Matayo 14 - Baibuli Ekibono kya Katonda 2014

Okufa kwa Yoanne Omubatiza

¹ Mu kiseera ekyo, Herode omufuzi wa Galilaaya yaawulira okwatiikirira kwa Yesu,

² era yaakoba abagheereza be ati: “Oyo ateekwa kuba nga ni Yoanne Omubatiza n'azuukiire mu bafu, kyava aghanga okukola ebyewuunhio ebyo.”

³ Herode oyo yali yagema Yoanne yaamuliidha, yaamuta mu ikomera olwa Herodia muka muganda we Filipo

⁴ kuba Yoanne yamukoba ati: “Ti kituufu iwe okumubayiza.”

⁵ Aye waire yeegomba okumwita, yatya abantu abaali bamutwala nga mulanzi.

⁶ Mperaano ku lunaku olw'amazaalibwa ga Herode, mughala wa Herodia yakina mu maiso g'abaaligho boonaboona, yaasangaaza Herode.

⁷ Herode yaamusuubiza nga n'okwefuugha yeefuugha, okumugha kyonakyona ky'aghanga okusaba.

⁸ Omughala nga yeeyambisa amagezi inhina ge yamugha, yaakoba ati: “Mpa ghano buti ku lusowaani omutwe gwa Yoanne Omubatiza.”

⁹ Kyabazinga yeidhusa, aye olw'okuba nga yali amaze okulayira mu maiso g'abo be yatyama nabo, yalagira bagumughe.

¹⁰ Yaatuma mu ikomera, baatema ku Yoanne omutwe,

¹¹ baaguleetera ku lusowaani, baagugha omughala, omughala yaagutwalira inhina.

¹² Abeegeresebwa be baidha baatwala omulambo, baaguziika era baaja baakobera Yesu.

Okuliisa abantu enkumi eitaanu

¹³ Yesu olwabiwulira yaava agho, yaagema eryato yaaja eyo yenka mu kifo ezira bantu. Aye abantu olwamanha, baava mu bibuga baamunonereza nga babita ku lukalu.

¹⁴ Yesu bwe yava mu lyato yaabona olukunkumuli olw'abantu yaabagemerwa ekisa era yaawonia abalwaire baibwe.

¹⁵ Obwire nga buli kuziba, Abeegeresebwa baaseeta gh'ali baamukoba bati: “Ekifo kino kiziramu bantu, ate n'obwire bujiire siibula abantu baje mu byalo baghange okwegulirayo ku kamere.”

¹⁶ Aye Yesu yaabakoba ati: “Ghazira kibatwala, imwe mubaghe balye.”

¹⁷ Aye baamukoba bati: “Tuzira kantu ghano okutoolaku emigaati etaanu n'ebyenhandha ebibiri.”

¹⁸ Yaabakoba ati: “Mubindeetere ghano.”

¹⁹ Bwe yamala okulagira abantu okutyama ku busubi, yaatoola emigaati etaanu n'ebyenhandha ebibiri, yaalinga ghaigulu, yaabigha enkabi nga yeebaza Katonda, yaamegulamegulamu emigaati, era yaagigha Abeegeresebwa be, era Abeegeresebwa be baagigabula abantu.

²⁰ Boonaboona baalya baiguta. Baasoloza ebitundu ebyafiikagho, ebiibo ikumi na bibiri ebiidhuvu.

²¹ Abaalya baali abasaadha ng'oti enkumi itaanu (5,000), nga tobaze bakazi na baana.

Yesu atambulira ku maadhi

²² Era tibwalwa Yesu yaalagira Abeegeresebwa be okuniina mu lyato bamwembereremu basomokenga eruuyi ere, mwene nga bw'asiibula abantu.

²³ Bwe yamala okusiibula abantu yaaja okusaba yenka eyo ku lusozi. Eigulo lyatuuka ng'ali eyo yenka.

²⁴ Eryato mu kiseera ekyo lyali liri ghagati mu nhandha era ng'amayengo gali kulisunda inho olwa kiwunga eyalifuluma emberi.

²⁵ Nga buli kumpi okukya, Yesu yaidha ye bali ng'ali kutambulira ku maadhi.

²⁶ Aye Abeegeresebwa be olwamubona ng'ali kutambulira ku maadhi, baadhugumira era baakoba bati: “Muzimu!” Era baayana olw'okutya.

²⁷ Aye Yesu tiyalwa, yaayogera nabo, yaabakoba ati: “Mugume emyoyo mutatya, ninze.”

²⁸ Agho Petero yaamukoba ati: “Musengwa, oba niiwe lagira ndidhe y'oli nga ntambulira ku maadhi.”

²⁹ Yesu yaamukoba ati: “Idha.” Agho Petero yaava mu lyato, ng'atambulira ku maadhi okuja eri Yesu.

³⁰ Aye bwe yabona kiwunga yaadhugumira, era bwe yatoolera okudhugumira yaawowoigana ng'akoba ati: “Musengwa mponia!”

³¹ Era Yesu yaagolola mangu omukono yaamugema, era yaamukoba ati: “Okwikiriza kwo nga kutono! Lwaki obuusiizabuusiiza?”

³² Bwe baamala okuniina mu lyato nga kiwunga awoleera.

³³ Era abaali mu lyato baamusinza nga bakoba bati: “Bwenebwene, oli Mwana wa Katonda!”

Yesu awonia abalwaire e Gennesareti

³⁴ Bwe baasomoka, baatuuka mu kiketezo eky'e Gennesareti.

³⁵ Ab'eyo bwe baamumanha baatuma woonawoona mu nsi eyo baaleeta ye yali abalwaire boonaboona.

³⁶ Baamweghemba aganhe kasinga bageme bwa ku lusa olw'ekivaalo kye era boonaboona abaagemaku baawona.