu tubazikiriiza okuva e Heshiboni okutuuka e Diboni, twabasaaniagho mu bibuga, okutuukira irala e Medeba.”

³¹ Kale mu nsambo eyo, Abaisiraeli baatyama mu kiketezo ekyali eky'Abamori.

³² Era Musa yaatuma abantu baakeeta ekibuga Yazeri. Abaisiraeli baanhaga ebyalo byakyo, baabingamu Abamori abaali babibaamu.

³³ Agho Abaisiraeli baakyuka, baagema engira eja e Bashani. Kyabazinga Ogi ow'e Bashani yaavaayo n'abantu be boonaboona okulwanisa Abaisiraeli mu Edurei.

³⁴ Aye Musengwa Katonda yaakoba Musa ati: “Otamutya, ndidha kukugha obughanguzi, omughangule n'abantu be boonaboona n'ekiketezo kye kyonakyona. Oidha kumukolaku nga bwe wakola ku kyabazinga Sihoni ow'Abamori eyafugiranga mu Heshiboni.”

³⁵ Kale Abaisiraeli baita Ogi ni batabane be n'abantu be boonaboona, aghazira kulekaghooku waire muntu mulala ati, era baamala baanhaga ekiketezo kye, kyaba kyaibwe.