Matayo 8 - Baibuli Ekibono kya Katonda 2014

Yesu awonia omuntu ow'endwaire ey'ebigenge

¹ Agho Yesu bwe yava ku lusozi, ebikunsu eby'abantu byamunonereza.

² Agho omuntu ow'endwaire ey'ebigenge yaidha ye Yesu yaakuba amakiryaivu yaakoba ati: “Musengwa, bw'oyenda oghanga okumponia.”

³ Yesu yaagolola omukono gwe yaamugemaku ng'akoba ati: “Nhenda, wona.” Era mangu ago yaawona endwaire ey'ebigenge.

⁴ Yesu yaamukoba ati: “Bona nti tokoberaku muntu, aye ja weeyandhule ewa kabona era ogheeyo ekirabo Musa kye yalagira, kwe banaakakalisa.”

Yesu awonia omwiru ow'omukulu ow'ekikunsu eky'abaisirukale

⁵ Yesu bwe yangira mu Kaperinaumu, Omukulu ow'ekikunsu eky'abaisirukale yaidha yaamweghemba,

⁶ ng'akoba ati: “Musengwa, omugheereza wange agoomeire ghaka mu bulumi obubitirivu.”

⁷ Yesu yaamukoba ati: “Leka ndidhe mmuwonie.”

⁸ Omukulu ow'ekikunsu eky'abaisirukale yairamu ati: “Musengwa, tigwanira iwe kwingira mu ndhu yange, aye yogera bwogere kibono omugheereza wange aidha kuwona.

⁹ Nze zeena ndi muntu atwalibwa, ate ndi n'abaisirukale be ntwala. Era bwe nkoba ono nti, ‘Ja,’ aja n'owundi nti, ‘Idha,’ aidha n'omwiru wange nti, ‘Kola kino,’ akikola.”

¹⁰ Yesu bwe yawulira ebyo, yeewuunhia, era yaakoba abaali bamunonereza, ati: “Bwenebwene ka mbakobere tyagaananga muntu ali na kwikiriza nga kuno mu Isiraeli!

¹¹ Era ka mbakobere: abantu kamaala baliva ku luuyi olw'e buvandhuba n'olw'e bugwandhuba, baatyama ni Aburahamu, ni Isaaka, ni Yakobo mu Bwakyabazinga obw'omu igulu

¹² aye abaana ab'omu Bwakyabazinga balibingirwa ku luya mu kizikiiza, omuliba okugegenga n'okuluma emba olw'obulumi obubitirivu.”

¹³ Agho Yesu yaakoba omukulu w'ekikunsu eky'abaisirukale ati: “Ja, kikukolerwe nga bw'oikiriiza.” Era mu saawa yeene eyo, omugheereza yaawona.

Yesu awonia abantu kamaala

¹⁴ Agho Yesu yaatuuka mu nhumba ya Petero, yaabona mukoirume wa Petero nga alambaire agho omusuudha gumuli bubi.

¹⁵ Yaamugema ku mukono, omusuudha gwamuleka yaasituka yaamugheereza.

¹⁶ Obwire bwe bwali nga buziba, baamuleetera abantu kamaala abaaliku emizimu emibi era yaabinga emizimu egyo ng'ayogera bwogere, era yaawonia abalwaire boonaboona.

¹⁷ Kino kyatuukiriza omulanzi Isaia kye yakoba ati: “Yatuwonia ebituluma, yeetwika ebirwaire byaife.”

Obuzibu obw'okunonereza Yesu

¹⁸ Yesu bwe yabona ng'abantu kamaala bamwetooloire, yaalagira Abeegeresebwa be basomoke enhandha.

¹⁹ Munamateeka mulala yaaseeta yaamukoba ati: “Mwegeresa ndidha kukunonereza buli gh'onaajanga.”

²⁰ Yesu yaamukoba ati: “Ebibe biri n'ebiina, n'enhonhi edh'omu ibbanga dhiri n'ebisu, aye Omwana ow'Omuntu azira gh'aisa mutwe.”

²¹ Owundi, mulala ku Beegeresebwa be, yaamukoba ati: “Sooka onganhe nje nziike lata wange.”

²² Aye Yesu yaamukoba ati: “Nnonereza, leka abafu baziike abafu baibwe.”

Yesu alekeza kiwunga

²³ Agho Yesu yaaniina eryato, n'Abeegeresebwa be baaja naye.

²⁴ Tibwalwa kiwunga ow'amaani yaasituka ku nhandha, amayengo nga genda kusaaniagho bwa lyato. Yesu yali atendwike.

²⁵ Kale Abeegeresebwa baaseeta gh'ali baamuzuusa nga bakoba bati: “Musengwa, tuwonie tuli kusaanagho.”

²⁶ Yesu yaabakoba ati: “Lwaki mutiire, imwe ab'okwikiriza okutono!” Yaasituka, yaakaabukira kiwunga n'enhandha, era kyaba mulaala inho.

²⁷ Abantu beewuunhia nga bakoba bati: “Ono muntu wa kika ki kiwunga n'enhandha ye biwulira!”

Yesu awonia abaaliku emizimu emibi e Gadara

²⁸ Agho bwe yatuuka eruuyi ere mu nsi ey'Abagadara, abantu babiri abaaliku emizimu emibi baamwagaana nga bava mu lwambiidhi omwaziikibwanga abantu, nga bakambwe ekibitiriire era nga ghazira muntu asobola kubita mu ngira eyo.

²⁹ Olwamubona baawowoigana nga bakoba bati: “Otwendeza ki iwe Omwana wa Katonda? Oidhie ghano okutudaazadaaza ng'obwire bukaali kutuuka?”

³⁰ Ghaaligho ekighaso eky'embiidhi kamaala edhaali dhiri kulya, nga dheeswireku akata.

³¹ Emizimu gyamweghemba nga gikoba giti: “Bw'otubinga ghano, tusindike mu kighaso eky'embiidhi.”

³² Yaagikoba ati: “Kale muje.” Agho gyabavaaku, gyaja mu mbiidhi. Ekighaso kyonakyona kyalindimukira ku kiyiriro embiidhi dhaagwa mu nhandha, dhaafiira mu maadhi.

³³ Abaali badhaaya baalumuka baaja mu kibuga, baaghaya byonabyona n'ebyafa ku baaliku emizimu.

³⁴ Agho ab'omu kibuga boonaboona baavaayo baidha ye Yesu. Era bwe baamubona baamweghemba ave mu kiketezo kyaibwe.